LU:KKC 21 - ANU LUGOD N. T. (BSI)

Tumbo Nc:dok Ru:ncpvncmc Binam

¹ Bv bcrsa:la ka:namc mircmnc kvdv:dc aman kvdv:dcm murkong lvgkumsukodo lvgtagsudungai;

² odokkc ta:m anvr murkong pirnyikopc lvga:lvgnc opan tumbo nc:ngkoncm Bv ka:begto.

³ Odokkc Bv luto, “Aropakpc ngo nolum lubidung, sc opan tumbonc:sc bulumyam bojcyanko lvgto;

⁴ kapila:nc bulu appv:dc buluk bojcru:lokkcm bidumsuto, cmpige:la bv opange:la:gom bvkkc cddvko dungaji cdc appv:dcm lvgamlvgto.”

Jisubv Kumko Okumdok Momvgnamdcm Lunam

⁵ Odokkc kumko okumdok agomcm akke lunamc, cddvkojc cdc kangkannc vlvngkokkila: amanpc binam attarki moru:lvgtaganc, bv luto,

⁶ “Noluk ka:begnam sc attarkvd:sok lcgang, longckvdv:dc a:yc cdvlo sido vlvng apvkosin akon tayc:do akoncm lc:namdcm yoppakma:pc mcma:yc.”

Mc:dvrmc:songcla: Mogvtmomat

⁷ Odokkc bulu Bvm tawuto, “Luyirna cdvlo cdcbulu iycn, odokkc kapinc kanggodpc iycn cdvlo cdc lenycji?”

⁸ Odo Bv luto, “Nolumjen gvyodla gvbopckc ansutoka; kapila:nc bojcrungc ngok aminno scmpc lula: lula gvyc, ‘Ngo Bv!’ Odokkc ‘Ayirdc aninpc pvnga:dandu:bong!’ Buluk lcdulo gvyoka.

⁹ Odokkc cdvlo nolu mimag monamcla: urratko:latnammcm tadbegycnc; pcsoma:pcka: kapila:nc cdc lenpo:danna lenycrung, ckvdaggom lentcrlenabdc vgcmpc lenapma:yc.”

¹⁰ Odo Bv bulum luto, among du:tcng ope:kvdv:dc dagka:mvnsuyc, migom dotcng among kvdv:dc migom dotcng among kvdv:dokki;

¹¹ bottcru:nc tarcmo:ton tonyc, odokkc angu angu mo:di:lo dopa:-tv:pa:ma:namclang ka:pvtla:ma:nam ankonsunc kinamc; odokkc pcsokonnobulu odokkc bottcru:nc kanggodc taycng amo:tokkcm ka:begyc.

¹² Ckvdaggom sc appv:sok po:pc bulu nolum alagcm pigabla nolum irvsinyyom ingapyc, nolum kumko okumkvdv:do togcngamlvgla odokkc makanang kvdv:do, odokkc nolum migomkvdv:dok kangkolo soangbomyc odokkc amo:ru:tum kvdv:dok kcra:lo ngok amin lcgangc.

¹³ Cdc ayirdc noluk lcga:pc nolu:kkcpc lukansubinam ayirpc iyc.

¹⁴ Cdcmpidag cdcm noluk asinkvdv:do mc:satsutoka, kapc agomcm po:pcbong lulatsupcnammcji cmna mc:ma:pc du:pc;

¹⁵ Kaila:nc ngo nolum nappangkala kinnamko biyc, okodcm noluk agom tadma:pc lunc akosin lurasula:ma:yc cdcmanggom lukepla:ma:ycji.

¹⁶ Nolum noluk ancabu kvdv:dcmsinci odokkc bvrrang kvdv:dc odokkc ope:ncgvng kvdv:dc:la: ajonkvdv:dc topakyc, odokkc nolukkolok akkem sidopc tolvgyc;

¹⁷ noluk appvngcm ngok amin lcgangc tayumyc.

¹⁸ Ckvdaggom noluk mittuk kvdv:dok dumvt asongkosinci yogma:yc.

¹⁹ Noluk sagtumsula du:namdokki noluk turnamkvdv:dcm pa:ycpc.

