METIU 9 - ANU LUGOD N. T. (BSI)

Jisubv Intakko Sipaknc Tani:ko Csa:mokunam

¹ Odokkc ollungkolo ange:la Bv kekonpc kongko:la avkc nogorpc gva:toku.

² Odokkc ka:toka, bulu bvkkolo:pc alc alag cngunna:ma:pc kinc tani:ko gva:boto, bvk asubdo kcdla du:ncko; odokkc Jisubv buluk mc:jvgnamdcm kangge:la alc alag cngunma:pc kinc tani:dcm luto, “Pcsoyok, awosa; nok pa:pkvdv:dcm mc:yinamsubitobong.”

³ Odokkc ka:tok, ainc agom luyirnckvdv:dc av avc lusuto, “Sc tani:sc Ru:ncpvncmc aimang cmna ludung.”

⁴ Cmpige:la, buluk mc:nam sagnamkvdv:dcm kinna:yam luto, “Nolu kapila asinkvdv:dc aima:nc agomcm mc:dang?

⁵ Kapila:nc okodc lupoya:dang, cdcma:m lupc, ‘Nok pa:pkvdv:dcm mc:yinsutobong’, cdcmanggom lupc, ‘Darobtok odokkc lambc gvtok?’

⁶ Ckvdaggom tani: Awodokkc mo:pvso pa:bcm mc:yinsula:nanc dung cmna nolu kinycpc.” Bv alc alagc cngunma:pc kinc tani:dcm luto– “Darobtok, nok asubdcm la:sa:sutok odokkc okumpc gvkangkuka.”

⁷ Odo bv darobto odokkc okumpc gvkangku.

⁸ Cdc yadkumsunc tani:kvdv:dc cdcm kangge:la pcssamkang, odokkc bulu Ru:ncpvncmc amincm gvbu:moto, sc:kobv tani:kvdv:dcm cdcmpc ila:nammcm bitu:nc.

Jisubv Metiumc Gognam

⁹ Jisubv odokkc gvnamc, Bv Metiu cmnam tani: akonc migom murkong urkumsuko ager gerkolo tedla du:dopc ka:begto; odokkc Bv bvm luto, “Ngok lcdu lcdulo gvmvntoka.” Odokkc bv darobla Bvk lcdu lcdulo gvmvnkang.

¹⁰ Odokkc bv dopc-tv:pc cmna okumdo idodcm, ka:toka, bojcrungko migom murkong urkumsunc odokkc papi:yc gva:la Jisukc odokkc Bvk agom tadjvgla gvmvnnc tani:kvdv:dok lcdulo tedangamkang.

¹¹ Odokkc Parisi kvdv:dc cdcm ka:namc, bulu Bvk agom tadjvgla gvmvnnc tani:kvdv:dcm luto, “Kapila noluk poyirncdc migom murkong urkumnc kvdv:dok odokkc papi:kvdv:dok dokolo domvndang?”

¹² Cmpige:la Bv cdcm tadbegla, Bv luto, “Sc:kobulu csa:dagnc kinam ka:ncm mapcnam kamang; cmpige:la sc:kobulu ramdagnc bulu mapcnammc.

¹³ Gvkang odokkc cdc okkom cmdagnc ikita:ka, ‘Ngo ayang-abbom mado, odokkc lutomna palvgnammcm mamang.’ Kapila:nc ngo dhormokanc tani:kvdv:dcm gokkapc gvmang, cmpige:la pa:pkanckvdv:dcmomvn gokkapc gvdun.”

Doma:pc Menna Du:namdcm Taunam

¹⁴ Odo Jo:nkc agom tadjvgla gvmvnnc tani:kvdv:dc Bvkkolo:pc gva to, scmpc lula, “Ngolu odokkc Parisi:kvdv:dc kapila apindoma:pc menna du:don, cmpige:la nok agom tadjvgla gvmvnnc tani:kvdv:dc menma:nc?”

¹⁵ Odo Jisubv bulum lubito, “Mida:dok mibokvdv:dc buluk lcdudo magbodc du:do takamcm mc:dvrmc:sola:dolang? Longckoncm pvnga:yc, cdvlo bulukkolokkcm magbodcm gvpakboyckubong, odokkc bulu menyc.

¹⁶ “Odokkc sc:kosin titsumma:nc gaincm aku gainkolo potaglvgmang, kapila:nc cdc potaknamdc attarcm bedyob bomdag, odokkc cdcmyam bedyangc:dag.

¹⁷ Anu angur alangcm aku alang mckolo mcmang; cdcmpc lc:mvlo, lc:nancdc bukporyc, odokkc alagkvdv:dc bitpagamyc, odokkc alag kvdv:dc aima:pc idag; cmpige:la anu ala:dcm anu mcnananckolo mcdo, odokkc cdcmpc imvlo anyipakdc aila du:do.”

