MARKKC 6 - ANU LUGOD N. T. (BSI)

Najaretdo Jisumc Lupakto

¹ Bv odokkc gvpaktoku odokkc Bv avkc do:lu:do:pc gvtoku; odokkc Bvk agom tadjvgla gvmvnnc tani:kvdv:dc Bvk lcdulo gvmvnkang.

² Odokkc ager germa:pc yodla du:nam longcdo Bv kumko okumdo luyirrobomkang; odokkc bojcrungc sc:kobulu Bvk luyirdcm tattonc mc:la mcngapla:ma:pc ikang, scmpc lula, “Sc tani:sc okolokkcm sc appv:scm pa:doncm? Oko mc:jong agomcm Bvm bitu:ncm? Kapin botta bottan agercm Bvk alagki gerla:dopc itu:ncm!

³ Sc vsvngki modun moncdc:ma:lang, Meri:kc awodc odokkc Jakobkc, Josepkc, Judangkc odokkc Simon buluk bvrodc, odokkc Bvk bvrrangkvdv:dc ngoluk lcdusc du:mvnma:lang?” Odokkc bulu Bvm aima:nc ager gernckop ka:to.

⁴ Odokkc Jisubv bulum luto, “Ru:ncpvnck agom luno:nc tani:dcm mcnggc ima:pc ima:nammc kamang, avkc amo:do:ma:mvlo, odokkc avkc bvk okumdo:ma:mvlo.”

⁵ Odokkc Bv odo mcngapla:ma:nam agercm gerla:tomang, kinc tani: anyi awumo:ko alakki riyidbila aimokunamdok angupc.

⁶ Odokkc Bv buluk mc:jvma:namkokki mcngapla:tomang. Odokkc Bv do:lungkvdv:do luyir luyirla gvbomkang.

Jisubv Agom Tadjvgla Gvmvnnc Vyvngkolang Anyidcm Mclvgnam

⁷ Odokkc Bv vyvngkolang anyidcm Bvkkolo:pc gogto, odokkc bulum anyi anyipc mclvgrobbomkang, odokkc bulum aima:nc yalokvdv:dcm mcnpakla:dopc ilang-gvlangcm bito.

⁸ Buluk gvgo:la gvdodcm lcdudo lakoti: asongdok anguko okkomsin bomyoka cmna kvnggv:pc lusv:to; odokkc pitangcm bomma:pc, sogcncm bomma:pc, buluk vgvnkvdv:do murkongcm bomma:pc;

⁹ cmpige:la lcyugcm gcge:la odokkc lcbv:bo:pc pv:nc galugcm bornyikopc bomma:pcka cmto.

¹⁰ Odokkc Bv bulum luto, “Okoloi nolu okum crangkolo gva:ycnc, oddung du:lang cdc mo:di:dcm mcma:dodo:pc.

¹¹ Odokkc nolum oko dungkolo:sin torvgsuma: ycmvlo odokkc bulu nolum tadge:mang cmna luycnc nolu gvdokudodcm, noluk alckvdv:do du:nc koiyang kvdv:dcmsin pipu:sulang buluk agom lukampc tadma:nc kvdv:dok lcgangc.”

¹² Cdcmpc bulu gvkang odokkc tani:kvdv:dc asinc mc:dvrra mcngkutsula gvlatkupcnammc cmna luyirgo:to.

¹³ Odokkc bulu bojcrungko uiycm mcnpagamto, tulangki ri:yidla bojcrungko ramnckinncm csa:motoku.

Jo:n Baptismo Binckc Sinam

¹⁴ Migom Herodbv cdcm tadbegto; kapila:nc Jisukc amindc gvbungkang. Akke luto, “Jo:n baptismo bincmc sikolokkcm turmotakku; cdcmpila:mvn cdc ilang gvla:nam kvdv:dc Bvkkolo papidu:nc.”

¹⁵ Cmpige:la akke luto, “Cdc lungor luncko, mcnying konyingkc lungor lunckvdv:dok akoncmpc innc.”

¹⁶ Cmpige:la Herodbv cdvlo cdcm tattonc bv luto, “Jo:nbv, sc:kom ngo mittukdcm papvrtonc, bvm turmotoku.”

¹⁷ Kapila:nc Herodbv mclvgla Jo:nmc ycnggapmoka, odokkc Herodiangkc lcgangc makana:lo tumka, bvk bvro Pilipkc nc:dc; kapila:nc bvm bv midang moka.

