JO:N 14 - ANU LUGOD N. T. (BSI)

Jisubv Abukoto:pc Lambcdc

¹ “Noluk asinkvdv:dcm mc:pinmcngoksuyoka; Ru:tummc mc:jvgtoka, ngomsin mc:jvgtoka.

² Ngok Abukc okumtc bojcrungko soyarc dung; cdcmpc kamangamvlo, ngo luma:ya:lang jc ngo noluk lcgangc mosvngkakupc gvdagku cmna,

³ odokkc cdvlo ngo gvlangkula noluk lcgangc dungkoko mosv:yckumvlo, ngo lckoda gvlatycku odokkc ngo nolum ngokkolo:pc la:rvgsuycku, ngo okolo du:yckunc nolusin odo du:yckupc.

⁴ Odokkc nolu kindag ngo okolop gvdagji odok lambcdcm.”

⁵ Tomabv Bvm luto, “Ru:tuma, no okolopc gvdagji ngolu odok lambcdcm kinmang?”

⁶ Jisubv bvm luto, “Ngo lambcdc, odokkc arodc, odokkc turnamdc; sc:kosin Abudo:pc gva:mang, ngokkokkima:mvlo.

⁷ No ngom kinya:mvlo, no ngok Abudcmsin kinya:pc; su:pakkolokkc nolu Bvm kindagbong odokkc Bvm ka:tobo:sin.”

⁸ Pilipbv Bvm luto, “Ru:tuma, Abudcm ngolum lcngkantei, odokkc ngolu mc:tv:suyc.”

⁹ Jisubv bvm lubito, “Ngo siddv longcko du:mvnma:lang, odokkc ckvdaggom nolu ngom kinmang, Pilipa? Sc:kobv ngom ka:tobo:nc Abubvmci ka:tobong; no kapc lula:don, ‘Ngolum Abudcmci lcngkanteika cmna?

¹⁰ Nolu mc:jvgma:nci jc ngo Abudo du:mvndung odokkc ngok Abudc ngokkolo du:mvndung cmna? Ngok nolum lunam agomkvdv:dc ngok avkc ilang gvlangki lumang; cmpige:la cdc Abudc sc:kobv ngokkolo du:dagnc Bvk agercm Bv gerdag.

¹¹ Ngom mc:jvgtoka ngokkolo:jc Abubv dung odokkc Abubv ngokkolo dung; cdcmpcmanggom ngom agerkvdv:dok lcgango:pci mc:jvgtok.

¹² “Aroru:pc, aroru:pc, ngo nolum lubidung, sc:kobv ngom mc:jvgdagnc ngok ager gernamdcm geryc; odokkc scmbulumyam bottaya:nc agercm geryc, kapila:nc ngo Abukoto:pc gvdagku.

¹³ Okkomci ngok aminno nolu ka:ycnc, ngo cdcm ibiyc, Abudc:jen Awodo aminc gvycpc cmna;

¹⁴ ngok aminno nolu okkomci koycji ngok aminno ngo cdcm biyc.

Angunnc Yalodok Pesunam

¹⁵ “Nolu ngom aipc mc:mvlo, nolu ngok kvnggv:pc lulvgnam agom kvdv:dcm lukamdcmpc iyc.

¹⁶ Odokkc ngo Abudcm kumtombiyc, odokkc Bv nolum lusvmosv:nc akoda biyc, noluk lcdulo lo:dvpc du:mvndopc,

¹⁷ cdcmangagom Arodok Yalodcmsin, sc:kom rcngamsc torvgsula:ma:ycji, lcga:dc cdc Bvm ka:ma:sin cdcmanggom kinma:sin; nolu Bvm kindag, kapila:nc Bv noluk lcdulo du:mvndag, odokkc noluk lcdulo du:mvnyc.

¹⁸ “Ngo nolum dunggur daggurnc kama:dopc mcla gvkuma:yc; ngo nolukkolo:pc gvlatycku.

¹⁹ Cdcmpidaggom adjio:ko, odokkc sc rcngamsc ngom cdvlosin ka:begma:ycku, cmpige:la nolu ngom ka:begycku; kapila:nc ngo turra du:dag, nolusin turra du:yc.

²⁰ Odo longcdo nolu kinycpc ngo:jc ngok Abukolo du:dag cmna, odokkc nolu ngokkolo, odokkc ngo nolukkolo.

²¹ “Sc:kokc ngok kvnggv:pc lulvgnam agom kvdv:dc du:nc odokkc cdcmbulum taddagnc, bv:na ngom aipc mc:ncdc; odokkc sc:kobv ngom aipc mc:dagnc ngok Ba:bukokki ayangkosuyc, odokkc ngo bvm aipc mc:yc odokkc ngo avyc bvm lcngkansuyc.”

²² Juda:bv (Iskaroit bv:mang) bvm luto, “Ru:tuma, kapc cdcmpc no ngokkolo lcngkansuycncm, odokkc rcngamscmma:nc?”

²³ Jisubv bvm lubito, “tani: akonc ngom aipc mc:mvlo, bv ngok gomug kvdv:dcm taddag, odokkc ngok Abubv bvm aipc mc:yc, odokkc ngolu bvkkolo:pc gva:yc odokkc ngolu bvm lckko:pc du:bosuyc.

²⁴ “Sc:kobv ngom aipc mc:ma:ji ngok agomcm tadgabla lc:mang; odokkc noluk tadnam gomugkvdv:dc ngokkcmang cmpige:la cdc Abudokkc sc:ko ngom mclvgtagji.

²⁵ “Sc agomkvdv:scm ngo nolum lubitu:bong, ngo noluk lcdulo du:mvnna du:du:scm.

²⁶ Cmpige:la cdc Luyirncdc, Angunnc Yalodc, sc:kom cdc Abudc ngok aminno mclvgycnc, bv nolum appvng agom luyiryc, odokkc ngok lunam agom appv:dcm nolum mc:pangammoycku.

²⁷ “Mc:po-mcngancm ngo nolum lc:bidung; ngok mc:pom ngo nolum lc:bitung; mo:pvsok bikampc ngo nolum bimang. Noluk asinkvdv:dcm mc:pin-mcngoksuyoka, cdcmpcmanggom pcsomoyoka.

²⁸ Nolu ngom ludopc lunamdcm tattobong, ‘Ngo gvdakkubong, odokkc ngo nolukkolo:pc gvycku.’ Nolu ngom aipc mc:mvlo, nolu mc:poya:pc, kapila:nc ngo Abukoto:pc gvdakku; kapila:nc Abudc ngomyam bottaya:nc.

²⁹ Odokkc su:pak ngo nolum cdc cdcm ima:dapc lubitu:bong, odomvlojen cdvlo cdcbulu iycnc, nolu mc:jvgycpc cmna.

³⁰ Ngo bojckoda noluk lcdulo agom luposuma:ycbong, kapila:nc rcngamsok migom doncdc gva:dobong. Bvkkc ngok tayc:lo mopvla:namc kamang;

³¹ Ckvdaggom ngo Abudc kvnggv:pc agom lukampc ido, odomvlojen mo:pvsc ngo Abudcm aipc mc:dag cmna kinycpc. Darobtoka, kajc sokkc gvkangkuboi.