LUNGOR LUNAM 7 - ANU LUGOD N. T. (BSI)

144,000 Israedok Tani:kvdv:dc

¹ Odok lcdupc ngo taycng among lutad lunc appi:ko mo:pvsok sungken appi:do dagla du:dopc ka:begto, mo:pvsok csar appv:dcm gagtumla du:dopc, odomvlo jen oko csarcsin mo:pvso yuma:ncmc cdcmanggom siycngc cdcmanggom atv vsvng amvng yutapla yupc.

² Odo ngo do:nyi sanggatokkc lennc taycng among lutad lunc akoda ka:begto, turnc Ru:ncpvncdok tubjet kancdokki, odokkc bv bottapakpc gomugki taycng among lutad lunc appv:dcm luto okodc:bulu scmpc lula mo:pvscmnang siycngdcm momvgdopc ilanggvlangcm bitoji,

³ “Mo:pvscm cdcmanggom siycngcm cdcmanggom vsvngkvdv:dcm momvgyoka, ngolu ngoluk Ru:ncpvnckc ager gerya:ncdcm buluk mittukvdv:do tubjedcm tublvgma:sisscm.”

⁴ Odokkc ngo tubbjetnam kvdv:dcm kvnam kvdv:dcm tadbegto, Israeldok appvng opvnlok ommang kvdv:dokkcm lvngko kolang yv:pi: lv:yingko tubjetto,

⁵ yv:nyi lv:yingkopc tubjetto Juda:kc opvndokkcm, Riubenkc opvndokkcm yv:nyi lv:yingkopc, Ga:dkc opvndokkcm yv:nyi lv:yvngkopc, Aserkc opvndokkcm yv:nyi lv:yvngkopc,

⁶ Naptali:kc opvndokkcm yvnyi lv:yingkopc, Manasekc opvndokkcm yv:nyi lv:yingkopc,

⁷ Simionkc opvndokkc yv:nyi lv:yingkopc, Lebi:kc opvndokkcm yv:nyi lv:yingkopc, Issakarkc opvdokkcm yv:nyi lv:yingkopc,

⁸ Jebulunkc opvndokkcm yv:nyi lv:yingkopc, Josepkc opvndokkcm yv:nyi lv:yingkopc, Benjaminkc opvndokkcm yv:nyi lvngkokopc tubjet lvgto.

Kvngapla:ma:nam Yadkumsunc Tani Kcrcng

⁹ Odok lcdupc ngo ka:to, odokkc ka:toka, bottcru:pc yadkumsunc tani:kcrcngko okodcm oko tani:ycsin kvla:ma:nc, appvng rcngamlokkc, appvng opvnlokkc odokkc tani:lokkc odokkc agom lunclokkc, migom tedko kcra:do dagla du:dopc odokkc Me:r Awodok kcra:do, kamponc rvbbcm yedlvgnammc,

¹⁰ kejur anncm buluk alakkvdv:do bomna: bomna, odokkc bottcru:pc jc:la lurobkang, “Mopvtnamdc ngoluk Ru:ncpvnckc sc:kobv migom dungkodo teddagji, odokkc Me:r soben Awodokkc!”

¹¹ Odokkc taycng among lutad lunckvdv:dc migom dungkodcm du:rila dagamkang odokkc abv:nc tani:kvdv:dcmbulum odokkc turla du:nc simvn dorpi:dcm, odokkc bulu kcra:pc owangamkang migom dungkodo odokkc Ru:ncpvncmc kumto, scmpc lula:lula,

¹² “Amen! Akirba:dclang amin gvnamc odokkc kinnamc odokkc aipai binamc odokkc ilang gvlangc odokkc tornamc ngoluk Ru:ncpvnckc lo:dv longkvpc lo:dv longkvpc ika:langka! Amen!”

¹³ Odo abv:nc tani:kvdv:dok akonc ngom scmpc lula luto, “Sc:bulu sc:kobulu kamponc rvbvkokki yc:sunckvdv:dc, odokkc bulu cdvlo okolokkc gvdu:n?”

¹⁴ Ngo bvm lubito, “Mcnggcnamma, no kindag.” Odokkc bv ngom luto. “Sc:bulu cdcbulu sc:kobulu cdc bottcru:nc du:g gvnamdokkc gvlennc kvdv:dc; buluk migom gcnam rvbvkvdv:dcm nvpu:to odokkc Me:r Awodok i:do cdcmbulum kampodopc imoto.

¹⁵ Cdcmpidag bulu Ru:ncpvnckc migom dungkodo dung, odokkc Bvm longc yumcpc agercm gerdag Bvk kumko okum ara:do; odokkc sc:kobv migom tedkodo tedycji bulum Bvk du:mvnkokki du:rasumoyc.

¹⁶ Bulu cdvlosin kcno:ma:bong, cdvlosin tv:lv:sinma:bong; do:nyitc bulum ka:la kangkema:yc, cdcmanggom atvpc amna amkema:yc.

¹⁷ Kapcnc Me:r Awodc migom tedkodo ara:dokkcdc buluk kanggapncpc iyc, odokkc bv bulum luyirla cdc turra du:nc jili: asido:pc gvboyc; odokkc Ru:ncpvncbv appvng migscm buluk amigkvdv:dokkcm tidpagbiycku.”