¹⁸ Kapila:nc Jo:nbv Herodmc luto “Nok bvrodok nc:dcm la:namdc lujvg luro lukamdcmpc imang. Lujvg luro lukamdcmpc nok bvrdok nc:dcm nokkcpc la:pa:mang.”

¹⁹ Odokkc Herodia:bv bvm mc:nyingko dungkang, odokkc bvm mokepc mc:to.

²⁰ Ckvdaggom bv mokela:toma, kapila:nc Herodbv Jo:nmc pcsokang, bv dormokancko odokkc angunnc tani:ko cmna kinna:yam, odokkc bvm atvkosin ima:dopc mc:to. Cdvlo bvk agomcm bv tadbegtonc, bv aipakpc mcngkin mc:para:tomang; odokkc ckvdaggom bv mc:po:pc bvk agomcm tatto.

²¹ Ckvdaggom iposiyanko pa:to cdvlo Galildo bottc bottcnc tani:kvdv:dcm opislo ager gernckvdv:dcm odokkc migom dungkodo Herodbv bottcnc donam tv:namko bvk onanc longcdo bidodcm.

²² Kapila:nc cdvlo Herodia:kc omcdc songkapc gvlentonc, bv Herodmc odokkc bvk mibokvdv:dcm mc:pomoto; odokkc migom ko:ncdcm luto, “No okkomci madonc ngokkolok matoka, odokkc ngo cdcm biyc.”

²³ Odokkc bv bvm pesubila luto, “Okodcmci no bi:ka cmna ngokkolok maycnc, ngo nom bipc, cddo:mang ngok migom donam amo:sogci kvdvsukopc.”

²⁴ Odokkc bv gvlenkangku, odokkc bvk ancdcm luto, “Ngo okkom koycn?” Odo bv luto. “Jo:n Baptismo binckc mittukdcm.”

²⁵ Odokkc bv oddung migomdo:pc lomdanna gva:toku, odokkc koto, scmpc lula, “No ngom mcna:pc Jo:n baptismobinckc mittukdcm arcm aborkolo bi:ka cmna mc:dag.”

²⁶ Odo migomdc cmpc aipakpc mc:dvrkang; ckvdaggom bvk pesubinamdokki odokkc bvk mibokvdv:dokki bvm bvk agomdcm luyotlv:tokumang.

²⁷ Odokkc oddung migomdc mimag monc ako sontori:kvdv:dokkcm mclvgto odokkc bvk mittukdcm boma:dokupc lulvgto. Bv gvto odokkc makana:do bvk mittukgcm papvrto,

²⁸ odokkc bv tukkudcm arcmkolo boma:bito, odokkc ko:nc:dcm cdcm bito; odokkc cdc ko:ncdc bvk ancdcm bito.

²⁹ Cdvlo bvk agom tadjvgla gvmvnnc tani:kvdv:dc cdcm tadbegtonc, bulu gva:la bvk amvrdcm la:toku, odokkc cdcm agokolo lc:to.

Jisubv Lv:ying Anggoko Tani:ycm Domonam

³⁰ Agom tadjvgla gvmvnnc tani:kvdv:dc Jisukolo:pc gvlattoku, odokkc buluk inam appv:dcmlang luyirnamkvdv:dcm Bvm lubitoku.

³¹ Odokkc Bv luto bulum, “Ronggampcsam cmnc dungko kolo:pc nolu avyc gvlenna gvtok, odokkc adjio:ko du:rasutok.” Kapila:nc bojcrungc gvtvla odokkc gvlatlangkula dungai, odokkc bulu bulukkc donanc du:rasunanc ayirkosinci kamangai.

³² Odokkc bulu olludokki bullong ronggam pcsampc dungkolo:pc gvto.

³³ Cdcmpidodo buluk gvnamcm bojcrungc ka:to, odokkc bulum kindagai, odokkc bulu nogor appv:dokkc dungkodo:pc alckokki dugamkang.

³⁴ Bv siycng asi ru:yido:pc gvlennammc bottcru:nc yadrumbomnc tani:kcrcngko ka:begto, odokkc Bv bulum airu:pc ayang-abopc mcngkang, kapila:nc bulu ka:sv:nc kama:nc me:r sobencmpc idagai; odokkc bulum Bv bojcrungko agomcm luyirrobbomkang.

³⁵ Odokkc longcdc gvngappc cmna inamc, Bvk agomtadjvgla gvmvnnc tani:kvdv:dc Bvkkolo:pc gva:to odokkc luto, “Sc ronggam pcsamnc dungkoko, odokkc su:pak ayirc kama:bong;

³⁶ bulum mclvgtokukai, dungo:ycgosok do:lungkvdvngolok gvla dopcnamko bulu avkvdv:dc rcsudopc.”

