IPESIANG KVDVNG 6 - ANU LUGOD N. T. (BSI)

Ko:kangkvdv:dc:lang Ancabukvdvng

¹ Ko:kangkvdvnga, Ru:tumkolo noluk ancabukvdv:dok agomcm tadlangka, kapcnc cdc aincagomc.

² “Nok ba:bomnang owcm mcnggclangka” (Cdc lupongarla pesul lulvgnamdc,)

³ “jc cdc nolukkcpc ainampc iycpc odokkc jc nolu mo:pvso bojcrungko turycpc.”

⁴ Abukvdvnga, noluk ommangkvdv:dcm aglvng sa:dopc ge:yoka, cmpige:la bulum Ru:tumkc moyinsunamclang luyirlo ka:sa:mosa:toka.

Pagbokvdvngclang Rutumkvdvng

⁵ Pagbokvdvnga, nolu cdc sc:kobulu mo:pvsok ru:tumcnc agom lukamcm tadtoka, pcsola odokkc jinna, asin atcro:pc mc:la, Kristokolo:pc kapc idonc;

⁶ amigc ka:la du:namkokki gernamo:mang, tani:ycm aipc mc:monammcmpc, cmpige:la Kristokc ager gerya:ncpc, asinkokki Ru:ncpvnckc mcngkampc agercm gerla.

⁷ Ru:ncpvnckc lcgangc agercm gerla odokkc tani:kvdv:dok lcgangc.

⁸ Kinna jc okodcmci aincm atvko akonc idoji, bv Ru:tumkolok cdcmvng pa:yc, bv pagbodaggom cdcmanggom avkc mcngkampc du:daggom.

⁹ Ru:tumkvdvnga, bulum cdcmvng ilangka, odokkc morvdnammcm mentumsulangka, kinna jc sc:kobv buluk Ru:tumclang odokkc nolukkcdc taycng amo:to dung, odokkc jc Bv akonongcm mc:namc

Ru:ncpvnckc Mimag Monanc Attar

¹⁰ Lcddarpc, Ru:tumkolo kvnggvngtarv:toka odokkc bvk tornamlo ilang gvlangkokki.

¹¹ Ru:ncpvnckc mimagmonamlok gcnam attar appv:dcm pvdlvgsutoka, jc nolu uidok yadnampanamdcm dagrasula:ycpc.

¹² Kapcnc ngolu adinkokkilang odokkc i:kokki moka:mvnsumang, cmpige:la migomdonckvdv:dok biru:di:pc, ilang-gvlangkvdv:dok birudi:dokki, sc mo:pvscm silomclokc kcmolok mo:pvsok migom donckvdv:dok birudi:pc, taycng dungkokvdv:dok aima:n ager gernc yalo igur-gvgurnckvdv:dok birudi:pc.

¹³ Cdcmpidag Ru:ncpvnckc mimag moddom gcnam attar appv:dcm la:toka, jc nolu aima:nc longckvdv:do morasula:ycpc, odokkc appv:dcm ingapgge:la, dagrobpc.

¹⁴ Dagrobtok cdcmpidag, noluk vgvngkvdv:dcm arokokki yc:rcgsutok gcnamdcm gcge:la,

¹⁵ odokkc mcngannok tadponc lutaddcm lunamckvdv:dcm noluk alcdo pvdlvgsuge:la.

¹⁶ Cdc appv:dcm mcge:la:sin, mc:jvgdok barudcm langge:la, okodokki nolu uidok appvng dorradu:nc gvdv:dcm momitla:ycpc.

¹⁷ Odokkc moturnamdok tornc dumlupdcm gctoka, odokkc Yalodok yogsadcm, okodcm Ru:ncpvnckc agomdc:ji.

¹⁸ Yalodo appvng ayirlo kumlangka, appvng kumnamclang kumrcnamkokki. Cdc appv:do mentumsula du:namkokki ansuka:sula du:langka, aipc kumnc tani:kvdv:dok appvngkc lcgangc kumrcla kumna,

¹⁹ odokkc ngok lcgangcsin, jc ngo appvngcm ko:ka:dodo asin pvtala bottapc lula:ycpc tadponc lutaddok mcngapla:ma:nam agomdcm lubidodo,

²⁰ okodok lcgangc ngo ikoli:ki yc:nam migom lutad lunncmpc iladung; jc ngo cdcm asin pvtala lugo:bila:ycpc, kapc ngo lupcnammcji.

Lutcragom

²¹ Su:pak jc nolusin kinycpc kapc ngo odokkc okkom ngo idu:ji, Tisiku:bv aipakpc mc:bomsunam bvrodc odokkc Ru:tumkolo mc:jvgjvrvgla ager gerncdc nolum appvngcm lubiycpc.

²² Ngo nolukkolo:pc bvm mclvgtung sc mc:namsokpak lcgangc, jc nolu kinycpc ngolu kapc idagji, odokkc jc bv noluk asinkvdv:dcm kvnggv:moycpc.

²³ Bvrrangkvdv:do:pc mcnganc dungka:langka, odokkc mc:jvgkokki ayangc, Abu Ru:ncpvnckolokkc odokkc Ru:tum Jisu Kristokolokkc.

²⁴ Ayangc appvngkolo dungka:langka sc:kobulu cdvlosin yogma:nc aipcmc:namki ngoluk Ru:ncpvncmc aipc mc:dagji.