Migom Ager Gerncdok omcdc odokkc Jisukc Gcnam Attardcm Gakkvnc Nc:dc

¹⁸ Bv bulum cdcmpc lula du:dodcm, ka:toka, migom ager gernc tani:konc gva:la Bvk kcra:do lcbvng tuma:to, scmpc lula, “Ngok omckonc su:pak sipakkang: ckvdaggom gvla nok alagkki bvm ri:yitbiteikapcn, odo bv turyckupc.”

¹⁹ Odokkc Jisubv darobto odokkc Bvk lcdulo gvmvnto, Bvk agom tadjvgla gvmvnnc tani:kvdv:dcmsin gvbola.

²⁰ Odokkc ka:toka, dv:tak vyvngkola: anyikopc i:yyc bidtvla du:nc kinc nc:ng akonc Bvk lamkudok gva:la gcnam attar tu:bvdok gakkvto;

²¹ kapila:nc bv avdc avcm lusuto, “Ngo Bvk gcnam bomnamo:dcmci upkvpa:mvlo, ngom csa:moycku.”

²² Jisubv nge:latsuto, odokkc bvm ka:begla luto, “pcsoyoka, omcsa; nok mc:jvgdc nom aimotoku.” Odokkc oddung cdc nc:dcm aimotoku.

²³ Odokkc cdvlo Jisubv migom ager gerncdok okumdo:pc gvpv:tonc, odokkc muruli: munnckvdv:dcm ka:begtonc, odo yadkumsunc tani:kvdv:dc uru:sare:mola dungai,

²⁴ Bv luto, “Gc:ramkang; kapila:nc sc ko:ncsc simang cmpige:la yubladung.” Odokkc bulu Bvm yirka:to.

²⁵ Ckvdaggom cdvlo yadkumsunc tani:kvdv:dcm mo:ro:pc mclenamlvgtonc, Bv ara:pc gva:la bvm alagdok ri:yitto, odokkc ko:ncdc darobkang.

²⁶ Odokkc cdc agomdc appvng jilalo:pc pvngapkang.

Jisubv Miglunc Tani: Anyiko Ka:begmokunam

²⁷ Odokkc Jisubv odokkc gvnamc miglunc tani: anyikonc Bvk lcdu lcdulo gvmvnto, bottapakpc jc:la: jc:la, “Ngolum ayang aboteipcn, Dawidkc Aowa.”

²⁸ Cdvlo okumdo gva:tonc, miglunc tani:kvdv:dc bvkkolo:pc gva:to; odokkc Jisubv bulum luto, “Ngo scm ila:dag cmna nolu mc:jvgdonci?” Bulu Bvm luto, “C:lo, Ru:tuma”

²⁹ Odo Bv buluk amikkvdv:dcm ri:yitbito, scmpc lula, “Noluk mc:jvgnamdcmpc nolukkc cdcmpc ika:langka.” Odokkc buluk amikkvdv:dc darkang.

³⁰ Odokkc Jisubv bulum kvnggv:pc lulvgko luto, “Ka:langka sc:kosin cdcm kinpa:ma:yc!”

³¹ Ckvdaggom bulu gvlentoku odokkc Bvk amin gvnamc jila appv:do pvngapkang.

Jisubv Gomma:nc Tani:ko Lukinmokunam

³² Bulu gvlenna gvdokudodcm, ka:toka, gomma:nc uipa:nam tani:koncm Bvkkolo:pc gva:boto.

³³ Odokkc cdvlo uidcm mcnpaktonc, agom lula:ma:nc tani:dc agom lurobkang; odokkc yadkumsunc tani:kvdv:dc mcngabla:tomang, scmpclula, “Cdvlosin Israelso scmpinncm kangkvmangai.”

³⁴ Ckvdaggom Parisi:kvdv:dc luto, “Bv uiycm uikvdv:dok migomdokki mcnpagdag.”

Jisubv Tani:kvdv:dcm Aya:pc Mc:dag

³⁵ Odokkc Jisubv appvng nogorlo:pci gvgo:to odokkc dolungkvdv:do, odok buluk kumko okumkvdv:do luyirto odokkc Ru:ncpvnckc migom dokodok tadponc lutaddcm lugo:bito, odokkc appvng kinam ramnamcm odokkc appvng mosimola:ma:namcm aimotoku.

³⁶ Cdvlo Bv yadkumsunc tani:kvdv:dcm ka:begtonc, Bvkkc buluk lcgangc airu:pc aya:pc mc:bikang, kapila:nc bulu mc:dvrra odokkc okolo:sin gvrasukko kamangai, ka:dapnc kama:nc me:r sobenkcrcngcmpc.

³⁷ Odo Bvk agom tadjvgla gvmvnnc tani:kvdv:dcm Bv luto, “Arvgdc bojcrungko, cmpige:la ager gerncdc awum-apiongko;

³⁸ cdcmpidag kumtoka arvgdok Ru:tumdcm Bvk arvgpc ager gerncm mclvgdopc.”