LUNGOR LUNAM 16 - ANU LUGOD N. T. (BSI)

Ru:ncpvnckc Aglvng Sa:namlok Soriyang

¹ Odokkc battapaknc gomugko kumko okumdokkcm ngo kvnvd taycng among lutad lunckvdv:dcm luncko tadbegto, “Gvkang odokkc mo:pvso cdc Ru:ncpvnckc aglvng soriang kvnvddcm to:ledlvgtoka.”

² Cdcmpila cdc du:pongarnc taycng among lutad luncdc gvkang odokkc bvk soriya:dcm mo:pvso to:lvgto, odokkc tayumpcnamclang aima:nc tarrc tani:kvdv:do gckang sc:kobulu simvndok tubjedcm gcdagai odokkc odok moimang monam kvdv:dcm kumdagai.

³ Taycng among lutad lunc akondc bvk soria:dcm siycngolo:pc to:ledlvgto, odokkc cdc sinc tani:lok i:ycmpc ikang, odokkc appvng turra du:nc takamc cdc siycngdo du:nckvdv:dc singapkang.

⁴ Cdc awum taycng among lutad luncdc bvk soria:dcm a:nckvdv:do:pc to:yi:lvgto odokkc asi jili:kvdv:do:pc, odokkc cdcbulu i:pc ingapkang.

⁵ Odokkc ngo asidok taycng among lutad luncdcm ludopc tatto, “Kappar no nok sc kcba:bangkoso idagji, no sc:kobv:ji odokkc sc:kobva:ji, O: Angunnc Akono.

⁶ Kapcnc tani:kvdv:dc aipc kumnc tani:kvdv:dok i:ycm odokk lungor lunckvdv:dokkcm bidmoto, odokkc no bulum i:ycm tv:dopc bito. Cdc buluk pa:pcnammc!”

⁷ Odokkc ngo palvgkkodcm kapdopc tatto, “C: Ru:tum Ru:ncpvncbv Appvng ilang-gvla:ncdc, nok kcba:ba:nam kvdv:dc arro odokkc arodc!”

⁸ Appi: taycng among lutad luncdc bvk soria:dcm do:nyito to:lvgto, odokkc cdcm vmvkokki tani:kvdv:dcm aso:pc ugsa:bomto;

⁹ tani:kvdv:dcm kvnggv:pc amnamki ugbomdungai, odokkc bulu Ru:ncpvnckc amindcm pelvgto sc:kokc cdc ipusire:dok joar kinamramnamdok tayc:do ilanggvlangc dungai, odokkc bulu asinc mc:dvrra mc:latsutokumang odokkc Bvm amincm gvmotomang.

¹⁰ Anggo taycng among lutad luncdc bvk soria:dcm cdc simvndok migom dungkodo to:yi:lvgto, odokkc odok migom dungko amo:dc kcmmo jvng cmkang;

¹¹ tani:kvdv:dc buluk a:yckvdv:dcm dokcrcbbamsukang asinc dvgnamki tanycng amo:tok Ru:ncpvncmc buluk kinamki pelvgto odokkc tarckvdv:dokki, odokkc buluk inamkvdv:dok lcgangc asinc mc:dvrra mc:latsutokumang.

¹² Akkcng taycng among lutad luncdc bvk soria:dcm cdc bottapaknc Iuprates a:ncdo to:ledlvgto, odokkc odok asidc o:jinkang, sanggatok migomkvdv:dok lambcdcm mosv:pc cmna.

¹³ Odokkc ngo ka:to, alap kanc tabvdok nappa:dokkc odokkc simvndok nappa:dokkc odokkc lume:pc lungor luncdok nappa:dokkc lennamcm, anying kama:pc yalo awumko tatvgkvdv:dcmpc innc;

¹⁴ kapcnc bulu uilok yalokvdvngc, kanggodcm lcngkannc kvdvngc, sc:kobulu mo:dopc mo:pv appvng migom kvdv:do:pc gvdagji, bulum lckopc gvkumsumopc odo Ru:ncpvnckc Appvngcm ilang gvlanckc longcdo mimag momopc cmna.

¹⁵ (“Ka:toka, ngo dopsongkoncmpc gvdoku! Sc:kobv darra toya:la du:nc akirba:d pa:nc, Bvk gcnam attarkvdv:dcm gctvla odomvlo jen bv pvtsula gvma:ycpc odokkc ka:de:pc ka:begma:ycpc!”)

¹⁶ Odokkc bulum lckopc gvkumsumoto cdc amo:do okodcm Hibriulo Armegedon cmdagji.

¹⁷ Kvnvd taycng among lutad luncdc bvk soria:dcm csardo:pc to:ledlvgto, odokkc bottcru:nc gomugko kumko okum migom dungkodokkc scmpc lula bc:lenkang, “Cdcm itobong!”

¹⁸ Odokkc odo mcrulok ruadc ladkankang, gomugcbulu, do:mvrtok mvr-mvraila mvrnamc, odokkc bottcru:nc tarcmo:tonc taniyc mo:pvso dunga:dodokkc cdcmpinnc cdvlosin tonkvmangai, cdcmpinc tarcmo:tonai.

¹⁹ Cdc bottcru:nc nogordc bawumkopc dc:pit-dc:ritsukang, odokkc opvnkvdv:dok nogorkvdv:dc openamkang, odokkc Ru:ncpvncbv bottcru:nc Babilondcm mc:pa:to, bvm Bvk aglvng sa:nam bati:dcm pvjinmopc cmna.

²⁰ Odokkc appvng siycng ara:lok amongc dc:pagamkang, odokkc oko adi:ycmsin pa:tomang;

²¹ odokkc bottcru:n vlvngtangc, lvngko i:dkopc i:dncmpinnc, tani:kvdv:dcm taycngtokkc orumyc, Ru:ncmc tani:kvdv:dc joar kinamlok pcdongdok lcgangc pelvgma:sisscm, cddvkopc cdc joardc pcsopcnamai.