MARKKC 14 - ANU LUGOD N. T. (BSI)

Jisukc Birudi:pc Tarung Ru:nam

¹ Gvbadla gvnamdok odokkc Komirang ilvgma:pc donam tv:nam longcdok lo:nyiko po:pai cdc. Odokkc dormo ager gergcnc kvdv:dok bottarya:nc kvdv:dc odokkc ainc agom poyirnckvdv:dc Bvm kinmango:pc, odokkc Bvm mokepc cmna mago:la dungai;

² Kapila:nc bulu luto; “Dodo tv:dodo:mang, ckvma:mvlo odo tani:yc urradamyc.”

Betani:do Jisumc Tulang Yonnam

³ Odokkc Betani:do Simon ngero ro:namkc okumdo Bv cdvlo dungaji, Bv tcbuldo dunga:nammc, nc:ng akonc kampotiti:nc vlvng ctungkolo narcngo:nc namponc tulangcm bomla gva:to, kcrangardo:pc, odokkc bv ctu:dcm dcmporge:la Bvk tukkudo cdcm pvrumlvgto.

⁴ Cmpige:la odo sc:ko sc:koi dungaji sc:kobulu ayv ayvkvdv:dc aglvng sa:la lusangkang,

⁵ “Kapila cdc yonsunamdcm pvse pvyetoncm? Kapila:nc cdc yonsunamdcm lvngko awum dv:tak takbu:lok ager gerrcla pa:nam murkong arclok kola:ya:pc, odokkc opankvdv:dcm orra:ya:pc.” Odokkc bulu bvm ge:rvdla luto.

⁶ Cmpige:la Jisubv luto, “Bvm atcro:pc mclvgtokuk; kapila nolu bvm ge:dun? Bv airu:pc ainc agerko ngom gerto.

⁷ Kapila:nc nolu lo:dcm opan tani:kvdv:dcm du:bosuycpc, odokkc nolu okodcmci ilv:dagnc, nolu bulum ainc agercm gerbila:dag; cmpige:la nolu lo:dcm ngom pa:ma:yc.

⁸ Bv okodcm ila:dagnc cdcmci ngom ibito; bv ngok amvrcm po:pcbong vrto ngok amvrcm yuma:dapc.

⁹ Odokkc aropakpc, ngo nolum lubidung, okoloi tadponc lutaddcm lubiycnc mo:pv appv:so, bv okkom itonc bvm mc:pa:langkula lubiycku.”

Juda:bv Jisumc Mirulo Kopakpc Togcsunam

¹⁰ Odo Juda Iskaroitbv, sc:ko vyvngkolang anyidok akoa:ji, dormo ager gernckvdv:do:pc gvkang bulum Bvm bulukkolo:pc togc:lvgdopc cmna.

¹¹ Odokkc cdvlo bulu cdcm tadbegtonc bulu mc:pokang, odokkc bvm murkongcm bipc cmna pesuto. Odokkc bv Bvm gogge:la toyudlvgpc cmna mago:bomkang.

Gvbo:la Gvnamdok Donamtv:namdcm Jisubv Bvk Agom Tadjvgla Gvmvnnc Kvdv:dokki Donam

¹² Odokkc komirang ilvgma:pc donam longcdok a:pongarnc longcdo, cdvlo bulu gvbatla gvnamdok me:r sobendcm palvgtonc, Bvk agom tadjvgla gvmvnnc tani:kvdv:dc Bvm tawuto “Okolo nok lcga:pc ngolu gvbadla gvnamdok donamdcm mosv:ta:ka cmna mc:dang?”

¹³ Odokkc Bvk agom tadjvgla gvmvnnc tani: anyiko Bv mclvgto, odokkc bulum lulvgto, “Nogorolo:pc gvkang, odokkc nolu asi giri:ko jo:bomnc tani:ko rvgsuycpc; bvk lcdulo gvmvnkang,

¹⁴ Odokkc bv okoloi gva:ycji, okumara:dok ru:tumdcm lulang, ‘Luyirncdc ludag, Ngok mibo dungkodc okolon, okolo ngok agom tadjvgla gvmvnnc tani:kvdv:dcm gvbatla gvnamdok donamdcm doboycnc?’

¹⁵ Odokkc bv nolum bottapaknc soyarko tayc:to mosv:la lc:namko lcngkanycpc; odo ngokkcpc mosvlangka.”

