JO:N 17 - ANU LUGOD N. T. (BSI)

Jisubv Bvk Agom Tadjvgla Gvmvnnc Kvdv:dok Lcgangc Kumnam

¹ Jisubv cdvlo cdc agomkvdv:dcm lutoji, Bvk amigcm Bv bcrsa:la taycng amo:pc ka:to odokkc luto, Abba, ayirdc pvngangka:bong; nok Awodcm amincm gvmotobongka Awodc:jen nom amin gvmoycpc,

² no Bvm rcngamsok appvng ru:namlok tayc:lo ila:sa:langcm kapc bitoji, turyarla turla du:namdcm bipc cmna cdc appv:dcm no Bvm bitoji.

³ Odokkc cdcna turyarla turnamdc, jc bulu nom kindag nowong aro Ru:ncpvncdc cmna, odokkc Jisu Kristomc sc:kom no mclvgtagnc.

⁴ Ngo nom mo:pvso amincm gvmotobong, agerdcm gerpvtla no okodcm ngom gerpvttoka cmna lutungaji;

⁵ odokkc su:pak, Abba, no ngom amincm gvmoteika nok ka:de:pc nok lcdulo du:mvndodcm oko amin gvbokanc cdcmpinc amincm mo:pvscm ru:ma:dapci gvnamdokki.

⁶ “Ngo nok amincm lcngkanambitobong oko tani:kvdv:dcm no ngom mo:pvsokkcm bitu:ji; nokkolo bulu dunggai, odokkc no bulum ngom bitu:bong, odokkc bulu nok agomcm mcnggabto.

⁷ Su:pak bulu kindag jc ngom binam appv:dc nokkolokkc;

⁸ kapila:nc ngo bulum agomkvdv:dcm bitobong okodcm no ngom bitoji, odokkc bulu cdcmbulum torvgsutobong odokkc aropc kindag jc ngo nokkolokkc gvdung; odokkc bulu mc:jvgtobong jc no ngom mclvgtag.

⁹ “Ngo buluk lcgangc kumdung; ngo mo:pvsok lcgangc kummang cmpige:la cdc no ngom binamkvdv:dok lcgangongc, kapila:nc bulu nokkc;

¹⁰ Ngok appv:dc nokkc, odokkc nokkc kvdv:dc ngokkc, odokkc ngo bulukkolo aminc gvdo.

¹¹ Odokkc su:pak ngo mo:pvso kama:ycbong, cmpige:la bulu mo:pvso dung, odokkc ngo nokkodo:pc gvdokubong. Angunnc Abba, nok aminno bulum lc:toka, sc:kobulum ngom bitonc, bulujen akkongkopc iycpc, ngolug anyc akkongkopc inamcmpc.

¹² Ngo buluk lcdulo du:doscm, nok aminno ngo bulum lc:do, okodcm ngo nok aminno bitu:ji; ngo bulum ka:sv:bomto, odokkc bulukkolok akosin yogtomang cmpige:la aima:pc ila singapnc ommang kvdv:dc:ma:mvlo, jc astrong agomdc aropc iycpc cmna.

¹³ Cmpige:la su:pak ngo nokkolo:pc gva:dung; odokkc sc agomkvdv:scm rcngamso lubidung, bulukkolo:jen ngok mc:podc pv:ycpc.

¹⁴ Ngo bulum nok agomcm bitobong; odokkc rcngamso bulum tayumto lcga:dc bulu mo:pvsokkcpc imangga:lok, ngo:sinci rcngamsokkcpc imangkammcmpc.

¹⁵ Bulum rcngamsokkcm la:pakbomkangkulangka cmna ngo kummang, cmpige:la no bulum aima:nc incdokkcm moya:langka.

¹⁶ Bulu rcngamsokkcmang, ngo:sinci rcngamsokkcpc ima:namdcmpc. Bulum arokokki mopu:teika;

¹⁷ Nok agomdc arro.

¹⁸ No ngom rcngamso:pc mclvgkammcmpc ngo:sin bulum rcngamso mclvgto.

¹⁹ Odokkc buluk lcgangc ngo avyc tolvgsudung, bulusinjen arolo tolvgsuycpc cmna.

²⁰ “Ngo sokbuluk lcgangongc kummang, cmpige:la cdc sc:kobulu ngokkolo mc:jvgdagnc buluk lcgangcsin buluk agomkokki bulujen akkongkopc iycpc cmna;

²¹ nokkcmpcsinci, Abba, ngokkolo, odokkc ngo nokkolo, bulusinjen ngolukkolo, odomvlojen rcngamsc mc:jvgycpc no ngom mclvgtung cmna.

²² Amin gvnamdcm no okodcm ngom bitonc ngo bulum bitobong, bulujen akkongkopc iycpc ngolu akkongkopc ikamdcmpc,

²³ ngo bulukkolo odokkc no ngokkolo, bulujen aiyo:pc akkongkopc idopc, odomvlo rcngamso:jen kinycpc ngom jen no mclvgtung odokkc bulum aipc mc:to no ngom aipc mcngkamdcmppvng.

²⁴ “Abba, ngo mc:dag jc bulusin, sc:kobulum no ngom bitonc, ngokkolo du:ycpc okolo ngo du:ycji, ngok amin gvnamcm ka:dopc okodcm nok ayangki ngom bitonc ngok lcgangc rcngamscm ru:sa:ma:dapc.

²⁵ O dormokanc Abu, rcngamsc nom kintobong, cmpige:la ngo nom kinto; odokkc sc:bulu kindagjc no ngom mclvgtag.

²⁶ Ngo nok amincm bulum kinmoto, odokkc ngo cdcm kinma:yc, jc no oko aipc mc:namdokki no ngom aipc mc:tonc bulukkolo:jen du:ycpc, odokkc ngo bulukkolo du:mvnycpc.”