JO:N 1 - ANU LUGOD N. T. (BSI)

Turnamlok Agomdc

¹ Lendo-a:dodo Gomugdc dungai, odokkc Gomugdc Ru:ncpvnckc lcdulo dungai, odokkc Gomugdc Ru:ncpvncbvai.

² Bv lendo-a:dodo Ru:ncpvnckc lcdulo dungai;

³ appvngcm Bvkkokki ru:to, odokkc Bv:ma:pc okodcmsin ru:tomang.

⁴ Bvkkolo turnamc dungai, odokkc turnamdc tani: kvdv:dok pvangai.

⁵ Pva:dc kcmolo dordag, odokkc kcmodc cdcm mopvla:tomang.

⁶ Ru:ncpvnc kolokkc mclvgnam tani:ko dungai, sc:kokc amincm Jo:n cmtagaji.

⁷ Bv lukanbikapc gvka, Bvkkokki appvngc mc:jvgdopc cmna, pva:dcm lukanbikapc gvka,

⁸ Bv pva:dc:mangai, cmpige:la pva:dcm lukanbikapc gvka.

⁹ Tani: appvngcm pvangpumonc aroru:pc pva:dc mo:pvso:pc gvdungai.

¹⁰ Bv mo:pvso dungai, odokkc mo:pvscm Bvkkokki ru:tungai, ckvdaggom mo:pvsc Bvm kintomang.

¹¹ Bv avkc Bvk okumpc gvtungai, cmpige:la Bvk avkc tani:kvdv:dc Bvm torvgsutoma.

¹² Cmpige:la Bvm torvgsunc appv:dc, Bvk aminnok mc:jvgnc kvdv:dc, Ru:ncpvnckc omma:pc ilang-gvlangcm bito;

¹³ sc:kobulu i:kokki cdcmanggom adin-amvrkokkisinmang cdcmanggom tani:mc:ngkamdcmpc onammang, cmpige:la Runcpvnckokki onamcji.

¹⁴ Odokkc Gomugdc adinpc ikang odokkc ngoluk ara:lo du:mvnto, ayang abbola: arro pv:namkopc, ngolu Bvk amin gvnamcm ka:to, Abukotokkc Awo atcrdc cmna ka:to.

¹⁵ Jo:nbv Bvk agomcm lukanbinckai, odokkc jcyarla luto, “Scva:na Bv sc:kom ngo lukaji, sc:ko ‘bv ngok lcdupc gvmvndu:nc ngom bottaya:ncpc ikang, kapila:nc ngomyam du:po:nai’ ”

¹⁶ Odokkc Bvk pv:namcm ngolu appvngc torvgsutobong, ayang tayc:lok ayangcm.

¹⁷ Kapila:nc Mose:kokki lujvglurodcm bitungai; ayangclang arodc Jisu Kristokokki gvido.

¹⁸ Sc:kosin cdvlosin Ru:ncpvncmc kangkvmang; Awo atcrdcwong; sc:kobv Abudok kcra:do dungkuji, Bv Bvm kinapmoto.

Jo:n Baptismo Binckc Lutad

¹⁹ Odokkc sc:na Jo:nkc lukan binamdc, cdvlo “No sc:kobv:n?” Cmna Jiwudi:kvdv:dok dormo ager gernclok gvgcbonc kvdv:dcmnang Lebiang kvd:dcm Jerusalem dokkcm bvm tawudopc mclvgtungaji.

²⁰ Bv lude:suto, bv kinmang cmna lupaksutomang, cmpige:la “Ngo Kristobv:mang” cmna lude:suto.

²¹ Odo bulu bvm tawuto, “Okkon cmpcmvlo? No Elija:bvi?” Bv luto, “Ngo bv:mang.” “No lungor luncdci?” Odo bv lubisuto, “Ma:”

²² Bulu Bvm odo luto, “No sc:kobv:n? Ngolum sc:kobulu mclvgtagaji bulum lubikupcnam agomko luteipcn. No sc:ko cmna avyc lusudon?”

²³ Bv luto, “Ngo:na yumrangolo jc:la gogncdc, ‘lungor lunc Isaya:bv lunamdcmpc Ru:tumkc’ lambcdcm yvg cmmotoka.”

²⁴ Cdcmpc bulum Parisi:kvdv:dc mclvgtungai.

²⁵ Bulu Bvm tawuto, “Cmpcmlo Kapila no baptismongcm bidu:n, no Kristobv:ma:mvlosin, Elija:bv:sin ma:mvlo, lungor luncdc:sin ma:mvlo?”

²⁶ Jo:nbv bulum lubito, “Ngo asilo baptismongcm bido; cmpige:la noluk ara:lo akonc dagrobdung sc:komc nolu kinma:ji,

²⁷ cmpige:la ngok lcdupc sc:kobv gvdonc, sck lcyuglok suktam rvbvdcmsinci sarra:pcncmang.”

²⁸ Cdc Jordan kekondo Betani:do cdcmpc ikangai, okolo Jo:nbv baptismo bikaji.