¹⁶ Odo agom tadjvgla gvmvnnc tani:kvdv:dc gvkang odokkc nogordo:pc gvkang, odokkc bulum Bvk lukamv:dcmpc pa:to; odokkc bulu gvbatla gvnamdok donamdcm mosv:to.

¹⁷ Odokkc yumc ayir pvnga:nammc Bvk vyvngkolang anyidcm gvboto.

¹⁸ Odokkc bulu tcbuldo dola du:dodcm, Jisubv luto, “Aropakpc, ngo nolum lubidung, nolukkolok akonc ngom miru alaglo tolvgyc, ngok lcdulo sc:ko domvndu:ji.”

¹⁹ Bulu mc:dvramkang odokkc akon lcdudo akonc Bvm lurobbomkang, “Cdc ngoi?”

²⁰ Bv bulum luto, “Cdc vyv:dok akonc, ngok lcdulo sc:ko alagcm suda:mvnna dodu:ji.”

²¹ Kapila:nc tani:kc awodok agomcm Bvk adkamdcmpci gvdag, ckvdaggom cdc tani:dc mctapsula sipcnammc sckkoki tani:kc Awodcm mirukc alaglo tolvgtonc! Cdc tani:dokkcpc bvm oma:yanggomci aiya:dagai.

Ru:tumkc Donamtv:nam

²² Odokkc bulu dola du:namc, Bv pitangcm la:to, odokkc kumto, odokkc cdcm pentu:to, odokkc bulum cdcm bito, odokkc luto, “Dotok; sc ngok amvrc.”

²³ Odokkc Bv bati:ko la:sa:to, odokkc aipai cmge:la bulum cdcm bito, odokkc cdcm bulu tv:to.

²⁴ Odokkc Bv bulum luto, “Sc ngok i:yc pesula lugodnamdokkc, okodcm bojcrungkc lcgangc pvlenlvgtoji.

²⁵ Aropakpc, ngo nolum lubidung, ngo angur a:ycdok ala:dcm Ru:ncsa:nckc migom dokodo anupc tv:doku longcdc pvngang-kuma:sisscm lckoda tvngkuma:yc.”

²⁶ Odokkc bulu Ru:ncsa:nckc ni:tomko moge:la Olib Adi:do:pc gvkang.

Jisubv Pitorkc Lupaksunamdcm Lungornam

²⁷ Odokkc Jisubv bulum luto, “Nolu appvngc mc:pangamycpc; Kapila:nc cdcm adla lc:tak, ‘Ngo me:r soben ka:sv:ncdcm dcmyc, odokkc me:r sobenkvdv:dcm dcmyc, odokkc me:r soben kvdv:dc dugpit-dugyit sungabyc.’

²⁸ Cmpige:la ngom turmoycku, ngo nolum gvbo:la gvla Galildo:pc gvyc.”

²⁹ Pitorbv Bvm luto, “Bulu appv:dc mcpagamdaggom, ngo:dan mcpakma:yc.”

³⁰ Odokkc Jisubv bvm luto, “Aropakpc, ngo nolum lubidung, siyumkc yummarso, porogc lcnyiko kogma:dapc, no ngom lcwumkopc kinmang cmna lupaksuycpc.”

³¹ Cmpige:la bv kvnggv:pc lusuto, “Ngo nok lcdulo simvndanyc, ngo nom kinmang cmna luma:yc.” Odokkc bulu appvngc cdcmv:pc lumvnto.

Jisubv Getsimani:do Kumnam

³² Odokkc bulu Getsimani cmna lunam mo:di:kolo:pc gvkang; odokkc Bvk agom tadjvgla gvmvnnc tani:kvdv:dcm Bv luto,

³³ “So tedtok, ngo kumna du:dodcm.” Odokkc Bvk lcdulo Pitor, Jakobmc odokkc Jo:nmc gvbokang; odokkc kvnggv:pc dungko kama:pc mc:dvrra mcngapla:ma:pc irobbomkang.

³⁴ Odokkc Bv bulum luto, “Ngok yalosc airu:pc mc:dvrdung, sinncmpci idung. So du:po:toka, odokkc darra toya:la du:toka.”

³⁵ Odokkc adji:oko gvbatge:la, Bv amo:bo owangge:la kumto jc, cdcm ila:ycmvlo, cdc ayirdcm ngokkolokkcm gvpakmoteika.

