METIU 26 - ANU LUGOD N. T. (BSI)

Jisumc Mokepcmna Ru:sunam

¹ Jisubv cdvlo cdc appv:dcm lungaptonc, Bvk agomtadjvgla gvmvnnc tani:kvdv:dcm Bv luto,

² “Nolu kindag lo:nyi lcdulo Gvbo:la gvnam donamtv:namdcm pvnga:du:bong, odokkc tani:kc Awodcm kuruslo pvtkedopc mcpaklvgyc.”

³ Odo dormo ager gerncdok bottarya:nc kvdv:dc odokkc tani:kvdv:dok abv:nc kvdv:dc Kaiapa: cmnam, dormo ager gernclok bottcncdok dungkodo gvkumsuto,

⁴ Odokkc Jisumc kinmango:pc ycnggappc cmna odokkc mokepc cmna ru:suto.

⁵ Ckvdaggom bulu luto, “dodotv:do so:mang, ckvma:mvlo tani:kvdv:dc urradyc.”

Jisumc Betani:do Tulang Yonnam

⁶ Odokkc Jisubv Betani:do Simon ngero-ro:namkc okumdo du:dodcm,

⁷ nc:ng akonc bvkkolo:pc kamponc vlvng ctungkolo aipc arc kanc tulangcm bomna gva:to, odokkc bv Bvk tukkudo cdcm pvrumlvgto, Bv tcbul taycngkolo tedla du:la:yam.

⁸ Cmpige:la cdvlo agom tadjvgla gvmvnnc tani:kvdv:dc cdcm ka:tonc, bulu aglvngc dungkintomang, scmpc lula, “Kapila cdcmpc to:se-to:yetonc?

⁹ Kapila:nc cdc tula:dcm murkong abaru:lok kola:ru:ya:pc, odokkc opanki:pankvdv:dcm bila:ya:pc.”

¹⁰ Cmpige:la Jisubv, cdcm kinna, bulum luto, “Kapila nolu cdc nc:dcm ge:du:n?

¹¹ Kapila:nc bv ngom kangkannc atvko ngom ibito. Kapila:nc nolu lo:dvscm opan-ki:pankvdv:dcm pa:tvyc, cmpige:la nolu lo:dvscm ngom pa:tvma:yc.

¹² Sc tula:scm ngok amvrso bv yonnvgla ngom agolo lc:nam lcgangc mosv:tobong.

¹³ Aropakpc ngo nolum lubidung, okoloi sc tadponc lutadscm lubiycnc mo:pv appv:so, bv okodcm iton cdcmsin bvm mc:pa:la lubiycpc.”

Judasbv Jisumc Mirupc Tolvgpc Togcsunam

¹⁴ Odo vyvngkola: anyidok akonc, sc:kom Judas Iskariot cmna gogdagaji,

¹⁵ dormo ager gerncdok bottarya:nckvdv:do:pc gvto odokkc luto, “Nolu ngom okkom biycn ngo Bvm nolum bila:mvlo?” Odokkc bulu bvm vyvng awumkopc murkongcm bito.

¹⁶ Odokkc odo ayirdokkc bv Bvm mirupc bipakpc cmna mago:bomkang.

Jisubv Gvbo:la Gvnamdok Donamdcm Bvk Agom Tadjvgla Gvmvnnc Tani:kvdv:dokki Donam

¹⁷ Odokkc komirang ilvgnam pitang donamdok a:pongarnc longcdo agomtadjvgla gvmvnnc tani:kvdv:dc Jisukolo:pc gva:to, scmpc lula, “Okolo ngolum no gvbo:la gvnamdok donamdcm mota:ka cmna mc:dang.”

¹⁸ Bv luto, “Nogorolo:pc tani: akorungkolo:pc gvkang, odokkc bulum lulang, ‘Luyirncdc ludag, ngok ayirdc pvnga:dandu:bong; ngo nok okumso ngok agom tadjvgla gvmvnnc tani:kvdv:dokki gvbo:la gvnamdok donamdcm doyc.’ ”

¹⁹ Odokkc agom, tadjvgla gvmvnnc tani:kvdv:dc bulu Jisubv bulum lulvgarnamdcmpc ito, odokkc bulu gvbo:la gvnamdok donamdcm mosv:to.

²⁰ Yumc ayirnammc, vyvngkolang anyi agom tadjvgla gvmvnnc tani:kvdv:dok Bv tcbuldo tedbokang;

²¹ odokkc bulu dotu:la:yam, Bv luto, “Aropakpc, ngo nolum lubidung, nolukkolok akonc ngom miru alaglo tolvgyc.”