Ru:ncpvnckc Me:r Soben Awodc

²⁹ Longkondcm bv Jisumc bvkkolo:pc gva:dopc ka:to, odokkc luto, “Ka:toka, Ru:ncpvnckc Me:r Soben Awodcm, sc:kobv mo:pvsok pa:bcm jo:pakdagji!

³⁰ Sc:na Bv sck agomcm ngo lukaji, ‘Ngok lcdupc ngomyam bottaya:ncdc gvdo, kapila:nc Bv ngok po:pcbong dungai.’

³¹ Ngo avyci Bvm kinmangai; cmpige:la odok lcgangc ngo asilo baptismongcm bila gvdung, Bv:jen Israel ara:lo ka:begdopc.”

³² Odokkc Jo:nbv lukansubinammcm lubito, “Ngo Yalodcm taycng amo:tokkc pckv pcttangkoncmpc dc:yi:dopc ka:to, odokkc cdc Bvk tayc:do dcnggabla dungkang.

³³ Ngo avycsinci Bvm kinmangai; cmpige:la sc:kobv ngom asilo baptismo bita:ka cmna mclvgtonc ngom luto, ‘Bv sckkc tayc:lo Yalodcm dcnggabla du:dopc ka:begycji, sc:na Bv sc:ko Angunnc Yalokokki Baptismo Bincdc.’

³⁴ Odokkc ngo ka:tobong lukanna lubisudu:bong jc sc:na Ru:ncpvnckc Awodc.”

Jisukc Agom Tadjvgla Gvmvnarpo:nc Tani:kvdv:dc

³⁵ Longkondo lckoda Jo:nbv bvk agom tadjgla gvmvnnc tani: anyiko dagbosula dungai,

³⁶ odokkc bv Jisumc lambc gvla du:dodcm ka:to, odokkc luto, “Ka:toka, Ru:ncpvnckc Me:r Soben Awodcm!”

³⁷ Cdc agom tadjvgla gvmvnnc tani: anyidc Bvk cdc lunamdcm tadto, odokkci bulu Jisukc lcdulo gvmvnkang.

³⁸ Jisubv nge:latsula ka:to, odokkc bulum luto, “Nolu okkom madu:n?” Odo bulu Bvm lubito, “Rabbi” (cdcmpc lunamdc Luyirna cmnamc,) “No okolo du:don?”

³⁹ Bulu Bvm lubito, “Kajc ka:taka.” Bulu gvkang odokkc Bv okolo dungkaji ka:to, odokkc bulu Bvk lcdulo odo longcdo du:to, kapila:nc odo ayir vyvng gonta daggabong.

⁴⁰ Jo:nkc agom lunamdcm tadnc anyidok akonc, odokkc bvk lcdulo gvmvnnclok, Andriubvai, Simon Pitorkc bvrodc.

⁴¹ Bvk bvro Simonarmc pa:po:to, odokkc bvm luto, “Ngolu Messaia:dcm pa:to” (okodc Kristocmdagji)

⁴² Bv bvm Jisukolo:pc goga:to, Jisubv bvm ka:to, odokkc luto, “Cdcmpidag no Jo:nkc awo Simonbv? Nom Kepas cmna gogyc” (okodcm Pitor cmdoji.)

Jisubv Pilipmclang Natanaelmc Gognam

⁴³ Longkondo Jisubv Galilpc gvpc cmna mc:to. Odokkc Bv Pilipmc pa:la bvm luto, “Ngok lcdu lcdulo gvtok.”

⁴⁴ Cdcmpinamc Pilipbv Betsaida: dokkai, Andriukclang Pitorkc dungko nogordokkc.

⁴⁵ Pilipbv Natanaelmc rvgsuto, odokkc bvm luto, “Ngolu Bvm pa:to sc:kokc agomcm Mose:bv lujvglurodo odokkc lungor lunckvdv:dc adtaggaji Najaretdok Jisukc agomdcm, Josepkc awodcm.”

⁴⁶ “Natanaelbv bvm luto, Najaretdok ainc atvko lenna:donci?” Pilipbv bvm luto, “Gvla ka:ta:ka.”

⁴⁷ Jisubv Natanaelmc Bvkkolo:pc gva:dopc ka:to, odokkc bvm luto, “Ka:toka, Israel akonc aropcma:nckonc, sckkolo atv yadnam panam kama:nc.”

⁴⁸ Natanaelbv Bvm luto, “Kapc no ngom kindon?” Jisubv lubito, “Pilipbv nom gogma:dapc, no cdvlo tajvg amvng kcvgdo no du:nganc, ngo nom ka:to.”

⁴⁹ Natanaelbv bvm lubito, “Rabbiya, no Ru:ncpvnckc Awodc:na No:na Israelodok migomdc!” Jisubv bvm lubito.

⁵⁰ “Ngo nom lubila:mvn, ngo nom tajvg amvng kcvgdo ka:tonc, no mcjvgdonci? Nolu scmbulumyam bottaya:nc agercm ka:begycpc.”

⁵¹ Odokkc bvm bv lubito, “Aro-aroru:pc, Ngo nolum lubidung, nolu taycng amo:tcm betkela, moge:dopc ka:begyc, odokkc Ru:ncpvnckc lutad lunckvdv:dcm Tani: Awodok tayc:lo gvigvsa:dopc ka:begyc.”