METIU 15 - ANU LUGOD N. T. (BSI)

Ta:to Ya:yokvdv:dok Agom Poyir

¹ Odo Parisi: kvdv:dc odokkc porinc kvdv:dc Jisukolo:pc Jerusalemdokkc gva:to odokkc luto,

² “Kapila nok agom tadjvgla gvmvnnc tani:kvdv:dc ta:to-ya:yok longcdok igodgvgoddcm tadma:pc ibat-siyatdang? Kapila:nc bulu cdvlo dodonc buluk alagkvdv:dcm vrpu:sumang.”

³ Bv bulum lubito, “Odokkc kapila nolu Ru:nckc kvnggv:pc lunamcm tadma:pc ibat-siyatdang noluk ta:toya:yokc longcdok igodgvgod lcgangc?

⁴ Kapila:nc Ru:ncpvncbv kvnggv:pc luto, ‘Nok abudcm odokkc nok ancmc mcnggcsunamcm ilangka,’ odokkc, ‘Sc:kobv abbom cdcmanggom anncm aima:nc agomcm luycnc bvm simoru:langka.’

⁵ Ckvdaggom nolu ludo, ‘Sc:koiyc bvk abudcmmangom bvk ancdcm luyc, Nolu ngokkolok okodcm pa:pcnamma:nc Ru:ncpvncmc bitung, bv bvk abudcm mcnggcnam ipcnam kamang.’

⁶ Cdcmpidag noluk ta:toya:yokc longcdok igod gvgoddok lcgangc, nolu Ru:nckc agomcm mcpakto.

⁷ Nolu kcvgpc asin mcngunc kvdvngc! Isaia:bv Ru:ncpvnckc agomcm lungordodcm airu:pc luto noluk agomcm, cdvlo bv lungorkaji!

⁸ “Tani:kvdv:dc nabberkokki ngom mcngcsudag, ckvdaggom asinkvdv:dc ngokkolokkc airu:pc mo:tcdag.

⁹ Atvkosin ima:nc kumnamcm ngom bulu kumdag, tani:kvdv:dc lungorkvdv:dcm Ru:ncpvnckc agom cmna poyirdag.”

Tani: Akoncm Narc:ma:pc Imonc Attarkvdvng

¹⁰ Odokkc Bv tani:kvdv:dcm bvkkolo:pc goga:to odokkc bulum luto, “Tattoka odokkc mcngkintoka:

¹¹ Nap pa:dok gva:ncdc:mang tani: akoncm narc:ma:pc imoncdc, cmpige:la nappadok okodc gvlendagnc, cdc tani: akoncm narc:ma:pc imodag.”

¹² Odo agom tadjvgla gvmvnnc tani:kvdv:dc gva:to odokkc Bvm luto, “No kindag Parisi:kvdv:dc:jc cdc lunamdcm taddodcm aima:p mcngkang cmna?”

¹³ Bv lubito, “Ngok Taycng among Abukc lema:nam sa:lennc vsvng amvng appv:dcm bupakycku

¹⁴ Bulum atcro:pc gvmotok; bulu miglunc gvgcbonnc. Odokkc miglunc tani: akonc miglunc tani:akoncm gvbomvlo, anyipakdc jiko:lo owa:yc.”

¹⁵ Ckvdaggom pitorbv luto Bvm, “Kvlenkva:la kvkanbila kvnam do:yv:dcm kvteipcn.”

¹⁶ Odokkc Bv luto, “Nolusinnci su:paksin mcngkinsuma:dan?

¹⁷ Nolu ka:begma:lang nappa:dok gva:nc appv:dc aki: ara:pc pvnga:dag cmna, odokkc cdcmpc gvbadbomdag cmna?

¹⁸ Ckvdaggom nappa:dok okodc lendagnc cdc asinbokkc lennc, okodc cdc tani: akoncm aima:pc imodag.

¹⁹ Kapila:nc asin ara:bokkc aima:nc mc:nam sagnamc lendag, tani: mokenammc, ami nc:ngcm la:namc amilo gvma:dapc ika:mvnsunammc, dopso:nammc, yadla lubisunamc, aima:pc luka:nam.

²⁰ Cdcbuluna okodc tani:akoncm narc:ma:pc imoncdc; cmpige:la lasugcm suma:pc donamdc tani:akoncm narc:ma:pc imomang.”

Nc:ng Akolok Mc:jvg

²¹ Odokkc Jisubv odokkc gvpakto odokkc Ti:rdo:pclang Sidon jilado:pc gvpakto.

