LUNGOR LUNAM 18 - ANU LUGOD N. T. (BSI)

Babilondok Opennam

¹ Odok lcdupc ngo taycngtokkc gvinc taycng among lutad lunckoda ka:to, bottcpakpc lulvg lula:namko; odokkc mo:pvscm Bvk unjvg-jvrvgdokki unjermoto.

² Odokkc bv kvnggv:pc tornc gomugkki jc:la luto, “Openncdc, openncdc bottcnc Babilondc! Cdc uikvdv:dok dungkopc ikang, appvng tayumpcnam yalolok uidungko, appvng tayumpcnam odokkc tayumc bi:nc pctta:lok dungko;

³ kapcnc appvng opvnc bvk narc:ma:nc mc:boka:bodok apo:dcm tvngvrsuto, odokkc mo:pvsok migomkvdv:dc bvkkokki miyc:pc la:mvnsuto, odokkc mo:pvsok mircmrcmbatsunc kvdv:dc bvk anying kamangki mircmna gvkang mircm rcmnam attarki.”

⁴ Odo ngo gomug akoda scmpc lunamko taycngtokkcm tadbegto, “Kajc ngok tani:kvdvnga, Bvkkolokkc gvlenna gvtoka, ckvma:mvlo nolu bvk pa:pkvdvngcm imvnyc, ckvma:mvlo nolu joar kinam-ramnam angkolo pa:mvnyc!

⁵ Kapcnc bvk pa:pkvdv:dc taycng amongtok kvddvkopc bojckang, odokkc Ru:ncpvncbv bvk pa:p kvdv:dcm lulenamtoku.

⁶ Bvm inam-sa:nam appv:dcm bvm ikamgvkamv:pc ito, odokkc bvk ager inam kvdv:dok lcnyikopc ibitoku; bvk lcga:pc lcnyikopc bv mu:namcm bvk tv:nanc bati:do molusuto.

⁷ Bv kapc avdc amincm gvsumotonc odokkc miyc:pc igo:tonc, cdcmpila bvm turpc turpc joar kinam a:namcmpc a:moto odokkc mc:dvrra kabmoyc. Bvk asindo lula:yam: ‘Ngo Migom nc:ngkopc tedla:yam! Ngo tumbonc:mang, asinc mc:dvrra kabnamcm ngo cdvlosin ka:begma:yc!’

⁸ Cdcmpila bvk joardc longc atcrcm pvnga:yc, cmpcsin aima:nc angkonsunc kinamc odokkc asinc mc:dvrra kabnamc odokkc dopa:tv:pa:ma:namc, odokkc bvm vmvki rompakyc; kapcnc Ru:tum Ru:ncpvncbv kvnggv:pc ilanggvla:nc sc:kobv bvm kcbang ba:dagaji.”

⁹ Odokkc mo:pvsok migomkvdv:dc, sc:kobulu amikc miycng la:namcm la:tonc odokkc bvkkokki anyingkama:nc agercm gertoji, kabycku odokkc v:tombanki:la bvkkolo kabycku cdvlo bulu bvm romnamdok mikkidcm ka:begyckuji;

¹⁰ bulu mo:tc:ru:pc dagyc, bvk ipusire:dcm ka:langkula, odokkc luyc, “Yowc! Yowa! No cdc bottcru:nc nogordc, kvnggv:ru:nc nogordc, Babilona!”

¹¹ Odokkc mo:pvsok mircm-rcmnckvdv:dc kabyc odokkc bvk lcgangc mc:dvrra kabycku, buluk siycng ollu:dok attarkvdv:dcm sc:kosin lckoda rckangkuma:nammc, avn rcbnam attarc, silbar attarc,

¹² dogncbulu odokkc mukutangcbulu, kangkannc ria onno attarc, kojola:nc migom gcnam attarc, silkor attarc odokkc lv:nc, appvng namponc vsvngcbulu, sitc a:rc:lok monam attarcbulu, odokkc kvnggv:pc arckanc appvng vsvngcbulu, kamponc ta:mc, yogvrc odokkc marbol vlvngc, da:lseni: vsvng asvgc, o:ri:-mosolangc, dunangc,

¹³ gondok atangc, apongc, tulangc, kangkannc moidangc odokkc geua:mc, so:bo kcrcngc odokkc bera sobenc, gure:yc odokkc gure: ga:ri:ycbulu, odokkc pagbokvdv:dc, cdc, tani: yallobulu.

