HIBRIUKVDVNG 5 - ANU LUGOD N. T. (BSI)

¹ Kapcnc dormo ager gernclok bottcnc kvdv:dok ara:lokkcm ballenna la:namdcm tani:kvdv:dok lcgangc ager gerdopc agercm Ru:ncpvnckolo du:mvndagmvnla bitag, pa:p lcgangc amancm odokkc palvgnam bidopc cmna.

² Bv ijupsikabo:pc kinma:nam kvdv:dcm odokkc agom lukam tadnckvdv:dcm ibisa:bila:dag, bv avdci ilang gvlangma:namkokki yedrila:yam.

³ Odok lcgangc bv bvk avkc pa:p lcgangc palvgnammcm palvgru:pa:yc cdc tani:kvdv:dok lcgangvngcmpc.

⁴ Odokkc akonc avkcm mcnggcnammcm avyc mcnggcsumang, cmpige:la Bvm Ru:ncpvncbv gogtag, kapc Aronmc gokkaji.

⁵ Cdcmv:pc Kristobv avyc Bv bottcpc mc:sumangai dormo ager gernclok bottcncpc, cmpige:la Bvkkokki agercm gerdopc tolvgto sc:kobv Bvm lutoji, “No ngok Aowo, silo ngo nom oto.”

⁶ Kapc akon dungkolo:sin Bv lutu:ji, “No dormo ager lo:dvlongkvpc gerncko. Melkijedekkc inamdok lcdudokkc.”

⁷ Bvk adinamvrki inamdok lcdudo, Jisubv kumnamclang amikc lcgang bottcru:pc kabla odokkc miksi dvla kumnamcm kumka, Bvm sc:kobv Bvm sikolokkc motula:dagaji, odokkc Bvm Bvk dormokanam pcsokokki taddungai.

⁸ Bv Awoka:gom, Bv agom lukam tadnamcm tadkaisuto okodcm Bv odokki du:gpa:toji;

⁹ odokkc pv:namkopc aimola Bv lo:dvlongkvpc moturnamlok lenkopc ikang Bvm sc:kobulu agom lukamcm tadlvngka:ji,

¹⁰ Ru:ncpvnckokki dormo ager gernclok bottcnc cmna Melkijedekkc lcdudokkc tolvgla:yam.

Mc:jvgcm Mcpakma:dopc Lutadla Lunam

¹¹ Sc agomscm ngolukkc bojcrungko lupcnammc dung okodc lulen lua:la lubipc tordagji, nolu tadpc tadkindantoma:bong.

¹² Kapcnc su:pakkc ayirso nolu poyirncpc ingappcnama:ji, nolum sc:koiyc poyirncko lckoda nolu lagidung Ru:ncpvnckc lupongarnam agomkvdv:dcm lubincko.

¹³ Kapcnc sc:kobulu gakvr tv:tvla du:nc appv:dc dormokanc agomdo kinncmang, kapcnc bv ko:kang sv:sa:nc.

¹⁴ Tornc apin donamdc bottcnc sv:titsunc kvdv:dokkcpc, kapcnc cdc sc:kobulukkc ainclokkc aima:ncdcm kangkinnapc ycbu:-yerungcm tadyitgvyittagnc.