HIBRIUKVDVNG 9 - ANU LUGOD N. T. (BSI)

Mo:pvsokkc Odokkc Taycng Among Kumnam

¹ Su:pak lupongarnam lugoddc kumnam igod gvgodkvdvngc dungai odokkc mo:pvsok kumko mo:takko.

² Kapcnc tombu abborko mosv:tungai, mo:rongkc du:ncdcm okolo saki:dcm tvla lcngkodo odokkc tcbuldc odokkc lcngkansunamdok pita:dc dungaji; cdcm Angunnc Dungko cmdag.

³ Akon sorkomnam gasordo tombu aborko Angunnoksin Angunnc cmnamdcm tonsa:to,

⁴ avn mobu:lvgnam dunang romko odokkc lugoddok peradc appvng kekonkesagdok avnki mobu:lvgla, okodc along romnamcm lc:nanc avn attarko du:ji manna:dcm bonggabla du:ncko, odokkc Aronkc lakuti:dcm cdc annckvdv:dcm papagamnamdcm, odokkc lugoddok tcbulkvdv:dcm;

⁵ odok tayc:do amin gvnclok alapkanc taycng among lutadnc mc:yinsunam tedgc:dc ugyumdopc lapkombomto. Sc attarkvdv:sok agomcm ngolu su:pak appv:dcm lulenlanggom lungapla:mang.

⁶ Sc mosv:nam kvdv:scm mola:yam cdcmpc, dormo ager gernckvdv:dc mo:rongkc tombudo:pc gva:tvdagai, buluk dormo ager ipcnam kvdv:dcm ilang gvla;

⁷ cmpige:la akono:do:pc dormo ager gerncdc gvdag, odokkc cmpige:la Bv dv:taklo lckkongko, odokkc i:ycm la:mango:pcmang okodcm bv bvk avk lcgango:pc bidoji odokkc tani:kvdv:dok imurnamkvdv:dok lcga:pc.

⁸ Sokki Angunnc Yalodc lukanbbidag jc kumko mo:takdo:pc gvko lambcdcm moge:ma:da mo:rongkc tombudc du:tvla du:do appv:do (okodc silokc dv:tak kvdv:sokkcpc lcngkan kanggodcji.)

⁹ Sc monam gvnamscmpc, amankvdv:dcmnang palvgnamkvdv:dcm bidag okodc kumncdok mc:nam sagnamdcm pv:namkopc aimola:mang,

¹⁰ cmpige:la donamlo:la odokkc tv:namlo bidag odokkc angu angu vrnamc, amvrdok lcgangc binam igod gvgodkvdvngc lckoda igod gvgod itengvtenkuma:dasisscm.

¹¹ Cmpige:la cdvlo Kristobv dormo ager gernclok bottcncpc igur gvgurncpc lenka:ji ainc attarkvdv:dokkcpc cdc lennckvdv:dokkcpc, odo bottaya:nc odokkc aiya:nc tombuko (alakkokki moma:namko, cdcyam,

¹² sc ru:nampvnam kvdv: sokkcmang,) Bv lo:dvlokkcpc Angunnc Dungkodo:pc gva:to, sobenlokkcmba: so:bo awolok i:ycm la:ma:pc cmpige:la Bvk avkc i:ycm langge:la, cdcmpc lo:dvlongkvlcgangc rclennapc ito.

¹³ Kapcnc aima:nc amikvdv:dcm crkatnamdc sobenclang vbo so:bokvdv:dok i:kvdv:dokki odokkc vnc so:bo awodok mcdbudc adin-amvrsok narcmonancpc ido,

¹⁴ Kristokc i:dc cddvko abaya:pc, sc:kobv lo:dv-longkvpc du:nc Yalodc avdc atvko lumurko kama:pc Ru:ncpvnckolo:pc bisutonc, noluk mc:namsagnamcm narc:moycnc sinam agerkvdv:dokkcm turra du:nc Ru:ncpvncmc agerki kumpc.

¹⁵ Cdcmpidag Bv anu lugodkolok pongkokdo dungge:la igurbincdc, odomvlo jen cdc sc:kobulum gogtu:nc lo:dv-longkvpc dungkunamdok pesunamdcm pa:ycpc, sinamko a:la:yam okodc lupo:nam lugodokki buluk imur-siyarkvdv:dokkcm rcpvttagji.

¹⁶ Kapcnc okolo mc:namko mc:doji, cdcm sc:ko motoji odok sinamdc cngunma:ru:pa:yc.

¹⁷ Kapcnc mc:namkonc kvnggv:pc ilang-gvlangma:la:yam cdvlo:pc sc:ko cdc turdopc mokuma:dodo:pc cdc sinamo:lo mc:lvgdag.

¹⁸ Cdcmpila anki lupongarnam lugoddcmsinci i:ma:pc aidag cmna lutomang.

¹⁹ Kapcnc cdvlo appvng lujvglurodok appvng lulvg lunamkvdv:dcm Mose:ki appvng tani:kvdv:dcm lubito, bv so:bo awodok odokkc lv:nc uni:dokki odokkc hyssop vsvng anncki, odokkc potindcm odokkc tani:kvdv:dcm abkatto, scmpc lula,

²⁰ “Sc lugod lunamdok i:dc okodcm Ru:ncpvncbv nolum lulvgtoji.”

²¹ Odokkc cdcmv:pc bv i:dokki tombudcm odokkc attar kvdv:dcm kumnamlo inasa:nanc kvdv:dcm abkatto.

²² Aroru:pci, lujvglurodok i:dokki appvngcmci narcngamcimodag, odokkc i:ycm bidmoma:pc pa:plok mc:yinsunam kamang.

Kristokc Palvgkosunamdc Pa:bcm La:pakdag

²³ Cdcmpidag cdc taycng du:nc attar kvdv:dokkcpc kangkonsunam kvdv:dc cdc dormo ager igod gvgodkvdv:dokki narc:dopc mopu:dopc, ckvdaggom taycng du:nc attar-avkvdv:dc palvgnam kvdv:dcmyam aiya:dagai.

²⁴ Kapcnc Kristobv alakkoki monam kumko mo:takkolo:pc gvangtomang, arodoggarcmpinc kangkonsunamko, cmpige:la taycng among dungkoru:do:pci gvangkang, su:pak ngoluk Ru:ncpvnc kcra:pc lcngkansubipc.

²⁵ Cdcmanggom Bv avdcm lckko lckko:lo bisupc, kapc dormo ager gerncdc Angunnc Dungkodo:pc gva:toji dv:tak dv:taklo i:dokki bvk avkcma:pc;

²⁶ kapcnc odomvlo Bv du:g gviya:pc mo:pvscm runggabdodokkcbong lckko lckko:lo. Cmpige:la cdc kapc idagji, Bv lo:dv longkv lcgangc Bvk avdcm bisula pa:bcm la:pakpc cmna dv:tak kvdv:dok du:tcrso lcngkansutoji.

²⁷ Odokkc cdc kapc tani:ycm lcko sidopc ayircm mctagnc, odokkc odok lcdupc kcbangcm ba:donc,

²⁸ cdcmv:pc Kristobv, bojcru:lok pa:p lcgangc lenycku, pa:pkokki imvn gvmvnsupc cmna ilamang cmpige:la cdc sc:kobulu kvnggv:pc mc:tinna toya:la du:nc cdcmbulum mopvtpc cmna.