LUNGOR LUNAM 3 - ANU LUGOD N. T. (BSI)

Sardi:do:pc Lulvgnam Lutad

¹ “Odokkc Sardi:dok mondoli:dok taycng among lutad luncdo:pc attoka: “Bvk agomkvdv:dcm sckkc Ru:ncpvnckc Yalo kvnvddc du:ji odokkc kvnvd takarc du:ji. Ngo kindag nok agerkvdv:dcm; nokkc turra dung cmnam amindc dung, odokkc no sinnc.

² Kinsutoka, odokkc okodc dungka:ji odokkc sipc cmna idu:ji kvnggv:motoka, kapcnc ngo nok agerkvdv:dcm Ru:ncpvnckc kangkolo aiyamdandopc pa:tomang.

³ Mc:pa:toka cdcmpcmvlo no okodcm torvgsutonc odokkc tattonc; cdcm gagla du:toka, odokkc mc:dvrra asinc mc:latsutoka. No kinsuma:mvlo, ngo dopsongkoncmpc gvyc, odokkc no kinma:yc oko ayirdo ngo nokkolo:pc gvycji.

⁴ Ckvdaggom nokkc adjio:ko aminc Sardi:do dung, tani:kvdv:dc sc:kobulu buluk gcnam attarkvdv:dcm koiyangcm a:motoma:ji; odokkc bulu ngok lcdulo lckorcm kampopc korra gvmvnyc, kapcnc bulu arckadag.

⁵ Sc:kobv mopvycnc kampopc attarcm gcyc, odokkc ngo bvk amincm turnc kvdv:dok potindokkcm notpakma:yc; ngo bvk amincm ngok Abukc kcra:do odokkc bvk taycng among lutad lunckvdv:do lukanbiycku.

⁶ “Sc:kokc yerungc du:nc, bvm tadmotoka Yalodc mondoli:kvdv:do:pc okodcm ludagji.

Piladelpiado:pc Lutad Lulvgnam

⁷ “Odokkc Piledelpia:dok taycng among lutad lunckvdv:do:pc: “Angunncdok agomkvdv:dcm, cdc aronc akodokkcm, sckkc Dawidkc sabi:dc du:ji, sc:kobv moge:dagji odokkc sc:kobv:sin mokapla:maji, sc:kobv mokapdagji odokkc sc:kobv:sin moge:la:mang.

⁸ “Ngo nok agerkvdv:dcm kindag. Ka:toka, ngo nok kcra:lo yabgoko moge:la lc:bitag, okodcm sc:kosin mokapla:ma:ji; ngo kindag jc nokkc cmpige:la adjio:ko ilang gvlangc dung, odokkc ckvdaggom no ngok agomcm gagla du:to odokkc ngok amincm lupaksutomang.

⁹ Ka:toka, ngo cdc kumko okumkvdv:dcm Satankcpc imoyc sc:kobv ludagji jc bulu Jiwu cmna lusudag cmpige:la Jiwumang, cmpige:la lume:ycm ludag–ka:toka, ngo bulum gva:moyc odokkc nok alc kcra:lo lcbvngcm tuma:moyc, odokkc kintoka jc ngo aipc mc:to.

¹⁰ No ngok aso:pc dunggcla mentumsunamcm gagla du:to, ngo nom kcbang ba:nam ayirdokkcm la:pakyc okodc mo:pv appv:so:pc pvnga:dagbo:ji, mo:pvso sc:kobulu du:nc cdcmbulum anka:la ka:pc.

¹¹ Ngo lomdanna gvdu:bong; nokkc okodc du:ji kvnggv:pc gagla du:toka, odomvlo jen sc:kosin nok migom dumlubcm rotpakma:ycpc.

¹² Sc:kobv mopvycji, ngo bvm ngok Ru:ncpvnckc kumko okumdok kuntapc moyc; cdvlosin bv odokkc gvlenkuma:yc, odokkc ngo bvkkolo ngok Ru:ncpvnckc amincm adlvgyc, odokkc ngok Ru:ncpvnckc nogordok amindcm, cdc anu Jerusalemdcm okodc ngok Ru:ncpvnckc taycng amongtokkc gvidagji, odokkc ngok avkc amincm.

¹³ “Sckkc yerungc du:ji, bvm Yalodc mondoli:kvdv:do:pc okodcm ludagji tadmotoka!

Laodikia:do:pc Lutad Lulvgnam

¹⁴ “Odokkc Laodikia mondoli:dok taycng among lutad luncdo:pc adtoka: ced A:mendok agomkvdv:dcm cdc mc:jvg jvrvgncdokkc odokkc aro lukanbincdokkcm, cdc Ru:ncpvnckc ru:lenamdokkc.

¹⁵ “Ngo kindag nok agerkvdv:dcm: no ansv:sinmang gusinmang. No ansv:ma:pc cdcmanggom guma:pc du:ycnci!

¹⁶ Cdcmpidag, no inggango:nam lcgangc, odokkc ansv:sinmang guma:sinma:la, ngo nom ngok nappa:lokkc badlennvgyc.

¹⁷ Kapcnc no ludag, ngo mircmdag, ngo murkong kakang, odokkc ngom okkomsin lagimang; no:jc cmpcsin aisi:ma:nc cmna kinsuru:ma:pc, mc:dvrpc mc:pcnammc, opanc, miglunc, odokkc akudali:nc.

¹⁸ Cdcmpidag ngo nom luyirdung vmvkokki romna narc:monam avncm rctoka cmna, no:jen mircmycpc, odokkc kamponc attarcm nom molvgsupc odokkc nok akudali:namdok anyi:dcm ka:begsuma:dopc, odokkc amig tarclok yonnvgsunam kusere:ycm, no:jen ka:begdopc.

¹⁹ Cdc sc:kobulum ngo aipc mc:dagnc, ngo mogvtmomatdo odokkc dcmdo; cdcmpidag kvnggv:pc mcnga:la gertoka odokkc asinc mc:dvrra mc:latsutokuka.

²⁰ Ka:toka, ngo yabgodo dagla dungge:la piku:do: jodi sc:kai akonc ngok gomugdcm tadbegyc odokkc yabgodcm moge:yc, ngo bvkkolo:pc gva:yc odokkc bvk lcdulo du:mvnyc, odokkc bv:sin gnokkolo.

²¹ Sc:kobv mopvdonc, ngo bvm ngok migom dungkodo du:mvndopc du:mvnmoyc, kapc ngo avycsin mopvtoji odokkc ngok Abudokki bvk migom dungkodo teddoji.

²² “Sc:kokc yerungc du:nc, okodcm Yalodc mondoli:kvdv:do:pc ludagji sc:kokc yerungc du:nc, bvm tadmotoka!”