PILIPIANG KVDVNG 1 - ANU LUGOD N. T. (BSI)

¹ Poullang Timoti:bv, Kristo Jisukc ager gerya:nc– Kristo Jisukolo du:nc aipc kumnc tani:kvdvng sc:kobulu Pilipi:do du:nc, paduri:kvdv:dokki odokkc dormo ager igur-gvgurnc kvdv:do:pc:

² Nolukkolo:pc Ayangc odokkc Ru:ncpvnckolokkc mcnganc ngoluk Abuclang Ru:tum Jisu Kristokolokkc.

Ponckvdv:dok Lcgangc Poulkc Kumnam

³ Ngok nolum mc:pa:do appv:do ngo Ru:ncpvncmc aipai bido,

⁴ ngo noluk appvngkc lcgangc kumdodcm mc:pobadsula ngok kumnamcm kumla,

⁵ noluk lupongardo longcdokkcbong silolo:pc tadponc lutaddcm noluk lckopc lumvn-gvmvnnamdokki aipai binamcm bido.

⁶ Odokkc ngo kindagrung jc sc:kobv ainc agerko gerrobtonc noluk ara:lo cdcm Jisu Kristokc longcdo ingapla boma:ycku.

⁷ Cdcmpidag cdc ngokkcpc noluk appvngkc lcgangc mc:namdc mcnggoddag, kapila:nc ngok aisnbo nolum mcnggabla du:do, kapcnc nolu appvngc ngok makana:lo du:namlo odokkc lurasuddom odokkc tadponc lutad lunamdcm arro cmna ludodcm ngok lcdulo ayangcm pa:tc:mvnnc.

⁸ Kapcnc Ru:ncpvncbv ngok lukanbinnc, kapc ngo noluk appvngkc lcgangc aipc mcngkesula sitoji Kristo Jisukc aipc mc:namki.

⁹ Odokkc cdc ngok kumnamc jc noluk aipc mc:namdc jen bojc bojcya:pc du:ycpc kinnamkokkilang mcngkin-sagkinnam-kokki.

¹⁰ Odomvlo jen nolu okodc appvngcm aiya:dagji aidag cmna luycpc, odokkc Kristokc longcdok lcgangc angunna odokkc aimang cmna lukosuma:pc du:ycpc.

¹¹ Dormokanamlok a:yckvdv:dc bi:la okodc Jisu Kristokokki gva:doji, Ru:ncpvnckc amin gvnamclang aipai binam lcgangc.

Turra Du:namdc Kristobv

¹² Nolu kintoka cmna ngo mc:dag, bvrokvdvnga, jc okodc ngokkolo ika:ji cdc aropakpc tadponc lutaddcm gvbadmopc cmna:mvn ikan.

¹³ Cdcmpc ikang jc cdc kcbang tadnc appv:dc kinapkang odokkc ake appv:do:pc jc ngok makana:lo du:namdc Kristokc lcgangc;

¹⁴ odokkc bvro appvngkvramdcmci Ru:tumkolo asinc kvnggvngammoto ngok makana:lo du:namkokki, odokkc pcsokonoma:pc Ru:ncpvnckc agomdcm bojcrungyangko kvnggv:yangkang.

¹⁵ Akkedan buluk amik ka:la:ma:namki odokkc ngo:pcya:-bv:pcya: cmnamkokki Kristomc lutadbigo:dag.

¹⁶ Lcdukcdc cdcm aipc mc:la:yam idag, ngom so tadponc lutaddcm lurasudopc cmna lc:tag;

¹⁷ po:pckcdc kcla lutadbigo:dag, asin ansvngo:la imang cmpige:la ngom mc:dvrmopc cmnango:mvn mc:la ngok makana:lo du:dodcm.

¹⁸ Cmpcm okkon cdcmpcmvlo? Appvng lambo:lo, lume:lugo:la cdcmanggom arolo, Kristobvm lutadgo:bitak; odokkc odo ngo mc:pabatsudo.

¹⁹ Kapila:nc ngo kindag jc noluk kumnamkoki odokkc Jisu Kristokc Yalodok bidumsunamdokki sc ngok motunam lcga:pc iycku.

²⁰ Cdcm kapc ngo kvnggv:pc toka:la mc:doji odokkc mc:dag jc ngo cmpcsin anyv:suma:yc, cmpige:la jc asinc kvnggv:pc migang ga:la su:pak lo:dvpc kapc Kristomc mcnggcycnc ngok amvrro, turnamkokki cdcmanggom sinamkokki.

²¹ Kapcnc ngokkcpc turra du:namdc Kristobv, odokkc sinamdc avnammc.

²² Cdc jodi adinlo turnampc iyc, cdcmvlo ngok lcga:pc a:yckanc ager gernamc. Ckvdaggom okodcm ngo bala la:ycsong ngo lula:mang.

²³ Ngom anyidok ara:do ncrkeptag. Ngok mc:namdc gvpakkupc odokkc Kristokc lcdulo du:mvnkupc, kapcnc cdc airu:pc aiya:dag.

²⁴ Cmpige:la adin-amvrdo du:tvnamdc noluk lcga:pc maya:pcnamc.

²⁵ Scm aroru:pc mcnga:la mc:la, ngo kindag jc ngo du:tvyc odokkc noluk lcdulo du:tvyc, kapila:nc noluk pu:pojarponam lcgangc odokkc mc:jvgdo mc:pobatsula,

²⁶ odomvlo jen ngokkolo nolu pv:namkopc Kristo Jisukolo amin gvmonam lcgangcm pa:ycpc.

²⁷ Ngoluk turnamlok inamsa:nam kvdvngo:dcm Kristokc tadponc lutaddok arckamotoka, odomvlojen ngo gvla ka:do cdcmanggom du:manggom, ngo noluk agomcm tadbegycpc jc nolu yaloakko:lo kvnggv:la dagdo, asin akkongki tadponc lutaddok mc:jvgdok lcgangc atakkolo:pc,

²⁸ odokkc noluk birudi:kvdv:dok okkomsin pcsoma:pc. Sc narcngo:pc bulum sinamcm ka:pangc, cmpige:la nolukkc motunamdc, odokkc cdc Ru:ncpvnckolokkc.

²⁹ Kapila:nc cdcm nolum bitung jc Kristokc lcgang Bvm mc:jvgo:pcnammang cmpige:la Bvk lcgangc du:gcm gvpcnammc.

³⁰ C:mo:pin pamvnsunamcm okodcm nolu ka:toji odokkc su:pak ngokkcpc idu:ji.