LUNGOR LUNAM 11 - ANU LUGOD N. T. (BSI)

Lukan Lubinc Anyidc

¹ Odokkc ngom kvgrasunanckoncmpc inc kvnanc danggi:ko bitungai, odokkc ngom luto: “Darobtok odokkc Ru:ncpvnckc kumko okumdcm kvtoka odokkc palvgko mo:takdcm odokkc cdc sc:kobulu odo kumdagji,

² cmpige:la migom kcbang bangko okum lottadcm kvyoka; cdcm mcpaktoka, kapcnc cdcm opvnkvdv:dcm bipakto, odokkc bulu yv:pi:kolang anyi po:lokopc bulu angunnc nogordok taycdo samjcmla gvyc.

³ Odokkc ngok lukanbinc anyidcm lv:yingkolang lvngko anyi odokkc yingkc: longckopc toilang attar gcge:la, lungor lunanc ilang gvlangcm biyc.”

⁴ Cdcbulu jolpai vsvng anyiko odokkc di:tu:pc saki: tvla lcnggcng anyiko okodc:bulu mo:pvsok Ru:tumdok kcra:do dagdagji.

⁵ Odokkc jodi akonc bulum atvko mojcgkkc moyc, vmmc buluk nappa:lokkc lenyc odokkc buluk mirukvdv:dcm ugpakyc: jodi akonc bulum mojokyo, cdcmpc bvm mokedoppc pelvgnammc.

⁶ Bulukkc do:mvrtcm mokapnannc ilang gvlangc dung, jc buluk lungor ludo longckvdv:do oko pcdongcsin oma:yc, odokkc bulukkc asscmsin i:pc badmola:nc, odokkc mo:pvscm appvng joar kinamki mole:dopc, bulu kapc cddvko mc:dagaji.

⁷ Odokkc cdvlo buluk lukanbinamcm lungaptoji, simvndc cdc du:tcrkama:pc o:rv:nc jiko:dokkc lenncdc bulum mimagcm moyc odokkc bulum mopvto odokkc bulum moketo,

⁸ odokkc buluk simangkvdv:dc cdc bottcru:nc nogordok lambcdc kcdla du:yc okodcm luyv:sula lupc Sodom cmna odokkc Igip cmna ludagai, okolo buluk Ru:tumdcm kuruslo pvtketoji.

⁹ Lowumkopc odokkc tani:kvdv:dok kvdvsupc odokkc tani:kvdv:dokkc odokkc agom lunckvdv:dokkcm odokkc opvnkvdv:dokkc ka:jon-joronna buluk sinc simang kvdv:dcm ka:la dungkang odokkc bulum ago arungkolo lc:pcnamdcm lupaksuto,

¹⁰ odokkc cdc sc:kobulu mo:pvso du:dagji bulukkolo mc:poyc odokkc so:man-yvrmanyc odokkc amancm bika:mvnsuyc, lcga:dc cdc lungor lunc anyidc mo:pvsok cdc du:nc-dagnc kvdv:do:pc mogvtmomadai.

¹¹ Cmpige:la lowumkolang lo:tung lcdudo turnamlok nganamko Ru:ncpvnckolokkc bulukkolo:pc angkang, odokkc kvnggv:pc pcsoko angkang cdc sc:kobulu bulum ka:toji.

¹² Odo bulu bottcru:nc gomugko tadbegto taycngtokkc bulum, “Kajc so:pc gvtok!” Cmna lunamko odokkc buluk mirukvdv:dok kangkolo taycngpc mukkangkolo dc:sangkang.

¹³ Odokkc odo ayirdo bottcru:nc tarcmo:tonko tonkang, odokkc nogorkvdv:dok vyvng intakko omvgamkang; kvnvd lv:yvngkopc tani:kvdv:dok tarcmo:tondc tonketo, odokkc du:paknc akedc kvnggv:pc pcsokang odokkc taycngtok Ru:ncpvnckc amincm gvmoto.

¹⁴ Akon mc:dvrnamdc gvbatkang; ka:toka, awum mc:dvrpcnamdc mcna:pc a:pcnammc.

Kvnvd Tu:lungdc

¹⁵ Odo kvnvd taycng among lutad luncdc bvk tu:lu:dcm mullvgto, odokkc taycngto bottcru:nc gomugcbulu bcngkang, scmpc lula, “Mo:pvsok migom doko amongkvdv:dc ngoluk Ru:tumkc odokkc Bvk Kristokc migom dokopc iyc, odokkc Bv lo:dv longkvpc migomcm doyc.”

¹⁶ Odokkc yv:nyikolang appi: abv:nc tani:kvdv:dc sc:kobulu buluk migom tedkokvdv:do teddagnc Ru:ncpvnckc kcra:do bulu obumamkang odokkc scmpc lula Ru:ncpvncmc kumto,

¹⁷ Ngolu nom aipai bido, “Ru:tum Ru:ncpvnna Appvngcm ilang gvla:na, sc:kobv du:ji odokkc sc:kobv dungaji, jc no bottcru:nc nok ilang-gvlangcm la:to odokkc migom dorobbomkang.

¹⁸ Opvnkvdv:dc aglvngc sangkang, cmpige:la nok palvg lvgnam aglvngc pvngangkang odokkc sinckvdv:dcm kcbang bangkunam ayirdc, nok ager gerya:nckvdv:dcmbulum aman bikupc cmna, lungor lunckvdv:dcm odokkc aipc kumnc tani:kvdv:dcm Odokkc cdc sc:kobulu nok amincm pcsodagji, anyipagcm bottcnclang adji:ncm, Odokkc mo:pvsok momvg mosvgnc kvdv:dcm momvg-mosvgkupc.”

¹⁹ Odo Ru:ncpvnckc kumko okumdc taycng amo:to moge:kang, odokkc Bvk lugoddok siycng ollu:dcm Bvk kumko okum ara:do ka:begto, odokkc odo mcrulok ruad ladkannammc laddagai, gomugcbulu, do:mvrtok donge:yc mvrnamc, tarcmo:tonko, odokkc kvnggv:pc vlv:tang pcdongc okang.