ROMANKVDVNG 14 - ANU LUGOD N. T. (BSI)

Nok Bvrrom Kcbangcm Ba:yoka

¹ Sc:kobv mc:jvgnamdok mc:nam gvnam rcmagdagji cdc tani:dokkcpc, bvm gogrvgsutok, cmpige:la agom mcngkamdcm luker-luyermvnsupcdan gogma:pcka.

² Akonc mc:jvgdag bv atvmumko doycpc, cdvlo rcmagnc tani:dc oying-ogeyongko doycji.

³ Sc:ko dodagji bvm sc:ko doma:ji doma:ncdcm tayum moyoka, odokkc sc:kobv doma:pc du:dagji bvm sc:ko dodagji cdcm aidag aimang cmna lumoyoka. Kapila:nc Ru:ncpvncbv bvm gogrvgsuto.

⁴ No sc:kobv:n amikc ager gerya:nckoncm aidag aimang cmna lupcncdc? Cdc bvk avkc ru:tumdok kcra:do:mvn bv dagdo cdcmanggom otabdo. Odokkc bvm bottcmoyc, kapila:nc Ru:tumdc bvm dagmola:dag.

⁵ Tani:akonc longc akoncm aiya:dopc longc akonkoncmyam mc:dag, cdvlo akon tani:konc appv:longgcm c:mo:pc mc:dag. Appvng tani:ycm pv:namkopc mc:jvgmotok bvk avkc asinbolo.

⁶ Sc:kobv longcdcm mcnggcla ka:dagji, Ru:tummc mcnggcla cdcm mcnggcla ka:dag. Sc:kobv dodagji doncdc:sin, Ru:tummc mcnggcla dodag, kapcnc bv Ru:ncpvncmc aipai bila:yam; cdvlo sc:kobv doma:pc du:dagji, Ru:tummc mcnggcla doma:pc du:dag odokkc Ru:ncvncmc aipai bidag.

⁷ Ngolukkolok sc:kosin avkcpc turmang, odokkc ngolukkolok sc:kosin avkcpc simang.

⁸ Ngolu turmvlo, ngolu Ru:tumkc lcgangc turdo, odokkc ngolu sidomvlo, ngolu Ru:tumkc lcgangc sido; cdcmpila cmpcmvlo, ngolu turdunggom sidunggom, ngolu Ru:tumkc.

⁹ Kapila:nc odok lcgangci Kristobv sikang odokkc lckoda turkangku, odomvlojen Bv sinc kvdv:doklang turnckvdvng anyipaklok Ru:tumpc ila:dopc cmna.

¹⁰ Nolu kapila aidag-aimang cmna agomcm noluk bvrokvdv:dcm ludang? Cdcmanggom, nolu kapila noluk bvrodcm yoppakdon? Kapila:nc ngolu appvngc Ru:ncpvnckc kcbang bangkodo daga:paycku;

¹¹ Kapila:nc cdcm adla lc:tag, “Ngo turra du:namdc, Ru:tumbv ludag, appvngc lcbvngcm ngokkolo:pc tuma:yc, odokkc appvng Ru:ncpvncmc aipai luyc.”

¹² Cdcmpidag ngolukkolok appvngc av avkc inamgvnamlok kvnamcm Ru:ncpvncmc kvbipa:ycku.

Nok Bvrodcm Aima:nckopc Imoyok

¹³ Cdcmpcmvlo kajc akoncm akonc kcbang agom luka:mvnsuyobongka, cmpige:la cdcmyam bvro akonclok lambclo cdvlosin lcsudsunam sv:tungko cdcmanggom motumgvtumncko ilvgma:pcka.

¹⁴ Ngo kindag odokkc Ru:tum Jisukolo luyirla luto jc okkosin av avdc narc:ma:ncpc imang; cmpige:la sc:ko narc:mang cmna mc:dagji odokkcpc akomumkolokkcpci narc:mang.

¹⁵ Nok bvrodc no okodcm dola dojcg jckka:ji, no aya:lok lambcm gvmangcibong. No okodcm dodoji Kristobv sckkc lcgangc sika:ji bvkkcpc sinampc imoyoka.

¹⁶ Cdcmpidag nok aima:namdcm aima:n agerkoncmpc lumoyok.

¹⁷ Kapila:nc Ru:ncpvnckc migom doko mo:pvdc dormo kanamclang mcnganc odokkc Angunnc Yalodo mc:pobadnamc;

¹⁸ sc:kobv cdcmpc Kristokc agercm gerdoji Ru:ncpvnckc torvgsupcnammc odokkc tani:kvdv:dc aidag cmna tolvgdag.

¹⁹ Kajc cmpcmvlo okodc mcnganmodagji luyirra lubilai odokkc lckolakkopc owudpc mosa:dagji.

²⁰ (Donamdok lcga:pc, ima:pcka,) Ru:ncpvnckc agerdcm donam lcgangc, mopen morenma:pcka. Appvng attarci aropakpc narc:dag, cmpige:la cdc akonmumcm aima:pc imonamdc bv okodcm dodagji odokki imurc;

²¹ adincm donam cdcmanggom apong tv:namdc aimang cdcmanggom atvko inamdc cdc nok bvrodcm lcsutsumonamdc.

²² Mc:jvgdc nokkolo okodc du:nc, nokkclang Ru:ncpvnckc pongkokdo lc:tok; mc:poncdc bv sc:kobv avycm aidag-aimang cmna lusupc lcgangc kama:ji okodok lcgangc bv aidag cmna lusudoji.

²³ Cmpige:la sc:kobv bvkkc mc:moko du:ji aima:ncko cmna lupakdag, bv domvlo, bv mc:jvgdokkcm agercm germangongkokki; kapila:nc okodci mc:jvgdokkc lenma:nc cdc pa:bc.