JO:N 8 - ANU LUGOD N. T. (BSI)

Aima:nc Ager Gerla Du:dom Gagnam Nc:dc

¹ Rokompc longkondo Bv kumko okumdo:pc gvto;

² tani: appv:dc Bvkkolo:pc gva:to, odokkc tedtu:la bulum luyirto.

³ Agom adgabya:nc kvdv:dc:lang Parisi:kvdv:dc nc:ng akoncm aima:nc ager gerdom gagla boma:to,

⁴ odokkc pongkokdo bvm lcngge:la Bvm luto, “Luyirna, sc nc:scm amikokki aima:pc ika:mvnsudowcm gagto.

⁵ Cmpinamc Mose:kc lujvglurodo ngolum cdcmpinncm vlvngki gckedopc lutag. No bvk agomcm okkomna ludu:n?”

⁶ Cdcm bulum Bvm anka:la ka:pc cmna luto, bulujen Bvk tayc:lo atvko lujcmko lupc cmna. Jisubv tu:mapge:la Bvk lakke:dokki amo:bolo adto.

⁷ Odokkc Bvm bulu tadtvla du:la:ycm, Bv darobto odokkc bulum luto, “Sckkc pa:bc kama:nc bvm vlv:dcm cra:danna bvkkolo:pc crmotok.”

⁸ Odokkc lckoda Bv tu:mapto odokkc Bv lakke:dokki amo:bo adto.

⁹ Cmpige:la cdvlo bulu cdcm tattoji, bulu gvngapkangku, ako akko:pc, abvngarya:ncdokkc gvgcbomdanna, odokkc Jisumc cdc nc:dcm Bvk kcra:do atcro:dcm dagla du:moge:la.

¹⁰ Jisubv bvm kangge:la luto bvm, “Nc:nga, bulu okola:n? Sc:kosinyc nom aima:nc cmna lutoma:n?”

¹¹ Bv luto, “Akosin, Ru:tuma.” Odokkc Jisubv luto, “Ngo:sin nom aima:nc cmna luge:mang, odokkc gvkangkuk lckoda pa:bcm iyokubong.”

Jisubv Mo:pvsok Pvangdc

¹² Jisubv lckoda bulum luto, scmpc lula, “Ngo mo:pvsok pvangc; sc:kobv ngok lcdulo gvmvnycnc kcmolo gvgo:ma:yc, cmpige:la turra du:namsok pvangcm pa:yc.”

¹³ Parisi:kvdv:dc odo Bvm luto, “No avkc agomcm avyc lukansunamcm lubidung, nok lukanbinamdc aromang.”

¹⁴ Jisubv lubito, “Ngok avkc agomcm lukanbidaggomci ngok lukanbinamdc arro, kapcnc ngo kinsudag ngo okolokkc gvdu:ji odokkc ngo okolopc gvdagji, cmpige:la nolu okolokkc gvdu:song cdcmanggom okolopc gvycsong ngo kinmang.

¹⁵ Nolu adinamvr mcngkampc kcbangcm ba:mang.

¹⁶ Ckvdaggom ngo kcbangcm ba:mvlo, ngok atcrongc kcba:dcm ba:mang, cmpige:la ngo:lang Bv sc:kobv ngom mclvgtoji.

¹⁷ Noluk lujvgluro kvdv:dc adtak jc tani: anyilok lukanbinamdc arro;

¹⁸ Ngo avkcpc avyc lukansudo, odokkc Abudc sc:kobv ngom mclvgtagnc ngom lukanbidag.”

¹⁹ Bulu Bvm cdcmpila tawuto, “Okolon nok Abudc?” Jisubv lubito, “Nolu ngomba: ngok Abudcmba: kinmang; nolu ngom kinya:mvlo, nolu ngok Abumcsin kinya:pc.”

²⁰ Sc agomkvdv:scm Bv murkong kumsu:do luto, kumko okumdo Bv luyirtu:la; ckvdaggom sc:kosin Bvm ycnggabtomang, kapila:nc Bvk ayirdc pvnga:mangada.