²² Odokkc ka:toka, Kananolok nc:ngko odo mo:takdokkc gvlento odokkc jc:la luto, “Ngom aya:pcmc:teika, O: Ru:tum, Dawidkc aowa: ngok omcdcm aima:ru:pc uikonc pa:to.”

²³ Ckvdaggom agom apirkosin bv lubitomang. Odokkc Bvk agom tadjvgla gvmvnnc tani:kvdv:dc gva:to odokkc Bvm kumna luto, scmpc lula, “Bvm mclvgtokuk, kapila:nc bv ngoluk lcdu lcdulo jc:la jc:la gvmvndo.”

²⁴ Bv lubito, “Ngom Israel okumdokkc yognc bera sobenong-kvdv:do:pc mclvgtag.”

²⁵ Ckvdaggom bv gva:to odokkc Bvk kcra:do lcbvng tuma:to, scmpc lula, “Ru:tuma, ngom ka:teibong.”

²⁶ Odokkc Bv lubito, “Ko:kangkvdv:dok pitangcm langge:la ikikvdv:dcm crbinamdc ainc agommang.”

²⁷ Bv luto, “C:lo, Ru:tuma, ckvdaggomci iki:kvdv:dc Ru:tumdok tcbuldok dopitnam pitangkvdv:dcm dobegdag.”

²⁸ Odo Jisubv bvm lubito, “C:lo ambvra, nok mc:jvgdc bottcru:dag! Cdcm nok mcngkamv:dcmpc ika:langka.” Odokkc oddung bvk omcdcm csa:motoku.

Jisubv Bojcrungko Tani:ycm Csa:mokunam

²⁹ Odokkc Jisubv gvtvla gvto odokkc Galil siycng ru:yipc pv:to. Odokkc Bv adi: tayc:pc re:sa:to, odokkc tedtu:to.

³⁰ Odokkc bottcru:nc yadkumsunc tani: kcrcngko Bvkkolo:pc gva:to, buluk lcdulo lambc gvla:ma:ncm, lcsu:lcbe:nckvdv:dcm, miglunckvdv:dcm, odokkc bojcrungcm, odokkc bulum Bvk alc kcra:do:pc gvangamlvgto, odokkc Bv bulum csangammotoku.

³¹ Cdcmpidodcm tani: kcrc:dc mc:lamcngapla:tomang, cdvlo bulu ka:tonc agom lula:ma:nckvdv:dc lulangkangku, lcsulcbe:nc kvdv:dcm aimotoku, lambc gvla:ma:nc kvdv:dc gvlangkangku, odokkc miglunvkvdv:dc ka:begkangku; odokkc bulu Israeldok Ru:ncpvncdcm kumna aipai bito.

Jisubv Lv:ying Appi:ko Tani:ycm Domonam

³² Odo Jisubv Bvk agom tadjvgla gvmvnnc tani:kvdv:dcm Bvkkolo:pc goga:to odokkc luto, “Ngokkc yadkumsunc tani:kvdv:scm ayang-abbo dung, kapila:nc bulu ngok lcdulo du:mvnnammc su:pak longc loumkopc ika:bong, odokkc donamc okkosin kama:bong; odokkc bulum kcnotvlv:motu:la mclvglvngkumang, kapcji ila bulu lambolo opek-oyegyc.”

³³ Odo agom tadjvgla gvmvnnv tani:kvdv:dc Bvm luto, “Okolok ngolu pv:namkopc pitangko pa:ycn sc sulli:sok sokkvddvnc bottanc yadkumsunc tani:kvdv:scm domopc?”

³⁴ Odokkc Jisubv bulum tawuto “Nolukkc cddvko pitangc du:n?” Bulu lubito, “Kvnvdko, odokkc ongo asudowko.”

³⁵ Odokkc yadkumsunc tani:kvdv:dcm amo:do tedtungamdopc lulvgge:la:yam,

³⁶ Bv pitang kvnvddcm odokkc ongodcm la:to, odokkc kumna aipai cmge:la Bv cdcmbulum tani:kvdv:dcm bito, odokkc agom tadjvgla gvmmvnnc tani:kvdv:dc yadkumsunc tani:kvdv:dcm bito.

³⁷ Odokkc bulu dola:tv:la dotvngamsukang; odokkc dongatkvdv:dcm gempa kvnvdkopc penpornammcm jo:sa:suto.

³⁸ Cdc donc appv:dok milbong tani:ongc lv:ying appi:kai, nc:ngkvdv:dcm odokkc ko:kang kvdv:dcm lumango:pci.

³⁹ Odokkc yadkumsunc tani: kvdv:dcm mclvgamge:kula, Bv ollung ara:do angkang odokkc Magadan mo:di: dungo:ycgo:pc gvkang.