Jisubv Jerusalemdok Momvgmosvgnamdcm Lunam

²⁰ “Cmpige:la cdvlo Jerusalemdcm mimagmonc amikokki yadribomycnc, odo kinnangka odok mopidnammc aninpc pvngangka:bong.

²¹ Odo Judia:dok du:nckvdv:dc adi:do:pc duglangka, odokkc cdc nogor ara:dok du:nckvdv:dcm gc:rammotoka, odokkc dunggong among kvdv:dok du:nckvdv:dcm odopc gva:moyokuka;

²² Kapila:nc cdcbulu palvg lvgnam longgc, adla lc:namdcmpc inamc.

²³ Yowyc yowa sc:kobulu amvrro du:ycnc odokkc sc:kobulu kowwcm anyugcm sunycji bulu:kkcpc pcsso! Kapila:nc bottcru:nc dungkoycko kama:pc mo:pvsc iyc odokkc sc tani:kvdv:sok tayc:so aglvngcm lv:yc;

²⁴ bulu madsvg tu:bvlo owa:yc, odokkc appvng opvnnok ara:lo yc:bomamkunampc iyc; odokkc Jerusalemdcm Ru:ncmc kinma:nc tani:kvdv:dokki sammvgyc, Ru:ncpvncmc kinma:nc tani:kvdv:dok ayirdc pvngapma:sisscm.

Tani:kc Awodc Gvkunamdc

²⁵ “Odo do:nyitc:la po:lotc kanggodc lenyc, odokkc mo:pvso opvnkv:dv:dok pcsoko a:la dungkinyckinma:yc siycng asi ngomdodo,

²⁶ tani:kvdv:dc pcsola aso:pc dungapla okko pvnga:doji mo:pvso cmna ingapyc. Kapila:nc taycngamo:tok torpc ilanggvlangkvdv:dcm mokungamyc.

²⁷ Odokkc odo Tani:kc awodcm mukkang atakkolo ilanggvlang tornamki odokkc bottcru:nc amin gvnamki gvidokupc ka:begycku.

²⁸ Cdcmpinamc cdvlo cdcbulu irobbompc iycji, nge:sa:lang odokkc noluk mittukkvdv:dcm vsa:lang, kapila:nc noluk mopvnammc anin aninna gvdu:bong.”

Tajvg Vsvngdokkcm Kinpcnam Agom

²⁹ Odokkc Bv bulum kvkanbinam do:yvngko kvbito: “Tajvg vsvng amv:dcm ka:toka, odokkc vsvng amvng appv:dcm;

³⁰ cdcbulu annc nginsangkumvloi, nolu avkc lcgangc avyc ka:sulangka odokkc kinnangka jc dviyc anincika:bong.

³¹ Cdcmv:pc, cdvlo nolu cdc lendopc ka:begycnc, nolu kinnangka jc Ru:ncpvnckc migom doko mo:pvdc aninka:bong.

³² Aropakpc, ngo nolum lubidung, sc ope:sc appv:dc lenma:sisscm yogma:yc.

³³ Taycng amongcla mo:pvsc yogpagycpc, ckvdaggom ngok agomkvdv:sc gvpakma:yc.

Toya:la Darra Du:pcnam

³⁴ “Cmpige:la nolu avyc avkc lcgangc ansutoka ckvma:mvlo noluk asinkvdv:dc dose-doyela:lang tvngvr:dowursunam mcngkolo mc:dutsuyc odokkc sc turnamkvdv:sok agomcm mc:yoka, odokkc cdc longcdc nolum vgcmpc ketelebcmpc scbgabyc;

³⁵ kapila:nc cdc mo:pvso nolu turra du:nc appv:so a:yc.

³⁶ Ckvdaggom appvng ayirro ka:sula du:langka, nolujen cdc appv:dc lendodcm dugpvtsunanc tornamcm pa:dopc kumna du:langka, odokkc tani:kc Awodok kcra:lo dagkansula:dopc.”

³⁷ Odokkc lo:dvscm Bv kumko okumdo luyirdungai, cmpige:la yummcm Bv Olib cmnam adi:kolo du:yubsukapc gvdungai.

³⁸ Odokkc rokompc tani:appv:dc kumko okumdo:pc Bvk agom tadkapc gvdungai.