JU:D 1 - ANU LUGOD N. T. (BSI)

¹ Ju:dbv, Jisu Kristokc ager gerya:nc odokkc Jakobkc bvrro– Cdc sc:kobulum gogtagji bulukkolo:pc, Ru:ncpvnckolo odokkc Abudo aipc mc:bomsunamdo odokkc Jisu Kristokcpc lc:nam kvdv:do:pc:

² Aya:pc mc:yinsunamc, mcnganc odokkc aipc mc:namc nolukkolo bojcrungko dungka:langka.

Lume:lula Luyirnckvdvng

³ Mc:bomsunam kvdvnga, ngoluk appvngc pa:nam mopvtdok agomcm kvnggv:pc nolukkolo:pc adlv:la ngo cdcm nolum lugotpc lula adpcnamdcm aidopc ka:to mc:jvgdok lcgangc gagtvla du:nam lcgangc okodcm lcko atcro:lo aipc kumnc tani:kvdv:dcm bitobo:ji.

⁴ Kapcnc akke lc:sula gva:nammcm avpc pa:tobong sc:ko bojcrungko po:pcbong cdc lukenamdcm lulvgtungaji, dormokama:nc amikvdv:dc sc:kobulu ngoluk Ru:ncpvnckc aya:pc mc:namdcm aima:pc luyotla lubidagji mc:bo-ka:bogo:namlo:pc odokkc ngoluk Gvgurbonclang Ru:tum, atcrongdcm Jisu Kristomc lupakla ludagji.

⁵ Su:pak ngo mc:dag nolum mc:pa:mokupc cmna, nolum lcko atcro:lo lubitu:bonggom, jc sc:kobv tani:ko Igip among ara:dokkcm mopvtonnc, lcdupc mokkeamto sc:kobulu mc:jvgtoma:ji.

⁶ Odokkc taycng lutadkvdv:dc buluk avkc dunggodcm du:toma:nc cmpige:la buluk du:tcng du:namcm mc:tonc Bv lodvlongkvpc ikoli:ki yc:la lc:tobong kcvgkkc uiamo:bo cdc kcba:ba:nam bottcru:nc longdo:pc;

⁷ Kappar Sodomdc:lang Gomora:dc odokkc dunggo:-ycgong nogor kvdv:dcm, okodc cdcmv:pc aisi:ma:pc itoji odokkc ipcgvpcma:namcm mc:boka:bom mc:toji, lukan-bikancmpc idag lo:dvlongkvpc turnamdok palvgnam pa:la.

⁸ Ckvdaggom cdc ikamgvkamv:pc cdc tani:kvdv:dc buluk ma:nying mangkolo adin amvrdcm narc:ma:pc imodag, lulvglunc migom amidcm tadka:ma:pc lugc gcdag, odokkc aipc amin gvnckvdv:dcm aima:pc lugcdag.

⁹ Cmpige:la cdvlo ru:tum taycng lutad lunc Mikaelbv aima:nc uidokki pa:pc cmna rotka:mvnsutonc, Mosc:kc sima:dok lcgangc pamvnsula, bv aima:pc luka:mvnsunam kcbangko bvm ba:pc cmna mcngka:la ka:no:mangai, cmpige:la luto, “Ru:tumbv nom ge:dag.”

¹⁰ Cmpige:la sc tani:kvdv:sc ge:dag aima:pc lugc gcdag okodcmci bulu mc:ngkinma:ji, odokkc cdc attardokki jc bulu kindag aginpc mcngkampc mc:nam gvnamki kapc okkomsin kinma:nc simvnkvdv:dc idagji, bulu mokkeyamkosudag.

¹¹ Bulukkcpc mc:dvrpcnamc! Kapcnc bulu Kainkc lambclok lambcm gvdag, odokkc arc pa:nam lcgangc avkvdv:dc mc:paksudag Balaamkc imurgvmurdcm, odokkc Kora:kc birudi:pc mimag monamdo singabamdag.