³⁶ Odo Bv luto, “Abba, appvngcm no ila:dag; cdc bati:dcm ngokkolokkcm la:pakteika; ckvdaggom ngo okodcm mc:dagnc cdcmpcmang, cmpige:la nok mcngkamdcmpckc.”

³⁷ Odokkc Bv gvlangkula bulum yubla du:dopc ka:toku, odokkc Bv Pitormc tawuto, “Simona, no yubdu:nci? No gonta akkongkosinci toya:la darra du:la:toma:n?

³⁸ Toya:la darra du:tok odokkc kumtoka nolu jen ankang ka:namlo kangkosuma:ycpc; yalodc aropci du:lv:dag, cmpige:la adindc rcmgdag.”

³⁹ Odokkc Bv lckoda gvcrkang odokkc kumto, cdc gompirkvdvngv:dcm lula:lula.

⁴⁰ Odokkc gvlatlangkula bulum yubdopc ka:toku, kapila:nc buluk amik kvdv:dcm airu:pc yummi:yc sotapbomdagaboi; odokkc bulu kinmangai okkomnai Bvm lubisuiya:song.

⁴¹ Odokkc Bv lcwumkopc gvlattoku, odokkc bulum luto, “Nolu su:paksinnci yubladu:n odokkc du:rasudu:n? Cdc pvngka:bong; ayirdc pvnga:du:bong; Tani:kc Awodcm togclvgtobong.

⁴² Darobtoka, kajc nolu gvkangkuboi; ka:toka, ngom mirupc mc:la topaklvgncdc anindc pvnga:dandu:bong.”

Jisumc Ycnggabnam

⁴³ Odokkc lomdanna, Bv agom lula du:du:dom, Juda:bv gva:to, vyvngkolang anyidok akonc, odokkc bvk lcdulo yadkumsunc tani: kcrcngkonc madsvgcmlang danggi:ycm bomla gvmvndo, dormo ager gernckvdv:dok bottarya:nc kvdv:dokkc odokkc ainc agom poyirnckvdv:dokkc odokkc abv:nc mvjvng kvdv:dokkc.

⁴⁴ Cdcmpidodcm cdc topaklvgncdc bulum kanggodko bito, scmpc lula, “Ngo sc:kom dosukycnc cdcna tani:dc;

⁴⁵ “Bvm ycnggaplangka odokkc Bvm sipaiycm gvbola gvbolangkuk.” Odokkc Bv gva:nammc, bv Bvkkolo:pc vgcmpc gva:to odokkc, luto, “Ru:tum!” Odokkc Bvm bv dosukto.

⁴⁶ Odokkc bulu Bvm alagki pigabge:la ycnggabto.

⁴⁷ Cmpige:la odok kcra:do dagla du:nc akonc bvk madsvgdcm sadlento, odokkc dormoager gerncdok pagbodcm tcgla bvk yeru:dcm papakto.

⁴⁸ Odokkc Jisubv bulum luto, “Nolu rodkutncko ycnggapkapc gvnncmpci gvlendu:n, madsvgclang danggi:ycm bomla ngom ycnggapkapc?

⁴⁹ Longgcm longgcm ngo noluk lcdulo kumko okumdo dungai luyircm lula: lula:, odokkc nolu ngom ycnggabtomang. Ckvdaggom Ru:ncpvnckc agom jvgnamdcmpc ika:langka.”

⁵⁰ Odokkc bulu appv:dc Bvm mcpagamto, odokkc dugsiamkang.

⁵¹ Odokkc ya:me: tani: akonc Bvk lcdulo gvmvnkang, ria onnoki sumnam gasor aborongko amvrdo bomge:la; odokkc bulu bvm ycnggapto,

⁵² cmpige:la ria gasordcm mcto odokkc akudali:pc dukpakkang.

Jisubv Kcbang Kcra:do

⁵³ Odokkc bulu Jisumc dormo ager gernclok bottcnclo:p soa:bomto; odokkc dormo ager gernclok bottcn appv:dc odokkc bottc bottcnc ami kvdv:dc odokkc ainc agom luyirnckvdv:dc gvkumsuto.

⁵⁴ Odokkc Pitorbv mo:tc-mo:tcngo:pc Bvk lcdulo gvmvnto, dormo ager gernckvdv:dok kcba: bangkodo:pc; odokkc bv sipaikvdv:dok lcdulo tedtu:mvnna dungai, odokkc vmv amsula ingg:a:pc dungai.

