JAKOB 1 - ANU LUGOD N. T. (BSI)

¹ Jakobbv, Ru:ncpvnckclang Ru:tum Jisu Kristokc ager gerya:ncko. Vyvngkolang anyi ope: Dugpitsula du:nckvdvngdo:pc: Kumtadsudung.

Mc:jvgclang Kinjvgla Kinnam

² Cdcm appv:dcm mc:pobatsunampc mc:toka, ngokkc bvrrangkvdvnga cdvlo nolu angu angu ipuseire:ycm pa:ycji,

³ kapcnc nolu kindag jc noluk mc:jvgdok ankang kangkvnamdc lo:dcm mentumsula du:monammcm lenmodag.

⁴ Odokkc lo:dcm mentumsula du:la:namdcm pv:dandopc du:motoka, jc nolu aiyo:pc pv:dandopc odokkc ingapgvngapycpc, okodoksin pv:ramma:pc.

⁵ Nolukkolok sc:koiyc jodi kinjvgla kinnam pv:ramyc, bvm Ru:ncpvnckolok komotoka, sc:kobv appvng tani:ycm aya:la mc:jong kadjo:la odokkc sc:kobv aima:pc ge:ma:pama:pc, odokkc cdcm bvm biycpc.

⁶ Cmpige:la bvm mc:jvgla komotoka, oko mc:mokosin mc:ma:pc, kapcnc sc:kobv mc:modagji siycnglok asi lu:ncpc idag cdcyam csarc yusa:sa:la lu:sa:nampc.

^7-8 Kapcnc cdc tani:dc bvk appvng agerlo dungang daga:la:ma:pc ila, asin anyiko gcpa:ru:ma:yc, o:kosin Ru:ncpvnckolokkcm pa:ycpc cmna.

Opan Pannamclang Mircmc

⁹ Opannc bvrodcm bvk kanam sv:namlo bottapc mc:sumotoka, odokkc mircmncdcm anyi:sumonamdo,

¹⁰ Kapila:nc nc:sinncge:lok appundcmpc bv sanpakyc.

¹¹ Kapcnc do:nyidc sa:dag odokkc bv ka:te:tere:nc ka:sannc ka:namdokki nc:sindcm sanpakmodag; odok appundc opakleddag, odokkc odok kangkandc yogpakdag. Cdcmv:pc mircmnc tani:dc bvkkc appvngc kage:la:gom yogpagyc.

Ankang Kangkvnam Odokkc Mc:boka:bo

¹² Ipusire:ycm menrasula du:nctani:dc akirba:d pa:nc, kapcnc cdvlo bv ankang kangkvnamdcm dagrasutonc bv turnamdok migom dumlupdcm sc:kobulu Bvm aipc mc:dagji okodcm Ru:ncpvncbv pesubitoji pa:yc.

¹³ Cdvlo bvm ka:bomc:bomoycji, sc:komsin lumoyoka “Ngom Ru:ncpvnckokki ka:bomc:bomotung;” kapcnc Ru:ncpvncbv kapcsin aima:nc agerki ka:bomc:bomomang odokkc Bv avdc sc:komsin ka:bomc:bomomang;

¹⁴ Cmpige:la appvng tani:ycm ka:bomc:bomodag cdvlo bv avkc mc:namdokki odokkc yadbomnamdokki mc:bodagji.

¹⁵ Odo mc:namdc cdvlo cdcm mcnga:dagnc pa:bcm idag; odokkc cdvlo cdc pv:namkopc iycnc sinamcm simodag.

¹⁶ Ngok aipc mc:bomsunam bvrokvdvnga, yadkosuyoka.

¹⁷ Appvng ainc aman binamkvdv:dc odokkc appvng aiyo:pc ainc bipaknam amanc tayc:tokkc, pva:lok Abukotokkc gvido sckkolo mcngumcnge:yc kamang cdcmanggom langkonsunam, lcgangc.

¹⁸ Bvk avkc mc:suki bv ngolum aro agomdokki langa:toku jc ngolu e:pongarnc a:yckvdv:dok akoncmpc Bvk ru:pongarnam kvdv:dokkc.

Tadnamclang Ager Gernam

¹⁹ Scm kintoka, ngokkc aipc mc:bomsunam bvrrangkvdvnga. Appvng tani:ycm tadnamcm lomna tadmotoka, aso:pc agomcm lumotoka, aso:pc aglvgngcm sa:motoka,

²⁰ Kapcnc tani:lok aglvng sa:namdc Ru:ncpvnckc dormo agercm germang.

²¹ Cdcmpidag appvng ya:nc agomcm odokkc aima: aima:pc gernam agerkvdv:dcm mcpaktoka odokkc asin ansv:la torvgsulangka kvnggv:pc lugablvgla lunam agomdcm, okodc noluk yalokvdv:dcm mopvla:dagji.

²² Cmpige:la agom lukamdcmpc incpc ilangka, odokkc tadla du:no:pc ima:pcka, nolu avycm avyc yadsula.

²³ Kapcnc jodi akonc agom lunamdcm tadno:pc iyc odokkc lukamdcmpc gerncpc ima:yc, bv tani:akoncmpc idag sc:kobv avkc du:tcng dumsimigmodcm arsilo ka:sudoji;

²⁴ kapcnc bv avdcm avdc ka:sudo odokkc gvpakdakku odokkc bv kapidagaji vgcmpc mitpandakku.

²⁵ Cmpige:la sc:kobv aiyo:pc ainc lujvg lurodo:pc ka:dagji, appvngcm aipc mc:mvnsunamlok lujvg lurodcm, odokkc mcmang-ke:ke:pc lukam tadtvla tadyc, mitpankunc tadncpc imang cmpige:la gerncpc cdc incdcmbulumpc iyc, bv bvk inam gvnamlo:bulu akirba:d pa:yc.

²⁶ Akonc jodi mc:suyc bv dormokannc, odokkc bvk ayodcm motumsumang cmpige:la bvk asindcm yadsudo, cdc tani:dok dormodc cmmumpc idag.

²⁷ Ru:ncpvnckc odokkc Abudok kcra:lo narc:nc odokkc imur siyarma:nc dormodc sc: anc abu kama:nckvdv:dcm buluk du:g gvddom kangkapc gvnamc odokkc tumbonc:ng kvdv:dcm buluk du:ggvddom, odokkc rcngamsokkc akonc narc:pc:sc:pc du:sunamdc.