LU:KKC 15 - ANU LUGOD N. T. (BSI)

Yognc Bera Sobendc

¹ Cdcmpidodo migom murkong urkumnckvdv:dc odokkc papi:kvdv:dc appv:dc Bvk agom tadkapc kcra:do:pc gvangamto.

² Odokkc Parisi:kvdv:dc:la ainc agom luyirnckvdv:dc bvn-bvnaila luto, scmpc lula, “Sc tani:sc papi:kvdv:dcm torvgsudag odokkc buluk lcdulo dobosudag.”

³ Cdcmpila Bv sc kvkanbinam do:yv:scm bulum kvbito: “Nolukkolok oko tani:dc, lvngkokopc me:r sobenc du:ncdc,

⁴ odokbuluk adorko yogycmvlo, cdc na:ying kolang konangdcm yumra:l mcpongge:la, cdcm pangkuma:sisscm odokkc okodc yogkaji cdcm makapc gvma:n?

⁵ Odokkc bv cdvlo cdcm pa:dakkuji, bvk gordu:do cdcm jongkoksudag, mc:po mc:pola.

⁶ Odokkc bv cdvlo okumpc gvyckuji, bv bvk ajonkvdv:dcmlang kumrv-ko:rvkvdv:dcm scmpc lula bulum gogsuyc, ‘Ngok lcdulo mc:pomvntoka, kapila:nc ngog yognc me:r sobendcm ngo pa:tungku.’

⁷ Ngo nolum lubidung, cdcmarpc idag, taycng amo:to papi: akolok lcgangc sc:kobv asinc mc:dvrla mc:latsuyckuji na:yingkolang konang dormo kanc kvdv:dcmyam sc:kobulu asinc mc:dvrra mc:latsukupcnamc kama:ji.

Yognc Anvr Murkong

⁸ “Cdcmpcmanggom oko nc:dc, anvr murkong pirnyiko du:dom, apirko yogmomvlo, saki:ko runotge:la okum appv:dcm mami:-miri:la cdcm pangkuma:sisscm makuma:nc du:n?

⁹ Odokkc cdvlo cdcm pa:yckuji, bv ajonkvdv:dcm odokkc kumrv-ko:rvkvdv:dcm lckopc gogkkumsudag, scmpc lula, ‘Ngok lcdulo mc:pomvntoka, kapila:nc ngok yogmonam anvr murko:dcm ngo pa:tungku.’

¹⁰ Cdcmpc, ngo nolum lubidung, Ru:ncvnckc agom lutad lunckvdv:dok kangkolo papi:nc akonc asinc mc:dvrra mc:latsuyckumvlo mc:podag.”

Yognc Ko:dc

¹¹ Odokkc Bv luto, “tani: akonc dungai sckkc awo anyiko dunggaji;

¹² Odokkc buluk ame:nc awodc Bvk abudcm luto, ‘Ba:ba, ngok pa:pcnam attardok ngom bi:.’ Odokkc bv ompoti: du:nc du:ncdcm bvnyi anyikolo orpansubito.

¹³ Bojcru: longcko ima:dapci, ame:nc ko:dc bvkkc oko okko dungaji langkumsuto odokkc mo:tc:ru:nc amongkolo:pc bv gvkang, odokkc bv odo bvk attar kvdv:dcm cmmumpc ilvng-gvlv:namdcmci ilanggvla mose-moyeamto.

¹⁴ Odokkc cdvlo bv appv:dcm pitpagamtonc, bottcru:nc dopa:tv:pa:manamko odo amo:do lenkang, odokkc bv okkosin kama:pc irobbomkang.

¹⁵ Cdcmpila bv gvla odo amo:dok tani:akolo du:mvnto, sc:kobv bvm arvgpc mclvgla e:gkvdv:dcm po:nyok bidopc mctoji.

¹⁶ Odo bv airu:pc e:g donam po:nyokdcm dola dotv:supc cmna mc:to; odokkc sc:kosin bvm o:kosin bitomang.

¹⁷ Cdcmanggom cdvlo bv av avdc mcnga:sulangkula bv lusuto, ‘Ngok ba:bukc dorla ager germonam kvdv:dokkcjc cddvko pitangc du:nc odokkc dongatla lc:pcsin, cmpige:la ngo sido kcno:la siycbong!

¹⁸ Ngo darobla ngok ba:bukolo:pc gvycku, odokkc ngo bvm luyc, “Ba:ba, ngo taycng among lukamma:pclang nok lukamma:pc pa:bcm ito.

¹⁹ Ngo nok awwo cmna lckoda lusupcnamma:bong; ngom nok dorra ager germonam kvdv:dok akoncmpc iteibong.”

²⁰ Odokkc bv darobla bvk ba:bukodo:pc gvkangku. Cmpige:la bv mo:tc:pc du:dodo:boi, bvk abudc bvm ka:to odokkc ayangc mole:pc mcngkang odokkc bvm dugla gomyetge:la dosukto.

²¹ “Odokkc awodc bvm luto, ‘Ba:ba, ngo taycngamong lukam tadma:pc odokkc nok lukampc tadtomang; ngom nok aowomna gogpcnamma:bong.’

²² Ckvdaggom abudc bvk ager gerya:nc kvdv:dcm lulvgto, ‘Mcna:pc migom gcnam aiyangarnc gcnamdcm la:tok, odokkc bvm cdcm molvgtok; odokkc bvk alagdo angoti:ko molvgtok, alcdo lcyugko;

²³ odokkc o:sa:la jv:dopc lc:nam so:bo awodcm ba:tok, odokkc kajc dola:tv:lai odokkc mc:polai;

²⁴ Kapila:nc sc ngok awosc sikangai, odokkc su:pak lckoda turkangku; bv yokkangai, odokkc pa:toku,’ odokkc bulu mc:porobbomkang.

²⁵ “Cdcmpidodcm bvk abv:n awodc arvgolo dungai; odokkc bv gvlangkula okum anindo pvnga:dokudodcm, bv ni:tom monamcla sonamcm tadbegto.

²⁶ Odokkc bv ager gerya:nckvdv:dok akoncm gogto odokkc cdcbulu kapidu:ji tawuto.

²⁷ Odokkc bvm bv lubito, ‘Nok bvrodc gva:dungku, odokkc nok ba:bo jv:nc awo so:bodcm ba:to, kapila:nc bvm atvkosin tvma:dopc pa:toku.’

²⁸ “Cmpige:la bv aglvng sa:la okum ara:pc gva:pc gva:lv:tokumang. Bvk abudc gvlento odokkc bvm kumna:sola goga:toku,

²⁹ Cmpige:la bvk abudcm bv luto.’ Ba:ba ka:tok siddv dv:takko ngo nok agercm gerto, odokkc ngo cdvlosin nok agom lulvgnammcm tadma:pc dungkvmang. Ckvdaggom no cdvlosin soben-awo adorkosinci ba:bikvmang, ngok ajonkvdv:dcm dobosuycpc cmna.

³⁰ Cmpige:la sc nok awosc cdvlo gva:tokuji, sc:kobv nok attarkvdv:dcm aima:nc nc:ngkvdv:dok lcdulo mose moyela dopaktoji, no bvk lcgangc jv:nc awo so:bodcm ba:tonc!’

³¹ Odokkc bv bvm luto, ‘Awosa no lo:dvscm ngok lcdulo du:mvndung, odokkc ngok appv:dc nokkc.

³² Mc:pomcngannamdc airu:dagai, kapila:nc sc nok bvrosc sikangai, odokkc turkangku; bv yokkangai, odokkc pa:toku.’ ”