LUNGOR LUNAM 2 - ANU LUGOD N. T. (BSI)

Ipesu:do:pc Lulvgnam Lutad

¹ “Ipesu:dok mondoli:dok taycng among lutad luncdo:pc adtoka: “Bvk agom kvdv:dcm sc:kobv takar kvnvddcm Bvk lagbvk alagdo bomdagji, sc:kobv kvnvd avn saki: lcnggcng arangkvdv:do gvgo:dagji.

² Ngo nok agerkvdv:dcm kindag, nok du:g-gvla ager gernamdcm odokkc nok sagtumsula dungge:la mentumsunamdcm, odokkc kapc no aima:nc tani:kvdv:dcm ka:la:ma:ji cmpige:la ankvla ka:to sc:kobulu avkvdv:dc mclvgla ager germonammc cmna lusudagai cmpige:la gerncmang, odokkc bulum lume:luncpc pa:to;

³ ngo kindag no aso:pc dunggcla odokkc ngok amin lcgangc asinc mcnga:tvla du:namdcm mentumsula dung, odokkc no gerdvr-gersongmang.

⁴ Cmpige:la nok birudi:pc ngokkc sc dung, jc nok mc:pongarnam aipcmc:namdcm mcpakto.

⁵ Mc:pa:langka cdcmpinamc no okolokkc kcdledka:ji, asinc mc:dvrra mc:latsutokuka odokkc agerdcm nok gerangarpo:la gernamdcm gertoka. Germa:mvlo, ngo nokkolo:pc gvyc odokkc nok saki: tvgcnancdcm odok tvkodokkc la:pakyc, no asinc mc:dvrra mc:latsukuma:mvlo.

⁶ Ckvdaggom sc nolukkc dung, no Nikolaitangkc ager kvdv:dc tayumdag, okodcm ngo:sin tayumdagji.

⁷ “Sc:kokc yerungc du:ji, bvm tadmotoka okodcm Yalodc mondoli:kvdv:dcm ludagji. “Sc:kobv mopvdagji ngo bvkkcpc turnamdok vsvnga:ycdcm biyc, okodc Ru:ncpvnckc taycng among ba:ri:do du:ji.

Smirna:pc Lutad Lulvgnam

⁸ “Odokkc Smirna mondoli:kvdv:dok taycng lutad luncdo:pc adtok: “Lenpongarncdok odokkc lentcrdok agomkvdv:dcm, taycng among lutaddo:pc adtoka:, sc:kobv sika:ji odokkc turkangkuji.

Kristokc Kangorko

⁹ “Ngo kindag nok asinc mc:dvrra mcnggcsula du:namdcm odokkc nok opannammcm kindag (cmpige:la no mircmdag) odokkc lume:pc lugc:namdcm sc:kobulu ludagji jc bulu Jiwuyc odokkc cdcmpige:la Jiwumang, cmpige:la Satandok kumko okumcbulu.

¹⁰ No oko ipusire:dcm adjio:komvlo pa:ycji pcsoyok. Ka:toka, uidc noluk akkem makana:lo lvgpc cmna idung, jc nolum anka:la ka:dopc cmna, odokkc lo:yvng longckopc nolu irvsinyom pa:ycpc. Sidodo:pc mc:jvg jvrvgla du:toka, odokkc ngo nolum turnamsok dumlubcm biyc.

¹¹ Sc:kokc yerungc du:ji, bvm tadmotoka okodcm Yalodc mondoli:dcm ludagji. Sc:kobv mopvdoji lckon sinamdokki sikuma:yc.

Pargamumpc Lutad Lulvgnam

¹² “Odokkc Pargamumdok mondoli:dok taycng among lutad luncdo:pc: “Bvk agomkvdv:dcm sckkc kekon kesagdo radnc madsvgnc du:ji adtoka.

¹³ Ngo kindag no okolo dagdoji, okolo Satan migom dungkodc:ji; Antipaskc longcdo ngom lukan lubinamdo:sinci no ngok amincm gagtvla dung odokkc no ngok mc:jvgcm lupaksutomang, ngok mc:jvgnc okodc sc:kom nolukkolo moketoji, okolo uidc du:doji.

