LU:KKC 5 - ANU LUGOD N. T. (BSI)

Jisukc Gogpongarnam Agom Tadjvgla Gvmvnnc Tani:kvdvng

¹ Ru:ncpvnckc agomcm tadpc cmna tani:kvdv:dc Bvm nv:rumbomnamc, Bv Genesaret siycng bottcnc pa:tang ru:yido dagla dungai.

² Odokkc Bv ollung so:nyiko siycng bottcnc pa:tang ru:yido ka:begto; cmpige:la ongo sogabnc tani:kvdv:dc odokkc gvlenamla buluk csabkvdv:dcm nvla dungai.

³ Ollung asongkolo angge:la, okodc Simonka:nc, amo:dokki adji:oko ko:lendopc Bv bvm lulvgto. Odokkc Bv tedtungge:la tani:kvdv:dcm ollu:dokkc Bv luyirto.

⁴ Odokkc cdvlo Bv lungasutonc, Bv Simonmc luto, “O:rv:pc ko:lenna nok csabdcm ongoko crgappc cmna crrvgtoka.”

⁵ Odo Simonbv luto, “Ru:tuma ngolu yumc yumbu:do crto odokkc apirkosin pa:tomang! Ckvdaggom nok agomki ngo csabscm cryi:lvgyc.”

⁶ Odokkc bulu cdcmpc inamc, bulu bottaru:nc ongo kcrcngko crgabto; odokkc buluk csabkvdv:dc bedgcla:yam,

⁷ buluk ajonkvdv:dcm sodumsudopc akon ollu:dokkcm pcdyapla gogsuto. Odokkc bulu gvla ollu:so:nyipakdc cdcmpc bingka:nc, bulu jvnga:pcmnai igckang.

⁸ Cmpige:la Pitorbv cdvlo cdcm ka:toji, bv Jisukc kcra:do owa:to, scmpc lula, “Ngokkosokkc gvpakkangka, kapila:nc ngo pa:pkanc tani:yc, O: Ru:tum.”

⁹ Kapila:nc bv ka:la kangaksukang, odokkc cdc bvk lcdulo du:mvnnc appv:dcmsin, buluk crgapnam ongokvdv:dcm pa:la,

¹⁰ odokkc cdcmv:pc Jebidi:kc awo anyi Jakoblang Jo:nbv:sin, sc:kobulu Simonkc ijongvjona:ji. Odokkc Jisubv Simonmc luto, “Pcsoyoka; su:pakkolokkc no tani:ycm gagycpc.”

¹¹ Oddung buluk ollu:dcm tcmpv:do:pc konga:dokudodcm, bulu appvngcm mcpagamto odokkc Bvk lcdulo gvmvnamkang.

Jisubv Tani: Akoncm Csa:mokunam

¹² Bv nogor akolo du:dom, ngerong ro:bu:nam tani:ako gva:to; odokkc Bvm kumna:sola: luto, “Ru:tuma, no mc:dagmvlo, no ngom narc:mola:dakku.”

¹³ Odokkc Bvk alagcm laglento, odokkc bvm ri:yitto, scmpc lula, “Ngo mc:dag narcngtoka.” Odokkc oddung bvk ngero ro:namdc aikangku.

¹⁴ Odokkc Bv sc:komsin lugo:biyoka cmna lusv:la luto; ckvdaggom “Gvkang odokkc no avyc dormoager gernckvdv:dcm lcngkansuta:ka, odokkc nok narc:monamdok lcga:pc palvgnamko bita:ka, Mose:bv lulvgnamdcmpc, tani:kvdv:dcm arro cmna lcngkansunam lcgangc.”

¹⁵ Ckvdaggom cdcmyam bojcya:pc mo:tc mo:tc:pc Bvk agomc pvngapkang; odokkc bottcru:pc yadkumsunc tani:yc Bvk agomcm tadkapc gvkumsuto odokkc buluk kinam ramnam kvdv:dokkc aikupc cmna.

¹⁶ Ckvdaggom Bv yumra:pc gvpakkang odokkc kumto.

Jisubv Attungko Sipaknc Tani:ko Csa:mokunam

¹⁷ Odokkc longckoncm, Bv luyirra du:dom, Parisi: kvdvngclang lujvgla lunamdok luyirnc kvdvngc kcra:do tedla dungai, sc:kobulu Galildok appvng do:lungkvdv:dokkc odokkc Judia:dokkc odokkc Jerusalemdokkc gvkaji; odokkc Ru:tumkc ilang-gvlangc csa:modokupc Bvk lcdulo dungai.

¹⁸ Odokkc ka:toka, tani:ckkcnc attungko sipaknc tani:ako gvabotungai, odokkc bulu bvm ara:pc gva:bola Jisukc kcra:do lc:pc cmna mato;

¹⁹ Cmpige:la tani: kcrcdokki, bulu bvm boma:pc okolosin lambcm pa:ma:la, bulu mv:dumto:pc resa:to odokkc bvk asub tc:tc:pc ka:pori: selapdcm kurpakge:la Jisukc kcra:do ponkogdo ledyi:lvgto.