²² Odo bulu airu:pc mc:dvramkang, odokkc Bvm ako akko:pc tawurobbomkang, “Cdc ngo:yc, Ru:tuma?”

²³ Odo Bv luto, “Sc:kobv ngok lcdulo alagcm arcmdo sumvntonc, cdc ngom miru alaglo tolvgyc.

²⁴ Tani:kc Awodok agomcm kapc adtu:nc cdcmpc gvdag, cmpige:la tani:kc Awodcm sc:ko tani:dc miru alaglo tolvgycnc cdc tani:dc mc:la mc:tapsupcnammc! Cdc tani:dokkcpc bvm omangagom aiya:ya:pc.”

²⁵ Judasbv, sc:ko Bvm miru alaglo tolvgtonc, luto, “Cdc ngo:yc, Ru:tuma?” Bv bvm luto, “No lugapto.”

Ru:tumkc Donam

²⁶ Bulu dola:tv:la du:dodcm, Jisubv pitangcm la:sa:to, odokkc, aipai bito, odokkc cdcm pentu:to, odokkc agom tadjvgla gvmvnnc tani:kvdv:dcm cdcm bige:la luto, “La:tok, dotok; sc ngok amvrc.”

²⁷ Odokkc Bv tv:nanc bati:ko la:sa:to, odokkc Bv aipai bige:la Bv cdcm bulum bito, scmpc lula,

²⁸ “Cdcm tv:toka, nolu appvngc; Kapila:nc sc lugoddok ngok i:yyc okodcm bojcru:lok pa:bkvdvngcm mc:yinsunam lcgangc pvlentonc.

²⁹ Ngo nolum lubidung ngo lckoda sc angur a:ycsokkcm tvngkuma:yc ngok Abukc migom du:tc:do noluk lcdulo anupc cdcm tv:doku longcdo:pc.”

³⁰ Odokkc cdvlo bulu Ru:ncpvnckc ni:tom abangko motonc, bulu Olib adi:do:pc gvlento.

Jisubv Pitorkc Lupakosunamdcm Luno:nam

³¹ Odo Jisubv bulum luto, “Siyumkc yumcscm nolu appvngc ngok lcga:pc invgsikor pa:yc; kapila:nc cdcm adla lc:tag, ‘Ngo mer-soben ka:sv:ncdcm dcmyc, odokkc me:r-soben kcrc:dc dugpidamsuyc.’

³² Ckvdaggom ngom darobmodakku lcdudo, ngo nolum gvpo:la Galilpc gvyc.”

³³ Pitorbv Bvm taddopc lubisuto, “Bulu appvngc nom mcpakdaggom, ngo cdvlosin mcma:yc.”

³⁴ Jisubv Bvm luto, “Aroru:pc, ngo nom lubidung, siyumkc yummarso, porogc kogmango:dapc, no ngom lcwumkopc kinmang cmna lusuyc.”

³⁵ Pitorbv Bvm luto, “Ngo nok lcdulo sipcnamgomci, ngo nom lupaksuma:yc.” Odokkc cdcmv:pc agom tadjvgla gvmvnnc tani:kvdv:dc lungapto.

Jisubv Getsemane:do Kumnam

³⁶ Odokkc Jisubv buluk lcdulo Getsemane: cmnam mo:di:kolo:pc gvto, odokkc Bv Bvk agom tadjvgla gvmvnnc tani: kvdv:dcm luto “Sido tettok, ngo o:ndo:pc gvla kumpongkapc.”

³⁷ Odokkc Bvk lcdulo Pitormclang Jebidi:kc awo anyiko gvboge:la, Bv mc:dvrbomkang odokkc mc:pomcngan kama:pc ikang.

³⁸ Odokkc Bv bulum luto, “Ngok asinsc airu:pc mc:dvrmc:so:dung, sinncmpci idung; so du:tok, odokkc darra du:tok ngok lcdulo.”

³⁹ Odokkc adjioko gvbadla Bv pogbumna kumto, “Ngok Abu, cdcm ila:ycmvlo, sc bati:scm ngokkolokkcm la:paktei; cmpidaggom, ngok mcngkamdcmpcmang, cmpige:la nok mcngkamdcmpc.”

