METIU 11 - ANU LUGOD N. T. (BSI)

Jo:nkolokkc Gvla Agom Lutadnc

¹ Odokkc cdvlo Jisubv vyvngkola:anyi agom tadjvgla gvmvnnc tani:kvdv:dcm luyir lungaptonc, bv odokkc poyirkapc odokkc lutadkapc buluk nogorkvdv:do:pc gvkang.

² Cdcmpc idodcm cdvlo Jo:nbv makana:lokkc Kristokc ager gernamkvdv:dcm tattonc, bv avkc agom tadjvgla gvmvnnc tani:ckkcncm mclvgto odokkc bvm luto,

³ “Novi bv:n sc:ko gvpcncdcnc, cdcma:mvlo ngolu akoda ka:la toya:ycnci?”

⁴ Odo Jisubv bulum lubito, “Gvkang odokkc nolu okkom tattonc odokkc ka:tonc lubilang:

⁵ miglunckvdv:dc ka:begdungku odokkc lambcgvla:ma:pc ngedgo:nckvdv:dc gvla:dungku, ngero:-ro:namkvdv:dc narcngkangku odokkc ru:benckvdv:dc tadbegamkangku, sinckvdv:dcm turabmodungku, odokkc opankvdv:dcm tadponc lutaddcm lubidung.

⁶ Odokkc sc:kobv ngok gvkolo gvnyi:ma:ycnc bv akirba:d pa:nc.”

⁷ Bulu odokkc gvkunammc, Jisubv yadkumsunc tani:kvdv:dcm Jo:nkc agomcm lurobbombikang: “Nolu okkom kangkapc yumrangolo:pc gvlenkan?

⁸ Csarc yuku:nam luiyangkvdv:dcmnci? Kapila cmpcmvlo nolu gvlenkan? Rcmakpc attar gcnc tani: akoncm kangkapcnci? Ka:toka, sc:kobulu rcmaknc attarcm gcdonc bulu migomlok okumno du:do.

⁹ Nolu kapila cmpcmvlo gvlenkan? Agom lungorla lunc tani:koi kangkapc? C: ngo nolum lubidung, odokkc agom lungorla lunncmyamsin bottaya:ncko.

¹⁰ Cdc bv:ai sc:kokc agomcm adla lc:tagnc, ‘Ka:toka, ngo ngok agom lutadncm nok nappangcm lupo:dopc mclvgdo, sc:kobv nok lambcm nom gvpo:la mopu:bidonc.’

¹¹ “Aropakpc, ngo nolum lubidung, nc:ngkvdv:dok onamlok Jo:n Baptismo bincmc bottaya:nc akosin oma:da; ckvdaggom taycng amo:tok adjiyarya:ncdc bvmyam bottarya:nc.

¹² Jo:n Baptismo binckc longckvdv:dokkc silolo:pc taycng among migom amo:dc ipusire:ycm pa:dung, odokc ipusire:ycm inc tani:kvdv:dc bo:lkokki cdcm la:dag.

¹³ Kapila:nc appvng agom lungorla lunam kvdv:dcm odokkc lujvglurokvdv:dcm Jo:nkc longcdo:pc luto;

¹⁴ odokkc nolu torvgsulv:dagmvlo cdcm, bv Elia:bv sc:kobv gvpcncdc:nc.

¹⁵ Sckkc tannanc yerungc du:nc bvm tadmotoka.

¹⁶ “Ckvdaggom okokokki ngo sc appv:scm luyv:suycn? Sc ko:kangckkc attar koko-rckodo dunge:la buluk gvjonkvdv:dcm gogsuma:namcmpc idag,

¹⁷ ‘Ngolu nolum bangsi:ycm mudbito, odokkc nolu so:tomang; ngolu kabancm banto, odokkc nolu mc:dvrra angkcngcm pisula kabtomang.’

¹⁸ “Kapila:nc Jo:nbv gvto dotosinmang tv:tosinmang, odokkc bulu ludag, ‘Bvkkc ui ako dung;’

¹⁹ Tani:kc Awodc gvla doto odokkc tv:to, odokkc bulu ludag, ‘ka:tok, dorvncko odokkc kvngv:pc apo:tv:ncko, migom murkong urkumsunckvdv:dok odokkc papi:kvdv:dok ajonc!’ Ckvdaggom ainc agomdc Bvk agerkvdv:dokki aidag cmna ludo.”

Mc:jvma:nc Tawonkvdvng

²⁰ Odo Bv oko oko nogorkvdv:do botta bottaru:nc agerkvdv:dcm gerkanc cdcmbulum luke-lumarra lurobbomkang, kapila:nc lcga:dc bulu mc:dvrra mc:sula asinc mc:latsutokumang.

²¹ “Nolukkc mc:dvrpcnamc, Korajinkvdvnga! Nolukkc mc:dvrpcnamc, Betsaidanga! Kapila:nc nolukkolo bottaru:pc gernam agerkvdv:dcm Ti:rc odokkc Sidondo gerya:mvlo, bulu bojcrungko po:pcbong asinc mc:dvrra mcngkutsuyyangkupc toilang gaincm gcge:la odokkc mcdbulo dungge:la.

²² Ckvdaggom ngo nolum lubidung, bottcru:nc kcba:ba:doku longcdo Ti:rdc:lang Sidondokkcpc du:jcmna du:poya:ycpc nolukkcmyam.

²³ Odokkc nolu Kapernauma, nolu taycng amo:pc jo:sangkunampc iycn? Nolu sinckvdv:dok amo:bo:pc joletlvgpcnammcyc. Kapila:nc bottaru:nc agercm nolukkolo gernamkvdv:dcm sodumdo gerya:mvlo, silopc cdc du:tvya:pc.

²⁴ Ckvdaggom ngo nolum lubidung cdc bottapaknc kcbang longcdo nolukkcmyam Sodum amo:dokkcpc du:jcmla du:la:ya:ycpc!”

Ngokkolo:pc Gva:la Du:rasuta:ka

²⁵ Odo ayirdo Jisubv lutadla lubito, “Ngo nom aipai bido, Ba:ba, taycng amo:tok odokkc mo:pvsok Ru:tuma, no:na scmbulum kinnc-pa:nc tani:kvdvdokkcm odokkc mcngkinma:nc kvdv:dokkcm lc:sitonc odokkc kowaukvdv:dcm lcngkanto;

²⁶ C: Ba:ba, kapila:nc cdcmpci nok ayang-abonc asin mc:namdc.

²⁷ “Appvng attcm ngok Ba:bukokki ngokkolo:pc bitag; odokkc sc:kosin Ba:budcm kinmang Awodc:ma:mvlo odokkc akoncm sc:kom Awodc bvm lcngkanpc cmna balenna bama:mvlo.

²⁸ “Ngokkolo:pc gva:toka, appvngc sc:kobulu airu:pc mc:dvrra mc:tapsula du:nckvdvnga, odokkc ngo nolum mc:rasukkom biyc.

²⁹ Ngok jungoli:ycm nolu tulvgsutok, odokkc ngokkolokkcm luyir-poyirnammcm torvgsutok; kapila:nc ngo ainc odokkc asinc rcmagnc tani:yc, odokkc noluk yalokvdv:dok lcga:pc du:rasukkom pa:ycpc.

³⁰ Kapila:nc ngok jungo:li:dc rcmagdag, odokkc, ngok jo:namdc:sin cssa:dag.”