¹² Cdcbulu aisi:ma:nc imur-gvmurc noluk aipc mc:mvnsula donamtv:nam kvdv:do, kapc bulu bottcpc jcngka:mvnsudag, akoncm akonc ka:mvngo:la bulu avavkvdv:dc; aisi:ma:nc mukkangcbulu, csarki yugo:bomnamc; lcddarpc bvrduglok a:yc kama:nc vsvngc, lcnyikopc sinnc, appvrcm busa:nammc;

¹³ siycnglok bottcru:nc asi lu:nc, buluk avkc anyingcm pimpudcm tayc:pc lu:sa:monnc; dcnggo:nc takarc odokki lcgangc bclc ui aru:bcm lo:dvlongkvlo:pc mc:danna lc:tagji.

¹⁴ Cdc odogbulungvngkai jc Inosbv Adamkolokkc kvnvd opvndo scmpc lula, lungorlubika, “Ka:toka, Ru:tumbv Bvk appvng kvla kvngapla:ma:nam kokki kcbangcm bangkakupc gvka,

¹⁵ odokkc appvng dormokama:ncm mcnga:modokupc buluk dormokama:nc ager gernckvdv:dokkcm okodcmbulu itogvtoji cdcmpinc dormokama:nc lambclo, odokkc appvng torpc lunam tanyi:pc lunam agomkvdv:dcm okodcm dormokama:nc pa:pikvdv:dc lutoji Bvk birudi:pc.”

¹⁶ Cdcbulu ngvr ngvrainc, mc:tv:suma:nc migom birudi:pc, buluk avkc mcngkam gvkampc incgvnnc, bottcpc nappangc bc:la lubonna lusunc, atv arcko pa:pc cmna tani:kvdv:dcm luyumlupola.

Lurvdla Lutadclang Luyir

¹⁷ Cmpige:la nolu mc:pa:ru:pa:yc, mc:bomsupcnam kvdvnga, ngoluk Ru:tum Jisu Kristokc luno:la lunamkvdv:dcm;

¹⁸ bulu nolum luto, “Du:tcr dungap ayirdo aima:pc lugc gcgo:nc lenyc, buluk dormo kama:nc ka:bomc:bonam kvdv:dcmpc.”

¹⁹ Odobulu sc:kobulu angunammcm angumodagnc, mo:pvsok tani:kvdv:dc, yalodokkc gvpakdag.

²⁰ Cmpige:la nolum mc:bomsunamkvdvnga, av-avyc nolu mosa:sutoka noluk airu:pc angunnc mc:jvgnam kvdv:dokki; Angunnc Yalodo Kumnangka;

²¹ nolu avyc Ru:ncpvnckc aipc mc:namlo du:sulangka; Ru:tum Jisu Kristokc lo:dcm du:tvnc turnamdcm pa:ma:dodo:pc toya:la du:langka.

²² Odokkc akkem mcnga:motoka sc:kobulu mc:momc:yadagji;

²³ Akkem vmvdokkcm, bulum tvgpakla mopvttoka; akkem pcsoki mc:yinsula, adin–amvrdokki narc:ma:dopc inam gasor galukdcm tayumna:gomci.

Aipai Binamlok Kumnam

²⁴ Su:pak Bvkkolo:pc sc:kobv nolum oledma:dopc du:bodagnc odokkc nolum Bvk amin gvkodc mc:po mc:pola atv imurko kama:dopc gva:mola:dagnc, cdc Ru:ncpvnc akko:do:pc,

²⁵ ngoluk Mopvtnc Jisu Kristokc ngoluk Ru:tumkolo:pc, amin gvnamc, migang ga:namc, motapnammc, odokkc migomdonamc, appvng ayirdok po:pcbong odokkc su:pak odokkc lo:dv longkvpc-ika:langka. Amen.