⁴⁰ Odokkc Bv agom tadjvgla gvmvnnc tani:kvdv:do:pc gvlattoku odokkc bulum yubla du:dopc ka:toku; odokkc Bv Pitormc luto, “Cdcmpcmvlo, nolu ngok lcdulo ayir akkongkosinci darra du:la:toma:n?

⁴¹ Darra du:toka odokkc kumtoka nolum unkang ka:namc pa:ma:dopc; asindc aropakpci du:lvdag, cmpige:la adindc rcmakdag.”

⁴² Lckoda, Bv gc:rkang odokkc kumto; “Ngok Abu, cdcm ngok tv:ma:takam gc:rma:mvlo, nok mcngkamdcmpci ika:langka.”

⁴³ Odokkc Bv gvlatsulangkula bulum yubla du:dopc pa:toku, kapila:nc buluk aminkvdv:dc pole:po:seyamkangaboi.

⁴⁴ Cdcmpila, bulum lckoda mcge:la, Bv lcwumkoda gc:rto odokkc kumto, cdc gompirkvdvngv:dcm pirla.

⁴⁵ Odokkc Bv agom tadjvgla gvmvnnc tani:kvdv:do:pc gvlattoku odokkc bulum luto, “Nolu su:pakpcsinnci yubtvla du:n odokkc du:rasula du:n? Ka:tok, ayirc aninpc pvngangka:bong odokkc tani:kc Awodcm pa:pkanc tani:kvdv:dok alaglo tolvgtu:bong.

⁴⁶ Darobtok, kajc gvkangkuboi; ka:toka, ngom togclvgncdc aninsc pvnga:du:bong.”

Jisumc Ycnggabnam

⁴⁷ Bv agom lula du:dodo, Judasbv gva:to, vyvngkol anyidok akonc, odokkc bvk lcdulo bojcrungko yadkumsunc tani:kcrcngc yoksa odokkc i:dnc dangi:ycm bomna gvbola, dormo ager gernclok bottarya:nc kvdv:dokkc odokkc tani:kvdv:dok abv:nc mvjvng kvdv:dokkc.

⁴⁸ Cdcmpc mc:jvgnammcm mcpakncdc bulum kanggodko lcngkanto, scmpc lula, “Ngok dosuknamdc tani:dc; bvm ycnggablang.”

⁴⁹ Odokkc Jisukolo:pc gva:to lomdanna odokkc luto, “Kappai Ru:tuma!” Odokkc Bvm dosukto.

⁵⁰ Jisubv bvm luto, “Ajona, no kapila so du:nc?” Odokkc bulu gva:la Jisumc alagcm pigabbomto odokkc Bvm ycnggabto.

⁵¹ Odokkc ka:toka, Jisukc lcdulo du:mvnnckvdv:dok akonc Bvk alagcm ma:lento odokkc bvk madsvgdcm sadlento, odokkc dormo ager gernclok bottarya:ncdok pagbodcm pato, odokkc bvk yeru:dcm papakto.

⁵² Odo Jisubv bvm luto, “Nok madsvgdcm odok lcngkodo lc:tokuk; kapila:nc sc:kobulu madsvgcm bomdonc cdc appv:dc madsvgvngki singapycpc.

⁵³ Nolu mc:dagnci ngo:jc ngok Abumc lubisula:mang cmna, odokkc Bv vgcmpc vyvngkola: anyiko bojcyangko mimagmonc lutad lunncm mclvgdopc?

⁵⁴ Ckvdaggom cdcmpc imvlo kapc Ru:ncpvnckc agom jvggabdc jvgkamdcmpc iycn, cdc cdcmarpc idopc?”

⁵⁵ Odo ayirdo Jisubv yadkumsunc tani:kcrc:dcm luto, “Nolu Rotkutnc akoncm mcnna gvdu:ncmpci gvdu:n, madsvgkokki odokkc dangi:ycm bomla ngom sogapkapc cmna? Longgcm longgcm ngo kumko okumdo luyirla dungka, odokkc nolu ngom ycnggatomang.

⁵⁶ Ckvdaggom sc scmpc ikang, Ru:ncpvnckc agom lungornc kvdv:dok luyirnckvdv:dok lukampc iycpc cmna.” Odokkc agom tadjvgla gvmvnnc tani:kvdv:dc Bvm mcpakto odokkc dugsiamkang.

Kcba:dok Ara:do Jisubv

⁵⁷ Odokkc sc:kobulu Jisumc ycnggabtonc Bvm kayapang bottarnc dormo ager gernc kolo:pc gvbokang, okolo poyirnckvdv:dc:lang abv:nc mvjvngkvdv:dc gvkumsula dungaji.

