PILIPIANG KVDVNG 3 - ANU LUGOD N. T. (BSI)

Aro Dormokanam

¹ Adtcroso, ngok bvrokvdvnga, Ru:tumkolo mc:potoka. C:mo:pinc agomdcm nolukkolo:pc jvgpc ngokkcpc jvgkvn-jvgmvnpc imang, odokkc ngokkcpc pcsopcnam kamang.

² Iki:kvdv:dcm ansu-kasutoka, aima:nc ager gernckvdv:dcm ansula ka:toka, adin amvrdcm mopanmoransunc kvdv:dcm ansuka:sutoka.

³ Kapcnc ngolu aropc gadpuknamkvdv:dc, sc:kobulu yaloki Ru:ncpvncmc kumdoji, odokkc Kristo Jisukolo amin gvnncji, odokkc adin-amvrlo mc:tinsumang.

⁴ Ngokkc avkc adin amvrlo:sin mc:tinsula:nam lcgangc du:daggom. Jodi Angu tani:akonc mc:yc bvkkc adinno mc:tinsunam lcgang dung cmna mc:ycmvlo.

⁵ Ngokkc bojcyangko dung; pi:nyi longclo gadpuknammc, Israel tani:kvdv:doksin Israelc, Benjaminkc ope:dokkc, Hibriulokkc onam Hibriuyc;

⁶ Porisi:kvdv:dok lujvg-lurodokkcmpc, mondoli:kvdv:dcm mopen-morennc kvdv:dok asin mc:barla gvya:nc, lugc kama:nam lujvg-lurodokkcmpc dormokannc.

⁷ Cmpige:la ngo oko okodcmci avpc pa:tonc, ngo Kristokc lcgangc yokkang cmna kvtobong.

⁸ Aropakpci appvngcm ngo yogkang cmnai kvdo ngok Kristo Jisu Ru:tummc kinnamdok appvngcmyam arckaya:namdok lcgangki. Bvk lcgangc du:gcm gvto, odokkc cdcmbulum yoppaknam attarc cmna kvtobong.

⁹ Cdcmpc ipc cmna jc ngo Kristomc avpc pa:pc odokkc bvkkolo pa:supc, ngok avkc dormo kanamkokkimang, lujvg-lurodokki, cmpige:la jc okodc Kristokolo mc:jvgnamkokkipak, Ru:ncpvnckolokkc dormokanamdc cdc mc:jvglo togcsudag.

¹⁰ Jc ngo:jen Bvm kinycpc odokkc Bvk sikolokkc turkunamdcm, odokkc Bvk du:g gvnamdcm gvtc:mvnna:ycpc, Bvggvngkcmpc imvnpc Bv sikolo,

¹¹ jc pagycmvlo ngo sikolokko turkunamdcm pa:la:ycpc.

Dugpv:pckodo:pc Dugka:la Dugnam

¹² Ngo sc pa:tobong cmmang cdcmanggom ngo pv:namkopc aipakka:bong cmmang; cmpige:la ngo cdcm ngokkcpc imopc cmna itvla gvdo, kapila:nc Kristo Jisubv ngom Bvkkcpc imoto.

¹³ Bvrokvdvnga, ngo avkcpc isuto cmna mc:sumang; cmpige:la ager abangkodan ngo ido, lamkubc okko du:ji cdcm mitpanbomge:la kcra:pc okko du:ji kvnggv:pc kanggabbomna.

¹⁴ Ngo dugpvngkodo:pc dugka:la dugtvla gvdo Kristo Jisukolo Ru:ncpvnckc tayc:pc gognamdok amandok pa:nam lcgangc.

¹⁵ Kajc cdcmpila ngolu sc:kobulu mc:jv:suka:bo:ji mc:tvlai, odokkc nolu atvko jodi mc:lv:dag, Ru:ncpvncbv cdcmsin nolum lcngkanyc.

¹⁶ Ngolu kajc okodcm pa:toji cdcmong aropc gagbomna du:lai.

¹⁷ Bvrokvdvnga, ngok gerkolo ka:yv:sula germvntoka, odokkc cdc sc:kobulu nolukkcmpc du:dagnc ngolukkolo lukannammcmpc idopc kanggaplangka.

¹⁸ Kapila:nc, nolukkolok bojcrungcm sc:kom ngo lckko:-lckko:lo lubikanc odokkc su:paksin miksi dvlai lubidung, Kristokc kurusdok mirupc turra du:dag.

¹⁹ Buluk itcrsingapdc mopenmorenc, buluk Ru:ncpvncdc aki:dc, odokkc buluk anyi:pcnamdo bulu bottapc asincm mc:sudo, asinkvdv:dokki mo:pvsok attarkvdv:dcm mcnggo:bomdag.

²⁰ Cmpige:la ngoluk appvngkc mitcmircmdc taycngamo:tc, odokkc tolokkc ngolu moturncko toka:do, Ru:tum Jisu Kristomc,

²¹ sc:kobv ngoluk cmmum amvrcm amin gvnc amvrpc motenyckupc, Bv appvng attarcmci Bvk kcvgpc ila:nanc ialang-gvla:dokki idopc.