Ngo Okolopc Gvycnc Nolu Gvla:mang

²¹ Bv bulum lckoda luto, “Ngo gvpakycku, odokkc nolu ngom mayc odokkc noluk pa:pkokki siyc; okolopc ngo gvdagji nolu gvla:ma:nc.”

²² Odo Jiwukvdv:dc luto “Bv avdc mokesuycnci, Bvk lukamdcmpc, ‘Ngo okolopc gvdagji nolu gvla:mang cmna’?”

²³ Bv bulum luto, “Nolu kcvgsokkc, ngo tayc tokkc; nolu sc mo:pvsokkc, ngo sc mo:pvsokkcmang.

²⁴ Ngo nolum lubidung noluk pa:pkvdv:dokki nolu siycku, kapila:nc ngo Bv cmna mc:jvgma:sisscm noluk pa:pkvdv:do nolu siycku.”

²⁵ Bulu Bvm tawuto, “No sc:kobvn?” Jisubv bulum lubito, “Ngo okodcm lua:dodokkcbong ngo nolum lubiton.

²⁶ Ngo noluk agomcm bojcrungko lupcnammc dung odokkc bojcrungko kcbang ba:pcnammc; cmpige:la sc:kobv ngom mclvgtagnc Bv arro, odokkc mo:pvscm lugo:bido ngo okodcm Bvkkolokkcm tattoji.”

²⁷ Bulu Bv:jc Abudok agomcm luka cmna tadkintomang.

²⁸ Cdcmpila Jisubv luto, “Nolu cdvlo Tani:kc Awodcm la:sa:ycnc odo nolu ngo:jc Bv cmna kinycpc, odokkc ngo avkc inagvnanckokki okkomsin imang cmna cmpige:la Abudok luyirkammcmpc ludo.

²⁹ Odokkc sc:kobv ngom mclvgtagji ngok lcdulo dung; Bv ngom atcrc mcpakmang, kapila:nc ngo lo:dvscm Bv okodcm mc:podagji ido.”

³⁰ Bv cdcmpc lunamdcmpc, bojcrungc Bvm mc:jvgto.

Avmc:supc Du:nc Tani:yclang Pagbokvdvng

³¹ Jisubv odo Jiwukvdv:dcm luto sc:kobulu mc:jvgtoji,

³² “Nolu ngok agomno mc:jvgtvla du:mvlo, nolu aroru:pc ngok agom tadjvgla gvmvnnc, odokkc nolu arodcm kinyc, odokkc arodc nolum motuyc.”

³³ Bulu Bvm lubito, “Ngolu Abrahamkc opvnc, odokkc cdvlosin sc:kokolo:sin tumna lcngkv-kosumang. No kapc ludu:n, ‘Nolum moge:lvgyc cmna’?”

³⁴ Jisubv Bulum lubito, “Aroru:pc aroru:pc, ngo nolum lubidung, pa:p inc takamc pa:plok pagbo.

³⁵ Pagbodc lo:dvscm du:yarla okumdo du:mang, awodc lo:dvscm du:yartvla du:dag.

³⁶ Cdcmpidag Awodc nolum motudagmvlo, nolu aropakpci motunammc.

³⁷ Ngo kindag nolujc Abrahamkc opvnc cmna; ckvdaggom nolu ngom mokepc cmna mago:dag, lcga:dc ngok agomc nolukkolo dungkoko pa:mang.

³⁸ Ngo agomcm ludung okodcm ngok Abukokki ka:begdagji, odokkc noluk abudokkcm okkom tattoji cdcm idag.”

³⁹ Bulu Bvm lubito, “Abrahambv ngoluk abbo.” Jisubv bulum luto, “Nolu Abrahamkc ommangamvlo, Abrahambv okkom ikaji nolu iyya:pc,

⁴⁰ ckdaggom su:pak nolu ngom mokepc cmna mago:dag, nolum arodcm oko tani:dc lubitonc okodcm ngo Ru:ncpvnckolokkcm tattoji; Abrahamkc inamdc cdcmpc imangai. Noluk abudc okkom ikaji cdcm itok.”

⁴¹ Bulu Bvm luto, “Ngolum jo:ra:pc onammangai; ngolukkc Abbo ako dung, Ru:ncpvnc bvci.”

