IPESIANG KVDVNG 3 - ANU LUGOD N. T. (BSI)

Ru:ncpvncmc Kinma:nc Tani:kvdv:dok Lcgangc Poulkc Ager Gernam

¹ Odok lcga:pc ngo, Poulbv, Kristo Jisukc lcgangc makana:lo tumnamc nolu Angu tani:kvdv:dok lcgangc.

² Mclvgla jc nolu Ru:ncpvnckc okum ru:tum aya:dok tadtonc cdcm ngom bitungai noluk lcgangc.

³ Kapc mcngapla:ma:namdcm ngom kinmotungaji kangor ka:namki, kapc ngo andc:pc adtoji.

⁴ Cdvlo nolu scm pola:ycnc nolu ngok asin ara:bok mc:namdcm mcngkinycpc Kristokc mcngapla:ma:nam agomdo:pc.

⁵ Okodcm tani: awokvdv:dcm kinmomangaji ake opvn kvdv:dcm kapc su:pak cdcm Bvk angunnc mclvgla ager germonam tani:kvdv:dcm lungor lunckvdv:dcm Yalodokki lcngkantoji;

⁶ cdcyam, kapc Ru:ncmc kinma:nc tani: kvdv:dc attar pa:tcmvnjoncji, amvr atcro:dok alc alagc, odokkc Kristo Jisukc pesunamdcm pa:tc:mvnnc tadponc agomdokki.

⁷ Cdc tadponc agomdok ngo migom ager gernckai Ru:ncpvnckc amandok aya:namdcmpc okodcm ngom bitungaji Bvk ilanggvla:dok agerdokki.

⁸ Ngokkcpc, aipc kumnc tani: appv: dokkcmyam adji:ya:nc-daggom, sc aya:scm bitungai Angu tani:kvdv:dcm Kristokc mala malenna:ma:nam mitc-mircm kvdv:dcm lubidopc,

⁹ odokkc appvng tani:ycm ka:mopc okodc mcngapla:ma:namdok taru:dc:ji sc dv:takkvdv:sok ayirkvdv:sok lcga:pc lc:sila lc:namdc Ru:ncpvncbv sc:ko appvng attarcm ru:toji.

¹⁰ Jc mondoli:dokki Ru:ncpvnckc bojcrungkopc inc kinnamdcm jen su:pak kinmoycpc migom doko mo:pvkvdv:do odokkc ilang-gvlang kvdv:do taycng dungkokvdv:do.

¹¹ Cdc lo:dvpc du:yarla du:nam mcla ipcnamdcmpai okodcm Bv Kristo Jisukolo ngoluk Ru:tumkolo aropc imotoji,

¹² sckkolo ngolukkc asin pvtala du:namc odokkc asin kvnggv:nammc du:ji Bvkkolo ngolukkc mc:jvgc kcra:pc gva:nanc du:la.

¹³ Cdcmpila ngo nolum ludung asinc mclvgma:pc ngo okkom noluk lcgangc ipusire:ycm pa:du:ji, okodc noluk amin gvnamcji.

Kristokc Aipc Mc:nam

¹⁴ Odok lcgangc ngok lcbvngcm Abukc kcra:do tuma:do,

¹⁵ Sckkolokkc tayctokkc appvng crangc odokkc mo:pvso amincm mintoji,

¹⁶ jen Bvk mitc-mircmdok amin gvnamdcmpc Bv:jen nolum tornamki kvnggv:modopc Bvk Yalodokki asin arangkc amibo,

¹⁷ odokkc jc Kristobv:jen noluk asin arangkvdv:do mc:jvgkokki du:ycdagycpc; jc nolu, aipc mc:namlo appvrc amo:bo pvrgabycpc.

¹⁸ Appvng aipc kumnc tani:kvdv:dokki lckopc mcngkvsuycpc okodc pontadc:nc, araidc:nc, owudc:nc, odokkc o:rv:dcnc.

¹⁹ Odokkc Kristokc aipcmc:namdcm kindopc okodo kinnamcm gvbadya:dagji, nolujen Ru:ncpvnckc appvng binamcm bi:ycpc.

²⁰ Su:pak Bvkkcpc ager gernc ilang gvla:dokki ngoluk ara:sok du:nc bojcru:yangko pv:sepv:yeycpc ila:ya:dag ngoluk konamc cdcmanggom mc:nam kvdv:dcmyam,

²¹ Bvkkcpc mondoli:lo aminc gvka:langka odokkc Kristo Jisukolo appvng opvnno, lo:dv-lo:dcm. Amen.