JAKOB 2 - ANU LUGOD N. T. (BSI)

Akonongcm Aipc Mc:namdcm Lurvdla Lutadnam

¹ Ngok bvrrangkvdvnga, akonongcm aipc mc:nam lcngkanyoka nolu Ru:tum Jisu Kristomc mc:jvgla mc:tu:la, amin gvnclok Ru:tumdc.

² Kapcnc avn angoti:ko gcnc tani:konc odokkc kangkano:nc attar gcnckonc noluk gvkumsukodo gva:ycmvlo, odokkc opannc tani:konc ya:bidnc attar gcnckoncsin gva:ycmvlo,

³ odokkc nolu cdc kangkannc attar gcncdcm anna luka:do odokkc ludo, “So tedtokai, aipc mc:la,” opannc tani:dcm nolu ludo,

⁴ “O:ndo dagtokai,” cdcmanggom, “Ngok alc ru:yiso tedtokai,” cmna nolu av avycm angu angumotoma:lang, odokkc aisi:ma:nc asinki kcba:ba:ncpc ima:lang?

⁵ Tattoka, ngok aipc mc:nam bvrrangkvdv:nga. Ru:ncpvncbv cdc sc:kobulu opandagnc Balenna mc:jvglo mircmdopc la:ma:lang odokkc migom doko amo:dok du:sonsuncpc sc:kobulu Bvm aipc mc:dagji okodcm cdcmbulum pesubitoji?

⁶ Cmpige:la nolu opannc tani:dcm mcnggctomang. Cdc mircmnc kvdv:dc:ma:lang sc:kobulu nolum ipusire:ycm idagnc, cdc buluma:lang sc:kobulu nolum kcbang bangko okumlo:pc sobomdagnc?

⁷ Cdcbuluma:lang sc:kobulu mcnggcru:pcnam amindcm aima:nc cmna ludagnc okodcm nolum minnvgtagnc?

⁸ Nolu aroru:pc migom lujvglurodcm lukamdcmpc imvru:lo, astro:dok lukamdcmpc, “Noluk kumrv-ko:rv kvdv:dcm noluk avyvngkcmpc aipc mc:ycpc,” nolu ainc agerko gerdo.

⁹ Cmpige:la nolu jodi akonongcm aipc mc:namcm lcngkanyc, nolu pa:bcm ido, odokkc lujvg lurodokki lujvg agom tadma:nc cmna lulvgdag.

¹⁰ Kapcnc sc:kobvi lujvgluro appv:dcm lukamdcmpc taddo cmpige:la abangongkogom lukamdcmpc tadma:yc cdc appv:dcm ila:ma:nam germurncpc idag.

¹¹ Kapcnc sc:kobv “ami nc:ngcm la:biyok cmna,” ludonc, “tani:ycm mokeyoka” cmnamdcmsin luto. No jodi amikc nc:ngcm la:bima:yc cmpige:la tani:ycm mokeyc, no lujvg lurodok lukamdcmpc ima:ncpc ikang.

¹² Asin aipc mc:la gernam agerkvdv:dcm lujvg lurodok du:ncm kcba:ba:pcnampcnampc agomcm lulangka odokkc agercm gerlangka.

¹³ Kapcnc sc:kobv aya:pc mc:yinsuma:pc bvm kcbangcm ba:po:yc; ckvdaggom aya:pc mcmvnsunamdc kcba:ba:namdcm mopvdag.

Mc:ggclang Ager Gernam

¹⁴ Ngokkc bvrokvdvnga, cdc okoko arc kadang jodi tani: akonc luyc ngokkc mc:jvgc dung cmpige:la agerc kama:mvlo? Bvk mc:jvgdc bvm motumla:dagyc?

¹⁵ Bvro akonc jodi cdcmanggom bvrmc akonc aima:si:ma:nc attarcm gcla du:do odokkc lo:dcm donam apincm dobegma:pc du:do,

¹⁶ odokkc nolukkolok akonc bulum luyc, “Mc:po:pc gvkangkuka, ingga:pc du:toka odokkc aki:bi:la du:langka,” cdc o:ko arc kadang bulum amvrdok lcgangc laginam attarcmbulum bima:pc?

¹⁷ Cdcmpidag mc:jvgo:dokki, odokkc jodi ager kvdv:dc kamang, sinnc.

¹⁸ Cmpige:la sc:kaiyc luyc, “Nokkc mc:jvgc dung odokkc ngokkc agerc dung.” Nok mc:jvgdcm lcngkantei nok agerdc kama:pc, odokkc ngok agerkokki ngok mc:jvgcm lcngkanyc.

¹⁹ Nolu mc:jvgdo jc Ru:ncpvncbv ako; nolu ainc agercm gerdo. Cdcmpc uikvdv:dc:sin mc:jvgdag–odokkc pcsola jingo:sudag.

²⁰ Nolu lcngkansulv:dagnci, c:i okkomsin kinma:nc tani:ya, ager germa:nam mc:jvgdc:jc okopcsin imang cmna?

²¹ Abrahambv ngoluk abudc agerkokki ainc cmna lumangalang, cdvlo bvk awodcm Isahakmc palvgko tayc:do bipakdodcm?

²² Nolu ka:tojc mc:jvgdc bvk agerdo du:mvndungai, odokkc mc:jvgdc agerkokki ipvtgvpvtto,

²³ odokkc astrong agerdc lukamdcmpc ikang okodc ludagji, “Abrahambv Ru:ncpvncbvm mc:jvgto, odokkc cdcm bvkkcpc dormokanampc adgabto;” odokkc bvm Ru:ncpvnckc ajonpc gogto.

²⁴ Nolu ka:to jc tani: akoncm agerkvdv:dokki ainc cmna ludag mc:jvgdokkimang.

²⁵ Odokkc cdcmv:pc Rahabbv:sin mangalang beisang agercm gerncdc agerki ainc cmna luto cdvlo bv agom lutadnckvdv:dcm tomrvgsutonc odokkc akon lambclok bulum mclvgtokunc?

²⁶ Kapcnc yalodc amvrdc:ma:mvlo kapc sincpc idagnc, cdcmv:pc mc:jvgdc agerkvdv:dc:ma:mvlo sinnc.