HIBRIUKVDVNG 1 - ANU LUGOD N. T. (BSI)

Ru:ncpvnckc Agomc Bvk Awodokki

¹ Bojcru:lo odokkc angu angu lambcki Ru:ncpvncbv lekelokkcbong ngoluk abukvdv:dcm lungor lunckvdv:dokki luto;

² cmpige:la sc du:tcr longckvdv:so Bv ngolum Awo akokokki luto, sc:kom Bv appvng attarlo pangkonsuncpc tolvgtoji, sckkokki Bv Mo:pvscm ru:toji.

³ Bv Ru:ncpvnckc amin gvnamdcm unkonsumodag odokkc Bvk mour tubjedardcmpc inam-sa:nam lcngkandag, mo:pv ap pv:scm agomdok ilang gvlangki jo:sa:la. Cdvlo Bv pa:pkvdv:dok lcgangc narcngmotonc, Bv taycng amo:to Mcngcru:namlok lagbvgpc tedkang.

Ru:ncpvnckc Awodok Bottcru:nam

⁴ Taycng among lutadlunc kvdv:dcm bottarya:ncpc ila Bv bulumyam aiya:ru:nammcm pa:to.

⁵ Kapcnc taycng lutad lunckvdv:dc lekelokkcbong Ru:ncpvncbv sc:kom okkomna lukanc, “No ngok Aowo, Silo ngo nom otobong?” Cdcmanggom lckoda, “Ngo Bvkkcpc abukcpc badyc, odokkc Bv ngokkcpc awokopc iyc?”

⁶ Odokkc lckoda, cdvlo Bv opongarnamkvdv:dcm mo:pvso:pc gvboyckunc, Bv ludag, “Ru:ncpvnckc taycng lutad appv:dcm Bvm kummotoka.”

⁷ Taycng among lutad lunckvdv:dok agomcm ludag, “Sc:kobv Bvk taycng among lutad lunckvdv:dcm csarpc imodagji, odokkc Bvk pagbokvdv:dcm vmvlok dorncpc imodagji.”

⁸ Cmpige:la Awodok agomcm bv ludag, “Nok migom dungkodc, O Ru:ncpvnc, lo:dv longkcm du:yc! Dormo kanc migom ilang–gvla:namdc nok migom doko mo:pvdok ilanggvla:nammc.

⁹ No dormokanamcm aipc mc:to odokkc lujvglurokama:nammcm tayumto. Cdcmpidag Ru:ncpcpvncbv, nok Ru:ncpvncbv nom mc:pomcngannok tulangcm yonnvgto nok ajonkvdv:dcmyam bojcya:pc.”

¹⁰ Odokkc, “No, Ru:tumno, lendo-a:do:do mopvscm pvto, odokkc taycngkvdv:to nok alakdog agerc.

¹¹ Cdcbulu yogpakyc, cmpige:la no du:tvdag; cdcbulu gcnam attarcmpc, akubomna gvdag.

¹² No gasorcmpc cdcmbulum yedsa:dag, odokkc bulum angumoyc. Cmpige:la no cddvng c:mo:pinnc, odokkc nok dv:tak kvdv:dc cdvlosin gvngapma:yc.”

¹³ Cmpige:la oko taycng lutad lunncm Bv cdvlai luton, “Ngok lagbvgpc tedttok, nok miru kvdv:dcm nok alckvdv:dok lcgc:pc imoma:sisscm.”

¹⁴ Cdc appv:dc ager incsa:nc yaloma:lang ager gerdopc mclvgnammc, cdc sc:kobulu moturcm pa:tonc odok buluk lcgangc?