³⁷ Cmpige:la Bv bulum lubito, “Nolu o:kaiko dodopc bitok.” Odokkc bulu luto Bvm, “Ngolu gvla lvngko anyi adoli: arckopc pitangcm dodopc biycnci.”

³⁸ Odokkc Bv bulum luto, pitangc nolukkc cddvko du:n? Odokkc cdvlo bulu gvla pa:tonc, bulu luto, “Borngoko, odokkc ongo pirnyiko.”

³⁹ Odo Bv bulum appv:dcm lckko:pc asum asumpc genc ncsin tayc:do tedtungamdopc lulvgto.

⁴⁰ Cdcmpila bulu asum asumpc tedtu:to, lvngko lvngkopcla: yi:ngo yingopc.

⁴¹ Odokkc pitang borngodcmlang ongo pirmyidcm langge:la Bv taycng amo:pc ka:sa:to, odokkc luyitko luto, odokkc pitangkvdv:dcm pentungamto, cdcmbulum agom tadjvgla gvmvnnc tani:kvdv:dcm ordopc bito; odokkc Bv ongo pirnyidcmsin buluk appv:dcm orpansubito.

⁴² Odokkc bulu appv:dc dola dotvngamsukang.

⁴³ Odokkc bulu gempa pvyingkolang pvnyi bi:nc bi:nckopc pentu:namkvdv:dok odo ongodok jo:sa:suto.

⁴⁴ Odokkc cdc sc:kobulu pitangkvdv:dcm dotonc lv:ying anggokai.

Jisubv Asitalc:dok Lambc Gvnam

⁴⁵ Oddung Bvk agom tadjvla gvmvnnc tani:kvdv:dcm Bv ollu:do a:moto odokkc kekonolo:pc Bvm gvpo:la gvdopc mclvgto, Betsaida:pc, yadkumsunc tani:kvdv:dcm mclvgamdokudcm.

⁴⁶ Odokkc Bv bulukkolokkc mcpansuge:la, Bv adi:do:pc kumkapc re:sangkang.

⁴⁷ Odokkc yumc ayir a:namc, ollu:dc siycng asi arangolo dungai, odokkc tcmpvdo Bvk atcrc dungai.

⁴⁸ Odokkc Bv ka:to bulu ollung kongkolo kvnggv:pc kongung konga:ma:pc idungai, kapila:nc buluk ko:pckodokkc csardc yulatsudagai. Odokkc yumc yorang appi:kvramdo Bv bulukkodopc gvto, siycng asidok alckokki gvla. Bv bulum gvbadla gvpc cmna mc:tungai,

⁴⁹ Cmpige:la bulu Bvm siycng asidok gvdopc ka:begnammc bulu mc:to cdc uiko, odokkc jc:taksuto;

⁵⁰ Kapila:nc bulu appv:dc Bvm ka:begto, odokkc pcssamkang, cmpige:la Bv vgcmpc bulum luposuto odokkc luto, “kvnggv:tok, ngo:mvn sc; pcsoyok.”

⁵¹ Odokkc Bv buluk lcdulo ollu:do a:to odokkc csardc yungasukang.

⁵² Odokkc bulum kvnggv:pc mcngkin mc:para:tomang, kapila:nc bulu pitangkvdv:dok agomcm mcngkintomang odokkc, cmpige:la buluk asinkvdv:dc torkangc:dan.

Jisubv Gennesaretdo Csa:ma:ncm Csa:mokunam

⁵³ Odokkc cdvlo bulu kongko:tonc, bulu Gennesaret amo:do:pc pv:tonc, odokkc ru:yido:pc konga:to.

⁵⁴ Odokkc bulu ollu:dokkc gvlenammc, bagcmpc tani:kvdv:dc Bvm kangkinamto,

⁵⁵ odokkc kcra:dok du:bosunam appv:dc dugamla mola:ma:nc kinctani:kvdv:dcm buluk jo:nanckvdv:dokki Bv okoloi dungaji jongangam bomto.

⁵⁶ Odokkc Bv okoloi gva:tonc, do:lungkvdv:do, nogorkvdv:do, cdcmanggom do:lung pomkonkvdv:do, bulu ramnc kinncm attar koko amo:lo:bulu jonga:bombito, odokkc Bvk gcnam attar tu:bvdogci gakkvpc cmna Bvm kumna luto; odo cdvkonc gakkvtonc cdc appv:dc csangamkangku.