ROMANKVDVNG 11 - ANU LUGOD N. T. (BSI)

Ru:ncpvnckc Israelcm Mc:yinsunam

¹ Ngo cmpcmvlo, tawudung, Ru:ncpvncbv Bvk tani:kvdv:dcm aimang cmna mcpaktonci? Kapcsinmang! Ngo avavyc Israel tani:ko, Abrahamkolok lennc, Benjaminkc ope:dok akonc.

² Ru:ncpvncbv Bvk tani:kvdv:dcm aimang cmna mcpakto sc:kobulum Bv kinpo:dagaji. Nolu kinma:nci Elijangkc agomcm Ru:ncpvnckc agom jvggabdc okkom cmdagaji, kapc Israeldok birudi:pc Ru:ncpvncmc lujvgcm lutoji.

³ “Ru:tuma, bulu nok lungor lunckvdv:dcm moketo, bulu nok kumko kvdv:dcm mopen-morenamto, odokkc ngok atcrongem lc:to, odokkc bulu ngok turnamscm madag.”

⁴ Cmpige:la Ru:ncpvnckc lulatsula lunamdc Bvkkolo:pc okkon? “Ngo ngokkcpc kvnvd lv:yingkopc lc:to sc:kobulu Baalkc kcra:lo lunga:toma:ji.”

⁵ Cdcmpila cdcmv:pc silomclosin du:pakla du:nckvdv:dc, ayangkokki balennamkvdv:dc.

⁶ Cmpige:la cdc ayangkokkimvlo, cdc ager gernamdokkima:bong; ckvma:mvlo ayang abodc cdvlosin ayang abbopc ila du:ma:bong.

⁷ Cmpcmvlo okkon? Israeldc cdc okkom makaji pa:la:tomang. Balennamdc cdcm pa:to, cmpige:la du:paknckvdv:dcm tormoto,

⁸ cdcm adla lc:namdcmpc, “Ru:ncpvncbv bulum yallom bito, amigkvdv:dcm ka:pa:ma:ncm odokkc yerung kvdv:dcm tadbegma:ncm, silokc longckvdv:so:pc.”

⁹ Odokkc Dawidbv luto, “Buluk tcbulkvdv:dc sitika:pclang moyetpc imotok, kinmango:pc ngunna lc:nam arungkopc odokkc palvg lvgnamkopc bulukkcpc ika:lang;

¹⁰ buluk amik kvdv:dcm kcmomotoka odomvlojen bulu ka:begma:yc, odokkc buluk amvrkvdv:dc lo:dv longkcm gc:ycpc.”

¹¹ Cdcmpila ngo tawudung, bulu otappc lcsutsutonci? Kapcsin cdcmpcmang! Cmpige:la buluk imursiyarkokki Angu tani:kvdv:do:pc mopvdc pvngangkang, cdcmpc Israeldcm ncdopc imopc cmna.

¹² Su:pak buluk gvmurra gvnamdc mo:pvsokkcpc mitcmircmc, odokkc ilanggvla:ma:namdc Angu tani: kvdv:dokkcpc mitcmircmpc idag, cdcmyam cddvkojc bulu appv:dcm pvngapmvlo bojcya:ycnc!

Angutani:kvdv:dcm Mopvtnam

¹³ Su:pak ngo Angu tani:kvdv:dcm ludung. Ngo cddvkopcjc mclvgla ager germonammcnc;

¹⁴ ngo ngok agercm unjvgmodo ngok ajon Jiwu kvdv:dcm ncmopc cmna gerdo, odokkc bulukkolok akkem asudowko mopvtla:dopc.

¹⁵ Kapila:nc buluk aimang cmna mcpaknamdc jodi mo:pvscm lckomokunammc, buluk torvg sunamdc sikolokkc turkunamdcma:mvlo kapc iycn?

¹⁶ Jodi le:nc pitang yonnamdcm bipongarnamdc angundagmvlo, cdc alumpakdc:sin cdcmv:pc; odokkc appvrdc angunamdagmvlo, cdcmv:pc rcngke:kvdv:dc:sin.

¹⁷ Cmpige:la rcngke:kvdv:dok akke dvrsodamkang, odokkc nolusin, yumrang Jolpai oiyinnc, Jolpai vsvng amv:dokkcm mitcmircmdcm pa:mvnsupc cmna pasotge:la ilvgto, rcngke:kvdv:dcm pa:la bottapc lusuyok.

¹⁸ Nolu bottapc lusumvlo, mc:pa:langka cdc nolumang jc appvrdcm pvrgabla dung, cmpige:la appvrdc:mvn nolum pvrrasula du:n.

