LU:KKC 3 - ANU LUGOD N. T. (BSI)

Jo:n Baptismo Binckc Lutad Lubinam

¹ Tiberiu Kaesarkc migomdodo dv:tak tagyvngkolang tanggodo, Pontiudok Pilatbv Judiadok amo: ru:tumpc ila:yam, odokkc Herodbv Galildok mo:tak appi:lok migom doncpc ila, odokkc bvk bvro Pilipbv Ituriangcla Trakoniti mo:tak appi:dok migom doncpc ila, odokkc Lisaniabv Abilenedok mo:tak appi:lok migom doncpc,

² dormo ager gernclok bottarya:ncpc Annakclang Kaiapa:bv iddom Ru:ncpvnckc agomc Jakaraiangkc awo Jo:nkolo:pc yumrangolo pvngangkang;

³ Odokkc bv Jordan mo:tak appv:do:pc gvto, pa:plokkcm mc:yinsudokupc asinc mcngkutsulangkula baptismo la:namlok luyircm lutad lutadgo:la.

⁴ Lungorlunc Isaiangkc potindo cdcm adkamdcmpc, “Yumrangolo akonc jc:dung: Ru:tumkc lambcdcm mopu:toka, Bvk lambcdcm yvg cmmotoka.

⁵ Appvng adi: anyidok pongkogcm owudmoyc, odokkc appvng adi:cmna: adji:nc adi:ycm etedmoyc, odokkc gc:nc lambc kvdv:dcm yvg cmmoyc, odokkc gvnying gvsonc lambckvdv:dcm gvpogvanmoyc;

⁶ Odokkc appvng tani:ope:yc Ru:ncsa:nckc moturdcm ka:begyc.”

⁷ Odo bv bvkkolo baptismo langkapc gvlennc kvdv:dcm luto, “C:i dvgnc tabv ope:ya! Sc:ko nolum a:pcnc aglv:dokkcm duggcdopc lutadbiton?

⁸ Asinc mc:dvrra mc:latsulangkula e:pcnam a:ycm e:toka, odokkc nolu av avyc lusurobyoka, ‘Ngolu:kkc Abrahambv ngoluk abbo dung’; kapila:nc ngo nolum lubidung Ru:ncpvncbv sc vlvngkvdv:sokkcm Abrahamkcpc ommangcm lenmola:dag.

⁹ Su:paksinci vsvngkvdv:dok appvrkvdv:do vgv:dcm tvgapla lc:tag; cdcmpidag ainc a:yc e:ma:nc vsvng appv:dcm tc:tapdag odokkc vmvlo cra:lvgdag.”

¹⁰ Odokkc yadkumsunc tani:kvdv:dc bvm tawuto, “Cmpcmvlo ngolu kapc iycn?”

¹¹ Odo bv bulum luto, “sckkc galugc bornyiko du:nc, sckkc kama:nc bvm bisumotoka; odokkc sckkc dogangc du:nc, bvmsin cdcmv:pc imotoka.”

¹² Migom murkong urkumnckvdv:dc:sin baptismo langkapc gvngapdo, odokkc bvm luto, “Luyirna, ngolu okkom iyya:n?”

¹³ Odokkc bv bulum luto, “Nolum cddvko urrangka cmtagnc cdcmyam bojcyangko uryoka.”

¹⁴ Mimag monckvdv:dc:sin bvm tawuto, “Odokkc ngoluna okkom iycn.” Odo bv bulum luto, “Sc:komsin sa:jcmna rodkudyok, cdcmanggom lume:pc aimang cmna lulvgyok, odokkc noluk ager gerrcnamdok pa:namongcm mc:tv:sulangka.”

¹⁵ Tani:kvdv:dc toya:la du:la:ycm, tani: av avkc asinkvdv:dc Jo:nkc agomcm mcngkvamto, Bv Kristobv:nci bv:ma:nci cmna,

¹⁶ Jo:nbv bulu appv:dcm lubito, “Ngo nolum asilo baptismongcm bidung; cmpige:la ngom sc:kobv kvnggv:ya:dagnc cdc, sck panoti:lok rvbbcmsinci ngo sarbila:pcncpc arc kama:nc; Bv nolum Angunnc Yalodokki odokkc vmvkokki Baptismongcm biyc.