⁵⁸ Cmpige:la Pitorbv mo:tc: mo:tcngo:pc gvmvnkang, bottanc dormo ager gerncdok lottado:pc, odokkc ara:pc gvala tekelang lcdulo odok lcdupc kapci iycji ka:pc cmna bv tedmvnkang.

⁵⁹ Cdcmpc idodcm dormo ager gernckvdv:dok bottarya:nckvdv:dc odokkc kcba:dok appv:dc lume: lunam lukancm Jisumc lunamcm mato bvmjen mokela:dopc cmna,

⁶⁰ Ckvdaggom bulu abangkosin pa:tomang, bojcrungkai lume: lula lukanbinamcm lula:daggom. Lutcrdo anyikonc gvlento odokkc luto,

⁶¹ Sc amisc ludagai, “Ngo Ru:ncpvnckc kumko okumdcm mopen morenna:dag, odokkc lowumlo cdcm motenna:dakku.”

⁶² Odokkc dormo ager gerncdc bottarya:ncdc daropto odokkc tawuto “Nokkc lulatsupcnam okkosinci kama:n? Sc tani:sc nom lugc:la lukanbinamsc okkon?”

⁶³ Ckvdaggom Jisubv aso:pc dungai. Odokkc dormo ager gernclok bottarya:ncdc Bvm luto, “Ngo nom Turra Du:nc Ru:ncpvnckolo lukansula pesula ludung, ngolum lutei no Ru:ncpvnckc Awodc Kristobv:mvlo.”

⁶⁴ Jisubv bvm luto, “No:na cdcmpc lutonc. Ckvdaggom ngo nom ludung, su:pakkolokkc nolu tani:kc Awodcm Ru:ncpvnckc lagbvgpc tedla du:dopc ka:begyc, odokkc taycngamo:tok mukkangki gvidokupc.!”

⁶⁵ Odo dormo ager gernclok bottaru:ncdc bvk gcnam attardcm bupetsuto, odokkc luto, “Bv Ru:ncpvncmc aima:nc cmna luto, kapcila ngolu su:paksin lukan bincko lagidang? Nolu Bvk aimang cmnamscm tattobong su:pak.

⁶⁶ Nolu okkomna mc:dang?” Bulu luto “Bvm mokepcnamc.”

⁶⁷ Odo bulu Bvk nappa:do takircm sukkatto, odokkc Bvm kvgto; odokkc akke pito Bvm, scmpc lula,

⁶⁸ “Ngolum lugapkvka, Kristono! Cdc kvgncdc sc:konc?”

Pitorbv Jisumc Lupaksunam

⁶⁹ Cdcmpidodcm Pitorbv lottadok moro:pc tedtu:la dungai. Odokkc ager gerya:nc ko:ncng akonc bvkkolo:pc gva:to, odokkc luto, “No:sin Galilolokkc Jisukc lcdulo dunggai.”

⁷⁰ Cmpige:la bv buluk appvngkc tadkolo lupaksuto, scmpc lula, “No okkoi cmdu:song ngo kinmangci.”

⁷¹ Odokkc cdvlo bv okumdok lottado:pc gvlentonc, ager gernc ko:ncng akoda bvm ka:to, odokkc bv ka:nckvdv:dok ru:yido du:nc tani:kvdv:dcm luto, “Sc amisc Najaretolok Jisukc lcdulo dungai.”

⁷² Odokkc lckoda bv cdcm pesodanna lupaksuto, “Ngo cdc tani:dcm kinmang.”

⁷³ Odok adjioko lcdupc ka:nc tani:kvdv:dok ru:yido du:nc tani:kvdv:dc gva:la Pitormc luto, “Aropakpc no:sin bulukkolok akonc, kapila:nc nok gompir pirdodoi nom lukanbidung.”

⁷⁴ Odokkc bv avdc pesudanna lubisuto avdc pelvgsula, “Ngo tani:dcm kinmangci.” Odokkc vgcmpc porogdc kokkang.

⁷⁵ Odokkc Pitorbv Jisukc po:pckc lunamdcm mc:pa:toku, “Porogc kogma:dapc, no ngom lcwumkopc kinmang cmna lupaksuyc.” Odokkc bv mo:ro:pc gvlento odokkc kvnggv:pc mc:dvrra kapto.