¹⁴ Cmpige:la ngokkc asudowko nok birudi:pc lupcnammc dung: nokkc akke sc:kobulu Balamkc luyir gagdagji dung, sc:kobv Balakmc poyirtoji Israel ommang kvdv:dcm lcsutsunam sv:tungcm dvngkomtoji, jc bulu murti:ycm binam donamcm dola:dopc cmna odokkc aisi:ma:nc agercm gerdopc.

¹⁵ Cdcmpidag nokkcsin akke dung sc:kobulu Nikolaitankc luyirnamdcm gagdagji. Asincm mc:dvrra mc:latsudag cmpila.

¹⁶ Cdcmpc ima:mvlo, ngo nokkolo:pc mcna:pc gvyc odokkc buluk birudi:pc ngok nappa:sok matsvgkokki mimagcm moyc.

¹⁷ “Sckkc yerungc du:ji, bvm tadmotoka okodcm Yalodc mondoli:kvdv:do ludagji Bvkkolo:pc sc:kobv mopvycji ngo lc:sula lc:nam manna:dcm biyc, odokkc ngo bvm kamponc vlvngcm biyc, vlv:do anu amin annamko okodcm sc:ko pa:ycji bv:ma:mvlo sc:kosin kinma:yc.

Tiatira:pc Lutad Lulvgnam

¹⁸ “Odokkc Tiatira: mondoli:dok taycng among lutad luncdo:pc: “Ru:nc pvnckc awodok agomkvdv:dcm adtoka, sckkc dornc vmvlok mcrrompinc amigc du:ji, odokkc sck alckvdv:dc nodpu:nam pitolcmpc idagji.

¹⁹ Ngo kindag nok agerkvdv:dcm, nok aipc mc:namdc odokkc mc:jvgdcm odokkc ager gernamcm odokkc mcyinsula mentumsula du:namdcm, odokkc jc nok lcdukcdc ipongarnamdcm aiya:dag.

²⁰ Cmpige:la sc nok birudi:pc ngokkc dung, jc no Jejebel nc:dcm mc:yinsuto, sc:kobv av avdc lungor lunnc cmna lusudagji odokkc ngok ager gerya:nc kvdv:dcm aisi:ma:nc agercm geryiddopc odokkc moimang kvdv:dok kcra:lo tvlvgnam donamcm dodopc luyirdung odokkc yaddag.

²¹ Ngo bvm asinc mc:dvrra mc:latsudokupc ayircm bika, cmpige:la bvk aisi:ma:nc ager geryitnam kvdv:dcm bv mcge:mang cmdag.

²² Ka:toka ngo bvm kinamcm a:mola asublo kcdmoyc, odokkc cdc sc:kobulu bvm miyc:pc la:dagji, bulu bvk inamkvdv:dcm mc:dvrra mc:latsukuma:sisscm ngo kvnggv:pc asincm mc:dvrmoyc; odokkc ngo bvk ommangkvdv:dcm sigcdopc dcmyc.

²³ Odokkc mondoli: appvngkvdv:dc kinyc jc ngo Bv sc:kobv mc:namclang asinangcm mago:dagji, odokkc ngo noluk appvngcm ako akko:pc noluk ager gernamdcmpc pa:pcnamdcmpc biyc.

²⁴ “Cmpige:la Tiatira:dok nolu akedo:pc, sc:kobulu sc poyirdcm gagla du:ma:nc, sc:kobulu poyirsuma:nc okodcm Satandok orv:nc ager cmna ludagnc, nolukkolo:pc ngo ludung, ngo nolukkolo atv angu jo:namko jonggclvgmang;

²⁵ nokkc okko du:ji cdcm gaglangong du:toka, ngo gvkuma:sisscm.

²⁶ Sc:kobv mopvycji odokkc sc:kobv ngok agercm du:tcrdo:pc gerycnc, ngo bvm angu opvnkvdv:dcm mopvla:nanc tornamcm biyc,

²⁷ odokkc bv bulum migompc ila migom doyc mcngannc yogvr dangi:ycm bomna, kapc cdvlo amongki monam attar inyop inyoppc omvgdagji, kapc ngo avycsinci Abukolokkcm pa:toji,

²⁸ Odokkc ngo bvm ro:rokomlok takardcm biyc.

²⁹ “Sc:kokc yerungc du:ji, bvm tadmotoka okodcm Yalodc mondoli:kvdv:dcm ludagji!