HIBRIUKVDVNG 6 - ANU LUGOD N. T. (BSI)

¹ Cdcmpidag kajc Kristokc lusa:nam astrong agom lukamo:dcm mcge:la odokkc sv:titsunampc sv:sa:la kvnggv:la gvlai: lckoda sinam ager gernamkvdv:dok lcgangc odokkc Ru:ncpvnckc mc:jvgnamdok lcgangc lckoda dunggcngkoko mosa:ma:pc,

² lukanbinam kvdvngki kumnam lcgang vrsunam kvdv:dok, alagcm pigabnam kvdv:dcm, odokkc lo:dvlongkvlok kcba:ba:nam.

³ Odokkc scm ngolu iyc jodi Ru:ncpvncb imomvlo.

⁴ Kapcnc lcko luyirla kinmodag lcdudokkc cdcmbulum lckoda asincm mc:dvrra mclatsumolangkupc mc:la:mang, sc:kobulu taycng amandcm pangkvtu:bo:ji, odokkc Angunnc Yalodcm pa:mvnkunnc,

⁵ odokkc Ru:ncpvnckc agomdok ainamdcm pangkvtobo:ji odokkc a:pcnc dv:tag ayirkvdv:dok ilang–gvlangkvdv:dcm, jodi bulu angu dormom iyc odokkc,

⁶ buluk avkc mcngkamkokki Ru:ncpvnckc Awodcm Kurusdo pvtkelvgla odokkc Bvm luka:la lunampc luto.

⁷ Kapila:nc oko amo:dc lckko lckko:lo olednc pcdong asidcm mu:dagnc cdcm, odokkc ncsin ncge:ycm sa:modagnc cdc sc:kobluk lcgangc arvgcm idagji odokbuluk lcgangc agerro aidopc, Ru:ncpvnckolok akirba:dcm pa:dag.

⁸ Cmpige:la cdc jodi ta:ngcmna ta:ng kanc vsvngcm sa:moyc, cdc arckama:nc odokkc pelvgkosupcnamc; cdcm rompakpcnamc.

⁹ Ngolu cdcmpc ludaggom, cdcmpc idaggom noluk agomlo, aipc mc:bomsunam kvdvnga, ngolu turnam pa:namdok atvcm aiya:pc mc:dag.

¹⁰ Kapcnc Ru:ncpvncbv cdcmpinc aro kama:ncmang noluk agercmnang aipc mc:namdc okodcm nolu Bvk lcga:pc aipc kumnc tani:kvdv:dcm lcngkantoji, kapc nolu su:paksin idoji.

¹¹ Odokkc ngolu mc:dag noluk appvngc c:mo:pinc kvnggv:pc mc:namcm pv:namkopc mc:tindokkc du:tcrdo:pc du:ma:sisscm lcngkanka:langka cmna,

¹² odomvlo jen nolu aso-aso:ma:ycpc, cmpige:la mc:jvgla odokkc mentumsunamki pesunamdcm pa:nckvdv:dcm ka:yi:sula imvnncpc incpc itoka.

Ru:ncpvnckc Aroru:pc Pesubinam

¹³ Kapcnc cdvlo Ru:ncpvncbv Abrahammc pesunamko pesubitonc, Bvkkc sc:kosin bottcya:nc kama:nammc sckkokki pesula:ycji, Bv av avdc pesuto, scmpc lula,

¹⁴ “Aroru:pc ngo nom akirba:d biyc odokkc nom ommangcm bojcmoyc.”

¹⁵ Odokkc cdcmpila Abrahambv, mentumsula du:to, pesunamdcm pa:to.

¹⁶ Tani:yc aroru:pci bulum bottcya:nc aminki pesudo, odokkc buluk appvng lukur-lure:ycm pesunamkokki arro cmna lunamki lutcrdo.

¹⁷ Cdcmpidag cdvlo Ru:ncpvncbv mc:jvgya:dopc lcngkanpc mc:dagji pesunamdcm pa:nckvdv:dcm Bvk angumola:ma:nc soritdok mcngkamdcm,

¹⁸ Bv pesubinamkokki pongkokdo du:bito, odomvlojen angumola:ma:nam attarki, okodokki cdcm ila:mang jc Ru:ncpvncbv lume:yc cmna aropc lcngkanpa:mang, ngolu sc:kobulu dugrasula dungkodo:pc dugsitoji kvnggv:pc lusv:lvgnam mc:motonc ngoluk ka:pc lcngkanpc mc:tindcm motumdopc.

¹⁹ Ngolukkc sc yalodok arorungc dung odokkc lo:dvpc du:nc ollung ke:tumsunanc, mc:tinko kumko okumdok arang sorkomnam gasor kekondo:pc gva:nanc,

²⁰ okolop Jisubv dugpo:la dugnckopc, lo:dvlongkkvpc du:nc dormo ager gernclok bottcncpc Melkijedekkc ikam-gvkamdok lcdudokkc ngoluk lcga:pc gvka:ji.