⁵⁵ Cdcmpidodo dormo ager gernclok bottarya:nckvdv:dc odokkc rcngam appv:dc Jisukc birudi:pc lukanbinamko tadgo:to Bvm mokepc cmna; cmpige:la bulu sc:komsin pa:tomang.

⁵⁶ Kapila:nc Bvk agom birudi:pc bojcrungc lume:lukanbinam luto, odokkc buluk lukanbinam kvdv:dc lugabmvsutomang.

⁵⁷ Odokkc akke darobla lume:pc lukanbila Bvm lutumnammcm luto, scmpc lula, “Ngolu Bvk lukamcm tatto,

⁵⁸ ‘Ngo sc kumko okumscm mopenyc okodcm alakki motagaji, odokkc lowumlo ngo asongkoda moycku, alakkokki moma:namko.’”

⁵⁹ Ckvdaggom buluk lukanbinam-kvdv:dc cdc lukamdcmpc itomang.

⁶⁰ Odokkc dormo ager gerncdc pongkokdo dagrobto, odokkc Jisumc tawuto, “Nokkc lupcnammc okkosinci kama:n? Okkom sc tani:kvdv:sc nom lutumla lukancm lubidu:n?”

⁶¹ Cmpige:la Bv aso:pc du:to odokkc okkomsin lutomang. Lckoda dormo ager gergcncdok bottarya:ncdc tawuto Bvm, “No Kristobv:i, Gerncpu:ncdok Awodc?”

⁶² Odokkc Jisubv luto, “Ngowvng; odokkc nolu tani:kc Awodcm bottap mcngcsunamdok tayc:do teddopc ka:begyc, odokkc taycng do:mvrtok mukkangkokki gvdokupc ka:begyc.”

⁶³ Odokkc dormo ager gernclok bottarya:ncdc bvk gcnam attardcm ga:petsuto, odokkc luto, “Ngolum odokkcsin lukanbinamcm mapcnammcbo:nci?

⁶⁴ Nolu Ru:ncpvncbv aimang cmnamcm Bvk lunamcm tattobong. Noluk mc:lenna lunamkvdv:dc okkon?”

⁶⁵ Odokkc buluk appv:dc Bvm sipa:do cmna lungapto. Akke Bvm takircm sugrumbomkang, odokkc Bvk nappa:dcm takkompc, odokkc Bvm dcmpc, scmpc Bvm lula, “Lungorla lutoka!” Odokkc sipaikvdv:dc bvm pige:la kvgge:la torvgsuto.

Pitorbv Jisumc Lupaksunam

⁶⁶ Odokkc Pitorbv kcbang moko kcvgkc lottado du:namc,

⁶⁷ dormo ager gernclok bottanclok ager gerya:nc ko:ncngkonc gva:to; odokkc Pitorbv vmv amsula du:dodcm, bv bvm ka:to, odokkc luto, “No:sin Najaretdokkc, Jisukc lcdulo du:mvnka.”

⁶⁸ Cmpige:la bv cdcm lupaksuto, scmpc lula, “Ngo kinsinmang okkomci no ludu:song tadkinsinmang.” Odokkc bv lambc ru:yikc yabgo gvangkodo:pc gvlenkang.

⁶⁹ Odokkc cdc ager gerya:ncdc bvm ka:to, odokkc lckoda kcra:dok dagla du:la ka:nckvdv:dcm lurobbomkang, “Sc tani:sc bulukkolok akonc.”

⁷⁰ Ckvdaggom bv lupaksuto. Odokkc odok adji:oko lcdupc lckoda kcra:dok dagla ka:la du:nckvdv:dc Pitormc luto, “Aropakpc no bulukkolok akonc; kapila:nc no Galilolokkc.”

⁷¹ Cmpige:la bv avdc pelvgsuto odokkc pesubila lusuto “Ngo kinmang sc tani:scm nolu sc:kom ludu:ji.”

⁷² Odokkc oddar porogdc lckoda kokkang. Odokkc Pitorbv mc:patoku kapc Jisubv bvm lukaji, “Porogc lcnyikopc kogma:dapc, no ngom lcumkopc kinmang cmna lupaksuyc.” Odokkc opekoyegkang odokkc kapto.