IPESIANG KVDVNG 2 - ANU LUGOD N. T. (BSI)

Sikolokkc Turkunamlo:pc

¹ Odokkc nolum Bv turmotoku, cdvlo aima:nc ager kvdv:dokki odokkc pa:p kvdv:dokki sila dungaji okolo nolu lcko gvkaji.

² Sc mo:pvsok rcngam gvkolo gvmvnka, csardok migom awodok ilang-gvla:dok gvkolo gvmvnka, cdc yalodc su:pak agercm idung lunam tadma:nckvdv:dok aowangkvdv:dok ara:lo.

³ Odok buluk ara:lok ngolu appvngc lcko ngoluk adin-amvr mc:boka:bodcmpc turra dungai, amvrdoklang asindok mcngkamdcmpc gvla, odokkc cdcmpila ngolu scwu-sobabki aglvng sa:namlok ommangai, tani:opvnlok ake kvdvngv:dcmpc.

⁴ Cmpige:la, mc:yinsunamlok sc:ko mitc-mircmdang, bottcru:nc aipc mc:namdokki okodokki Bv ngolum aipc mc:dagji,

⁵ cddo:mang cdvlo ngolu sila dungaji ngoluk imursiyarkoki, ngolum Kristok ayangkokki nolum moturtoku,

⁶ odokkc Bvkkokki ngolum turmotoku, odokkc Bvk lcdulo tedmoto taycngamong tedkokvdv:do Kristo Jisukolo,

⁷ jc a:pcnc dv:tak ayirkvdv:do Bv kvngapla:ma:nam Bvk aya:dok mitcmircm kvdv:dcm ngolum Kristo Jisukolo asin aipc mc:namki lcngkanycpc cmna.

⁸ Kapila:nc ayangkokki nolum mc:jvgkokki mopvttak; odokkc cdc noluk avkc inamkokkimang.

⁹ Cdc Ru:ncpvnckc amanpc binamc–ager gernamkokkimang, ckvma:mvlo tani: akomumc bottapc lubonsuycpc.

¹⁰ Kapcnc ngolu Bvk ager gernc, Kristo Jisukolo ainc ager lcgangc ru:namc, okodcm Ru:npvncbv po:pcbong ru:toji, jc ngolu odokbuluk ara:do gvpcnammc.

Kristokolo Akkongc

¹¹ Cdcmpidag mc:pa:toka jc nolu ayirkolo adin-amvrlo Ru:ncmc kinma:nc opvnkvdvngai, gadpukma:namc cmna okodcm gadpuknam kvdv:dc gogdagaji; okodcm adinamvrlo alakkokki motoji–

¹² Mc:pa:langka jc nolum odo ayirdo Kristokolokkc angumotagai, Israeldok migomdokodok tani: kvdv:dokkc angula du:motungai, odokkc pesula lugot lunamdokkcpc angu amo:lok kangkinma:nam tani:kai,

¹³ mo:pvso oko mc:tincsin kama:pc odokkc Ru:ncpvnc kama:pc.

¹⁴ Kapila:nc Bv ngoluk mcnganc, sc:kobv ngolum anyipagcm akkongkopc ru:toji, odokkc mirupc imvnsula:namdok mopansunamdok bare:dcm mopentoji,

¹⁵ Bvk adindokki luyirla lulvgnamkvdv:do lujvglurodcm odokkc lutcmla lunam lujvglurodcm la:pakla, jc Bv:jen Bvkkolovng anu tani:ko ru:ladopc anyidok dungkodo,

¹⁶ cdcmpila mcnganmola, odokkc ngolum anyipagcm Ru:ncpvnckolo:pc amvr atcrongkolo kurusdokki lckomotoku, odokki mirupc imvn sunamdcm itcrsumoto.

¹⁷ Odokkc Bv gvdo odokkc nolum mcngandcm lutadbito sc:kobulu mo:tc:ru:pc dungaji odokkc cdc sc:kobulu anindagaji mcngancm bulukkolo:pc;

¹⁸ Kapila:nc Bvkkokki ngolu anyipagc Yalo akkolo Abukodo:pc gva:napc gva:langcm pa:to.

¹⁹ Cdcmpidag cmpinamc nolu kangkinma:nama:bong odokkc dunggcnna du:ncma:bong, cmpige:la nolu aipc kumnc tani:kvdv:dok du:jon ajonc odokkc Ru:ncpvnckc crang okumdok tani:yc,

²⁰ mclvgla ager germonam odokkc lungor lunckvdv:dok tayclo mosa:nammc, Kristo Jisubv avdci su:kdok vlv:pc ila:yam,

²¹ sckkolo mosa:nam appv:dcmci lckopc mokumsutag odokkc Ru:tumkolo angunnc kumko okumpc bottasa:do;

²² sckkolo nolumsin Ru:ncpvnckc dungko okumpc Yalodokki motagji.