²⁰ Odokkc Bv buluk mc:jvgdcm kangge:la luto, “Tani:ya, nok pa:pkvdv:dcm mc:yinsubitobong.”

²¹ Odokkc ainc agom luyirnckvdv:dc odokkc Parisi:kvdv:dc tawunam agomcm tadrobbomkang, scmpc lula, “Sc sc:kobv:ncm Ru:ncpncmc aima:ng cmna luncsc? Ru:ncpvnc bv:ma:mvlo sc:kobv pa:bcm mc:yinsula:dang?”

²² Jisubv cdvlo buluk tawunam agomkvdv:dcm kintoji, Bv bulum tawuto, “Noluk asinkvdv:do kapila nolu agomcm mcnggo:dang?

²³ Okodc lupc lupoya:dang, ‘Nok pa:pkvdv:dcm mc:yinamsubitobong,’ cmnamdcmyc cdcmanggom ‘Darobtoka odokkc lambc gvtoka’ cmna lunamdcmyc?

²⁴ Ckvdaggom nolu kindopc cmna Tani:kc Awodokkc pa:bcm mc:yinsula:nanc ilang-gvlang dung cmna” Bv attungko sipaknc tani:dcm luto “Ngo nom ludung, darobtoka, nok asubcm la:sa:toka odokkc okumpc gvkangkuka.”

²⁵ Odokkc oddung bv buluk kangku:do durobkang, odokkc bv okolo kcdla dungaji cdcm la:sa:to, odokkc okumpc gvkangku, Ru:ncpvncmc aipai cmna.

²⁶ Odokkc bulu appv:dc ka:la kangaksumoto, odokkc bulu Ru:ncpvncmc aipai cmto odokkc pcsokang, scmpc lula, “Ngolu silo tadkv-kangkvma:nam agerko ka:to.”

Jisubv Lebi:m Gognam

²⁷ Odok lcdudo Bv gvlenkang, odokkc migom murkong urkumncko ka:begto, Lebi: cmna amin minnamko, migom murkong urkumko okumdo tedla du:dom; odokkc bvm luto, “Ngok lcdu lcdulo gvmvntok.”

²⁸ Odokkc bv appvngcm mcpakto, odokkc darobla Bvk gvko gvkolo gvmvnkang.

²⁹ Odokkc Lebi:b Bvk lcgangc bottcru:pc donam-tv:namko bvk okumdo ito; odokkc tcbuldo buluk lcdulo bojcrungko migom murkong urkumnc ajonclang angu angu tani:yc domvnna dungai.

³⁰ Odokkc Parisi:kvdv:dc:lang buluk ainc agom luyirnc kvdv:dc Bvk agom tadjvgla gvmvnnc tani:kvdv:dcm bvnbvnaila luto, scmpc lula, “Kapila nolu migom murkong urkumnc kvd:dokkilang papi:kvd:dokki dobo-tv:bosudon?”

³¹ Odo Jisubv bulum lubito, “Sc:kobulu csa:la du:nc bulu kinam ka:ncm mapcnam kamang, cmpige:la sc:kobulu mola:ma:ji bulumvn;

³² ngo dormo kanckvdv:dcm gokkapc gvmang, cmpige:la papi:kvdv:dcm asin mc:dvrra mcngkutsuyckupc cmna:mvn.”

Doma:-tv:ma:pc Menna Du:namdok Agom Tawunam

³³ Odokkc Bvm bulu luto, “Jo:nkc agom tadjvgla gvmvnnc tani:kvdv:dc lckko: lckko:lo menna dungge:la kumdag, odokkc cdcmv:pc Parisi:kvdv:dok agom tadjvgla gvmvnnc tani:kvdv:dc:sin, cmpige:la nokkckvdv:dc tv:dag-dodag.”

³⁴ Odokkc Jisubv bulum lubito, “Nolu mida:dok yamgurkvdv:dcm menna du:mola:dolang magbodc buluk lcdulo du:mvndodcm?

³⁵ Longcko pvnga:yc cdvlo magbodcm bulukkolokkcm gvpakbomyckuji, odokkc bulu odo longckvdv:do menyc.”

³⁶ Bv bulum kvkanna kvnam do:yvngkosin kvbito: “Sc:kosin anu gainlokkcm pedlenge:la odokkc aku gainkolo cdcm potaglvgmang; bv cdcmpc imvlo, bv cdc anudcm bedboyc, odokkc anudok inyopdc akudo omlusuguma:yc.

³⁷ Odokkc sc:kosin anu angur alangcm aku pvgcnglo pvmang; bv cdcmpc imvlo, anu angur ala:dc pvgc:dcm bugporyc odokkc cdc bidjeramyc, odokkc pvgc:dc bedporbedyoryc.

³⁸ Cmpige:la anu angur ala:dcm alang pvgcngkolo pvpa:ru:yc.

³⁹ Odokkc sc:kosin aku alangko tvngge:la anuko tv:lv:mang; kapila:nc bv ludo, ‘Sc akuscm ngamya:dang.’ ”