¹⁷ Yvgko lottadokkcm mopu:napc, odokkc gewu a:m kvdv:dcm Bvk kumsu:do yarkumsukupc, Bvk kappu:nanc cpodc Bvk alakdo dung, cmpige:la ampckvdv:dcm bv cdvlosin midkuma:nc vmvlo rompakycku.”

¹⁸ Cdcmpc, bojcrung luyir agomki, bv tadponc lutaddcm luyirgo:to.

¹⁹ Cmpige:la Herod mo:tak appi:lok migom doncdc bvkkokki sc:kobvm Herodia:kc lcgangc, aisi:ma:nc cmna aima:pc lutonc bvk bvrodok nc:ngc cmna, odokkc Herodkc gernam aima:n ager appv:dcmsin, bulum lungabiga:lok

²⁰ bv Jo:nmc makana:lo tumna lc:to.

Jisukc Baptismo La:nam

²¹ Cdcmpc appv: tani:ycm baptismo bingapnammc, odokkc Jisumcsin baptismo binamc odokkc kumna du:namc, taycng amo:tok yabgo moge:kang,

²² odokkc Angunnc Yalodc Bvk tayc:do amvr-amo ka:begpc dc:yi:kang, pckv apirkoncmpc, odokkc taycng amo:tokkc gomugko lukang, “No ngok mc:bomsunam Awodc; nokkolo ngo airu:pc mc:lvgsudag.”

Jisukc Ope:ncgvng Kvdvng

²³ Jisubv cdvlo Bvk agercm gerrobomtonc, dv:tak yingumkopc ikvramdagaboi, Josepkc awopc (cdcmpc mcngkamdcmpc,) Josepbv, Heli:kc aowai,

²⁴ Heli:bv Mattatkc, Mattatbv Lebi:kc, Lebi:bv Melki:kc, Melki:bv Mattatiakc,

²⁵ Mattatiabv Amoskc, Amosbv Nahumkc, Nahumbv Esli:kc, Esli:bv Naggaikc, Naggaibv Maatkc,

²⁶ Maatbv Mattatiakc, Mattatiabv Semeinkc, Semeinbv Josekkc, Josekbv Joda:kc,

²⁷ Jodakbv Joanankc, Joananbv Resa:kc, Resa:bv Jerubbabelkc, Jerubbabelbv Shealtielkc, Shealtielbv Neri:kc,

²⁸ Neri:bv Melki:kc, Melki:bv Addi:kc, Addi:bv Kosamkc, kosambv Elmadamkc, Elmadambv Erkc,

²⁹ Erbv Josuakc, Josua:bv Eliejerkc, Eliejerbv Jorimkc, Jorimbv Mattatkc, Mattatbv Lebi:kc, Lebi:bv Simionkc,

³⁰ Simionbv Judakc, Judabv Josepkc, Josepbv Jonamkc, Jonambv Eliakimkc, Eliakimbv Meleakc,

³¹ Meleabv Mennakc, Menna:b Mattatakc, Mattata:bv Natankc, Natanbv Dawidkc.

³² Dawidbv Jisse:kc, Jisse:bv Obedkc, Obedbv Boajkc, Boajbv Sala:kc, Sala:bv Nasankc,

³³ Nasanbv Amminadabkc, Amminadabbv Admikc, Adminbv Arni:kc, Arni:bv Hejronkc, Hejronbv Perejkc, Perejbv Juda:kc, Juda:bv Jakobkc,

³⁴ Jakobbv Isaakkc, Isaakbv Abrahamkc, Abrahambv Terakc, Tera:bv Nahorkc, Nahorbv Serugkkc,

³⁵ Serugbv Reukc, Reubv Pelegkc, Pelegbv Eberkc, Eberbv Shela:kc, Shela:bv Kainankc,

³⁶ Kainanbv Arpajadkc, Arpajadbv Shemkc, Shembv Noakc, Noabv Lamekkc,

³⁷ Lamekbv Metuselakc, Metuselabv Enokkc, Enokbv Jaredkc, Jaredbv Mahalelkc, Mahalelbv Kainankc, Kainanbv Enoskc,

³⁸ Enosbv Getkc, Getbv Adamkc, Adambv Ru:ncpvnckc aowwai.