⁴² Jisubv bulum lubito, “Ru:ncpvncbv noluk Abuya:mvlo, nolu ngom aipc mc:ya:pc, kapcnc ngo Ru:ncpvnc kolokkc lennc odokkc gvnnc; ngo avkc mcngkampc gvmang, cmpige:la Bv ngom mclvgtung.

⁴³ Nolu kapila mcngkin-tadkinma:n ngo okkom ludu:ji? Cdc lcga:dc nolu ngok agomkvdv:dcm tadrasula:ma:la:mvn.

⁴⁴ Nolu noluk uiabudokkcmmvn. Bv lendoa:dodokkcbong tani:mokenckkai, odokkc arodokki okkomsin ipcnam kamang, kapila:nc bvkkolo apirkosin arro kamang. Bv cdvlo yaddoji, bvk avkc lukam-gvkamdcmpc bv agomcm ludag, kapila:nc bv lume: luncko odokkc lume:luncdok abudc.

⁴⁵ Cmpige:la, ngo arodcm lubiga:lok, nolu ngom mc:jvgmang,

⁴⁶ Nolukkolok sc:ko ngom pa:p kannc cmna lula:ycn? Ngo arodcm lubimvlo, nolu kapila mc:jvgma:n?

⁴⁷ Sc:kobv Ru:ncpvnckcnc Ru:ncpvnckc agomcm taddag; nolu kapila cdcmbulum tadma:nc lcga:dc nolu Ru:ncpvnckcmang.”

Jisubv:lang Abrahambv

⁴⁸ Jiwukvdv:dc Bvm luto, “No Samariangko cmna lusunamdc aroma:lang odokkc uiko dung cmnamdc?”

⁴⁹ Jisubv lubito, “ngokkc uiko kamang; cmpige:la ngok Abumc ngo mcnggcdo, odokkc nolu ngom mcnggcmang.

⁵⁰ Ckvdaggom ngo avkc amin gvnamcm masumang; Akkongkonc dung sc:kobv madagji odokc bv:bong kcba: moncdc.

⁵¹ Aroru:pc, aroru:pc, ngo nolum lubidung, sc:koiyc ngok agomdcm tadmvlo, bv cdvlosin sinamcm ka:pa:suma:yc.”

⁵² Jiwukvdv:dc Bvm luto, “Ngolu su:pak kindu:bong nokkolo uiko dung, Abrahambv sikang, lungor lunckvdv:dcmpc; odokkc nolu ludag, ‘Tani:akonc ngok agomcm tadmvlo bv cdvlosin sima:yc.’

⁵³ No ngoluk abu Abrahammc bottcya:nci sc:kobv sika:bo:ji? Odokkc sinc lungor lunc kvdv:dcmyam? No sc:kobv cmna lusudon?”

⁵⁴ Jisubv lubito, “Ngo avyc amincm gvmosumang, ngok amin gvnamdc okkosinmang, cdc ngok Abudc:mvn sc:ko ngom amin gvmotoji, sc:kobvm noluk Ru:ncpvncbv cmdu:ji.

⁵⁵ Cmpige:la nolu Bvm kintomang; ngo Bvm kindag. Ngo Bvm kinmang cmna, ngo lumvlo, ngo nolugvngkcmpc lume: luncpc iyc; ckvdaggom ngo Bvm kindag odokkc ngo Bvk agomkvdv:dcm lukamdcmpc ido.

⁵⁶ Noluk abu Abrahambv ngok longckvdv:dcm ka:pc cmna mc:podagai; bv cdcm ka:to odokkc mc:pokang.”

⁵⁷ Jiwukvdv:dc odo Bvm luto, “No dv:tak yingokoi bottama:da, odokkc no Abrahammc kangkvtagyc?”

⁵⁸ Jisubv bulum lubito, “Aroru:pc, aroru:pc, ngo nolum lubidung, Abrahammc oma:dokkcbong, ngo dung.”

⁵⁹ Odo bulu Bvm vlvngki crpc cmna tvsa:to; cmpige:la Jisubv avdc gvsuksuto, odokkc kumko okumdokkc gvlenna gvpakkangku.