METIU 20 - ANU LUGOD N. T. (BSI)

Angur Arvgdo Ager Gerya:nckvdv:dc

¹ “Kapila:nc taycng among migom mo:pvdc okumru:tum akoncmpinnc sc:kobv rokompc bvk angur arvgdok ager gerncko makapc cmna gvpakka:ji.

² Ager gernckvdv:dokki longcdcm adoli: apirko bipc cmna lupomvnsuge:la, bv bulum bvk angurarvgdo:pc mclvgto.

³ Odokkc ko nang ayirkopc idodo gvlenna gvnamc attar koko mo:di:do akke cmmumpc du:nckonckkcm ka:to; odokkc bulum bv luto,

⁴ ‘Nolusin ngok angurarvgpc gvkang, odokkc okodcmci bipcnammcnc ngo nolum biyc.’ Cdcmpila bulu gvkang.

⁵ Ayir vyvngkolang anyiko idodo odokkc ayir aumkopc idodo bv cdcmv:pc lckoda ito.

⁶ Odokkc ayir anggoko idodo bv gvlento odokkc akkem dagla du:dopc ka:to; odokkc bv bulum luto, ‘Kapila nolu longc lo:bu:scm cmmumpc dagla du:n?’

⁷ Bulu bvm luto, ‘Kapilanc sc:kosin ngolum ager germopc gogmang.’ Bv bulum luto, ‘Nolusin ngok angurba:riolo:pc gvkang.’

⁸ “Odokkc yumc ayir a:namc, angur arvgdok ru:tumdc bvk ka:ya:moya:ncdcm luto, ‘Ager gerya:nckvdv:dcm goga:tok odokkc buluk gerrc murkong kvdv:dcm bitok, lcddarkodokkc biya:bomna gerangarpo:ncdo:pc.’

⁹ Odokkc cdvlo cdc ayir vyvng anggoko germonamkvdv:dc gva:tonc, appv:dc adoli: apir apirko pa:to.

¹⁰ Cdcmpidodo gerangarpo:ncdc gva:dodo, bulu mc:tungai bulu bojcyangko pa:ycpc; ckvdaggom buluk appv:dc adoli: apir apirongko pa:to.

¹¹ Odokkc cdcm pangge:la okumdok ru:tumdcm aglv:la bvn-bvnaikang, scmpc lula,

¹² ‘Cdc lcddarkcdc ayir akkongko gerka, odokkc no bulum ngolugvng kvddvkko pa:moto sc:kobulu longc lobu:dok jo:pcnam jo:to odokkc do:nycsin kangkcrcpto.’

¹³ “Ckvdaggom bv bulukkolok akoncm lubito, ‘Ajona, ngo nolum oko imurcmsin imang; nolu adoli:k togcsumangalang?

¹⁴ Okodc nokkcnc cdcm la:tok, odokkc gvkangkuk; Ngo lcddarkcscm nolum bikamdcmpc bipc cmna bilv:to.

¹⁵ Okko ngokkc du:nc cdcm mcngkamdcmpci ipa:ma:lang? Cdcmanggom no ngo ammem ainc agerko ibinamdcm amikdvgdagnci?

¹⁶ “Cdcmpila lcddarkcdc gvpongaryc, odokkc gvpongarncdc lcddaryc.”

Jisubv Bvk Sinam Agomdcm Lcumpc Lunam

¹⁷ Odokkc Jisubv Jerusalempc gvdodcm Bv agom tadjvgla gvmvnnc tani: vyvngkolang anyidcm angupc gvyodboto, odokkc lambcdo Bv bulum luto,

¹⁸ “Ka:tok, ngolu Jerusalempc gvdag; odokkc tani:kc Awodcm kumnam ager gergcbonc kvdv:dcm odokkc poyirnckvdv:dok alaglo tolvgyc, odokkc bulu Bvm mokepcnamc cmna aima:pc lulvgyc,

¹⁹ Odokkc angu tani: opvnno moki: moatdopc lulvgyc odokkc somotangkokki dcmyc odokkc kuruslo mokeyc, odokkc Bvm lowum longcdo moturycku.”

Anc Akonclok Kumna:sola Lurcnam

²⁰ Odo Jebedi:kc awokvdv:dok ancdc Bvkkolo:pc gva:to, bvk awokvdvmdcm gvbola, odokkc Bvk kcra:lo lcbvng tuma:la bv kumna o:kaiko Bvkkolok koto.

²¹ Odokkc Bv bvm tauto, “No okoko madu:n?” Bv Bvm lubito “Lulvgteipcn sc ngok awo anyiscm, nok lagbvgpc akonc odokkc lakkepc akonc teddopc, nok migom du:tcng mo:pvdo.”

²² Cmpige:la Jisubv lubito, “No okkom kodu:song no kinmang. Oko tv:nancdo ngo tv:ycnc cdcm nolu tv:nala:pcyc?”

²³ Bvm bulu luto, “Nolu ngok tv:nancdokki tv:yc, ckvdaggom ngok lagbvkpc odokkc ngok lakkepc tedmonamdcm ngok luscgla:nammang ckvdaggom cdc sck lcgang ngok Abubv mosv:la lc:tagnc odokbulukkc.”

²⁴ Odokkc cdvlo angu vyv:dc cdcm tattonc, bulu cdc bvrokumsudcm aglv:la dungkinma:pc ikang.

²⁵ Ckvdaggom Jisubv bulum Bvkkolo:pc goga:to odokkc luto, “Nolu kindag Ami ope:kvdv:dok ru:tumdc buluk tayc:lo ru:tumpc idag, odokkc buluk bottcnc tani:kvdv:dc ilanggvlangcm bulum lcngkandag.

²⁶ Cdc noluk ara:lo ima:jc; ckvdaggom sc:kobvi noluk ara:lo bottcncpc iycnc bv noluk pagbopc ipa:ru:yc,

²⁷ Odokkc sc:kobvi gvpongarncpc iycnc bv noluk ager gerya:ncpc ipa:ru:yc;

²⁸ Cdcmyam tani:kc Awodci ila:sa:la bikosukapcmang ikasangkapc gvto, odokkc Bvk turnamcm bojcrungcm rclatnakupc cmna bikapc gvka.”

Jisubv Miglun Tani: Anyiko Ka:begmokunam

²⁹ Odokkc bulu Jeriko dokkc gvkunammc bojcrungko tani:yc yadla Bvkkolo:pc gva:to.

³⁰ Odokkc ka:toka, miglunc tani: anyikonc ali:lambc ru:yido tedtu:la dungai, cdvlo bulu tadbegtonc Jisubv:jc odok gvpatla gvdag cmna, jc:la gogto, “Ngolum aya:teipcn, Dawidkc Auwa!”

³¹ Yadkumsunc tani:kvdv:dc bvnyim ge:tumto, bulum aso:pc du:toka cmna; ckvdaggom bulu bottaya:pc jc:to, “Ru:tuma ngolum aya:teika, Dawidkc Auwa!”

³² Odokkc Jisubv du:tedto odokkc bulum gogto, scmpc lula, “Ngo noluk lcga:pc okkom iteika cmna mc:dang?”

³³ Bulu Bvm luto, “Ru:tuma, ngoluk amikkvdv:dcmsin darmoteikuka.”

³⁴ Odokkc Jisubv ayang-abola buluk amikkvdv:dcm riyitbito, odokkc oddung bulu ka:begamkangku odokkc Bvk lcdulo gvmvnamkangku.