¹⁹ Nolu ludo, “Rcngke:kvdv:dc dvrsotkang ngom jen patungge:la ilvgdopc cmna.” Cdc arro.

²⁰ Bulu dvrsotkang kapila:nc buluk mc:jvgma:namkokki, cmpige:la no mc:jvgla:yam dagla dung. Cdcmpidag pcsso tcm-tcmla du:langka.

²¹ Kapila:nc Ru:ncpvncbv jodi aiyo:pc rc:lennc rcngke:kvdv:dcm cpv:pc mc:tomang, nolumsin cpv:pc mc:ma:yc.

²² Mcnggabtok cmpcmvlo Ru:ncpvnckc ayangabodcmnang tornamdcm: sc:kobulu oletkanc bulukkolo:pc tornamdcm, cmpige:la Ru:ncpvnckc asin rcmaknamdcm nolukkolo:pc, cdcsin nolu Bvk asin rcmaknamdo du:tvmvlopak; ckvma:mvlo nolumsinci papakyc.

²³ Odokkc akedcmsinci, buluk mc:jvgma:namdcm mc:tvla du:mvlo, papakge:la ilvgyc, kapila:nc Ru:ncpvnckc bulum lckoda pananc ilang-gvlangc dung.

²⁴ Kapila:nc nolum jodi okodc sa:tc:dok sa:ncdokkcmci papaktomvlo lukamgvkamdc yumrang Jolpai vsv:pc innc, odokkc papaknammc, sa:tc:dok sa:ma:ncmpc ima:nc, aiyo:pc mopu:la lc:nam Jolpai vsvngcmpc imang, cddvkojc bojcya:pc sc sa:tc:lok sa:nc rcngke: kvdv:dcm papukla ilvgyckunc buluk avkc Jolpai vsvngdcm.

Ru:ncpvnckc Appvngcm Aya:la Mc:yinsunam

²⁵ Ckvma:mvlo nolu agom kinncpa:ncpc imvlo noluk avkc bottcpc mc:sunamkokki, ngo nolum scm mcngkinla:ma:nam agomscm mcngkintoka cmna mc:dag, bvrrangkvdvnga: tornamko Israeldok atakkolo lenkang, Angun Tani:kvdv:dc pv:namkopc gvanggamma:sisscm, odokkc cdcmpc Israel appv:dcm mopvtyc;

²⁶ cdcm adla lc:namdcmpc, “Jiondok motuncdc gvyc, Jakobkolokkcm Bv aisi:ma:nc ager gernamdcm la:pakyc.”

²⁷ “Odokkc sc ngok bulukkol ru:scgla lusv:nam lugodpc iyc cdvlo ngo buluk pa:pkvdv:dcm la:pagambiycji.”

²⁸ Tadponc lutaddok lunamdo bulu Ru:ncpvnckc miruc, noluk lcga:pc; cmpige:la balenna banamdok lcga:pc bulu aipc mc:namc buluk lekekc abukvdv:dok lcgangc.

²⁹ Kapila:nc amandc:lang odokkc Ru:ncpvnckc gognamdc angu angumang.

³⁰ Cdcmarpc nolu lcko kapc Ru:ncpvnckc agom lukamcm tadmangaji cmpige:la su:pak aya:dcm torvgsutoji buluk agom lukamdcmpc tadma:namdcmpc,

³¹ cdcmv:pc bulu su:pak agom lunamdcm tadmang cdcmpc ipcla jc nolum mc:yinsunamdcm lcngkankokki bulusin mc:yinsunamcm pa:ycpc.

³² Kapila:nc Ru:ncpvncbv appvng tani:ycm agom lukam tadma:ncdo:pc tolvgto jc Bv:jen appvngcm ayangcm bidopc.

Ru:ncpvncmc Aipai Binam

³³ O mircmdok o:rv:dc odokkc agom kinnamdc odokkc Ru:ncpvnckc kinnampa:namdc cddvkojc o:rv:dagnc! Kapc jc Bvk kcba:ba:namdc mala mapa:ma:namcnc odokkc kapcjc mcngkinma:namcnc Bvk lambckvdv:dc!

³⁴ “Kapila:nc sc:konu Ru:tumkc asindcm kinton, cdcmanggom sc:ko Bvk luyirluncpc ila du:n?”

³⁵ “Cdcmanggom sc:ko Bvm amanko biton jc Bvm bilatyckun?”

³⁶ Kapila:nc Bvkkolokkc odokkc Bvkkokki odokkc Bvkkolo:pc appvng attarkvdv:dc. Lo:dvscm Bvkkolo:pc amin gvnamdc dungka:langka! Amen.