¹⁴ “Okodok a:ycdcm nok yalodc mc:la dungaji nokkolokkc gvpakkang, odokkc nok appvng doponc donam kvdv:dc odokkc nok unjvgnc attar kvdv:dc nokkcpc yokkang, cdvlosin lckoda pangkunampc itoma:bong!”

¹⁵ Sc mimagmonc kvdv:dok mircm-rcmnckvdv:dc, sc:kobulu bvkkolokkcm mircm attarcm arcpc pa:tonc, bottc-bottcpc kabla odokkc asinc mc:dvrra dungai,

¹⁶ “Yowc:, Yowa, cdc bottcru:nc nogordokkcpc ria attarki molupnamdc, migom gcnam attarki odokkc lv:nc attarki, avncm moru:lvgnamdc, dognc odokkc mukutangkokki!

¹⁷ Gonta ayir akko:lo cdc mircm attar appv:dcm yoppakto.!” Odokkc appvng siycng ollung konggurbonc kvdv:dc odokkc siycngki mo:tak mo:taklo:pc gvnc tani:kvdv:dc, siycng ollung ko:nckvdv:dc odokkc siycngdok beparcm sc:kobulu modaganc appv:dc,

¹⁸ mo:tc:pc dagkang odokkc jc:sa:la kabsangkang bvm romnamdok mikkidcm kapc bulu ka:toji, “Oko nogorc cdc bottcru:nc nogordcmpc idaganc?”

¹⁹ Odokkc buluk tukkukvdv:do suli: amongcm pidrumsuto, kapc bulu kaptoji odokkc mc:dvrra mc:toji jc:la kabsa:la, “Yowc: yowcv, kapcnc cdc bottcru:nc nogordc okolo sc:kobulu appvngc siycng ollungc dungaji siycngdo bvk murkong attarki mircmkang! Gonta ayir akko:lo bvm cmmumpc ipakmoto.

²⁰ “Bvk sinamlo mc:potoka, O: taycng amongkc kvdvnga, O: aipc kumnc tani:kvdvng mclvgla ager germonamkvdvng odokkc lungor lunckvdvng, kapcnc Ru:ncpvncbv kcbang ba:namcm nok lcgang bvk birudi:pc bitung!”

²¹ Odo kvnggv:pc ila:-sa:lanc taycng among lutad lunckonc vlvng apvko la:sa:to bottcru:nc mail dvnggot vlvngcmpincko odokkc cdcm siycngdo, scmpc lula crjv:lvgto, “cdcmv:pc bottcru:nc Babilon nogordcm momvnsula, odokkc cdvlosin pangkuma:yc;

²² odokkc be:lang manncdok odokkc ni:tom monckvdv:dok bc:namkvdv:dc, muruli: munnam kvdv:dokk odokkc tu:lu: munnam kvdv:dokc, nokkodo cdvlosin tadbegma:yc; odokkc cdc mail dvnggot vlv:dok bc:namdcm nokkolo cdvlosin tadbegkuma:yc;

²³ odokkc saki:lok ruadko nokkolo cdvlosin ka:begma:yckubong; odokkc magbodoklang yamncdok gomukko nokkc cdvlosin tadbegkuma:bong, kapcnc nok mircm rcmnckvdv:dc mo:pvsok bottcru:nc tani:yai, odokkc appvng opvnkvdv:dc nok moyadla morunamki yadmoto.

²⁴ “Odokkc bvkkolo lungor lunckvdvng odokkc aipc kumnckvdvngdok odokkc mo:pvso sc:kobulum palvgtoji, i:ycm pa:to.”