GALATIANG KVDVNG 5 - ANU LUGOD N. T. (BSI)

Noluk Sadinpc Du:namcm Mosv:la Lc:lang

¹ Kapila:nc ami kcvglo du:ma:nam lcgangc Kristobv ngolum motuto; kvnggv:la du:toka cdcmpidag, odokkc pagbolok jungoli:lo tuogsuyoka.

² Su:pak ngo, Poulbv, nolum ludung jc nolum gadpuktagmvlo, Kristobv nolukkcpc avpc ima:yc.

³ Ngo appvng tani:lo:pc lukanbila lulatla ludung sc:kobv gadpugcm torvgsutakji jc bv lujvglurodcm lukamdcmpc tadpa:ru:yc.

⁴ Nolum Kristokolokkc ibi-sa:bitung, nolu sc:kobulum lujvglurodokki dormokannc cmna lutoji, nolu aya:dokkc gvpakkang.

⁵ Kapcnc Yalodokki, mc:jvgki, ngolu dormokanamdcm toya:la toka:la dung.

⁶ Kapila:nc Kristo Jisukolo gadpuknammc cdcmanggom gadpukma:namc cmmum arrc kannc, cmpige:la mc:jvgdc aipc mc:namkokki agercm gerdung.

⁷ Nolu aiyo:pc dugdungai; sc:ko nolum arodcm lukamdcmpc tadpc motumton?

⁸ Sc lunamsc bvkkodokkcmang sc:kobv nolum gogdagji.

⁹ Adjio:nc Komira:dc alumpakdcm go:sa:modag.

¹⁰ Ngokkc Ru:tumkolo asin kvnggv:pc mc:tinc dung jc nolu ngokkcdcmyam angu oko mc:namcm mcma:yc; odokkc nolum sc:kobv ipusireycm idu:nc bvk kcba:ba:namcm pa:yc, bv sc:koibv:daggom.

¹¹ Cmpige:la ngo idaggom, bvrokvdvnga, gadpuknamdcm su:paksin lutadbidu:mvlo, kapila ngo su:paksinci ipusire:kosuycn? Odo agomdo Kurusdok lcsudla otapbonc sv:tu:dcm la:paktobong.

¹² Ngo mc:dag cdc sc:kobulu nolum dunggu:ma:dopc imodu:nc bulu avkvdv:dc pasotsunamdc aiya:dag!

¹³ Kapila:nc nolum motunam lcga:lo:pc gogtungai, bvrokvdvnga; noluk motunammcm adin amvr ipogvpo lcgangongc ina-sa:nayoka, cmpige:la aipc mc:namkokki akonc akonkc kcvgpc ager gerya:ncpc ilangka.

¹⁴ Kapila:nc lujvglurodc agom apiro:lo pvngangkang, “No nok kumrvko:rcm avyvngkcmpc aipc mc:langka.”

¹⁵ Cmpige:la nolu akonc akoncm rckka:mvnsuyc odokkc metka:mvnsuyc ansulanka jc nolu akonc akonkokki mokemvnsumangka.

Yalodc Odokkc Tani: Mc:nam Gvnam

¹⁶ Cmpige:la ngo ludung, Yalodokki lambcm gvtoka, odokkc amvrdok mcngkamkvdv:dcm mc:lvgsumoyoka.

¹⁷ Kapila:nc amvrdok mc:namkvdv:dc Yalodok birudi:dag, odokkc Yalodok mcngkam kvdv:dc adin-amvrdok birudi:dag; kapcnc sc:bulu akoncm akonc nvgka:mvnsudag, nolum motumpc nolu okodcm ipcma:namcji.

¹⁸ Cmpige:la nolum jodi Yalodokki gvboyc nolu lujvglurodok kcvgpc du:mang.

¹⁹ Su:pak adin amvrdok agerkvdv:dc lendanna dung: nc:ng milbo:pc gvmang la:ma:pc la:mvnsunam, narc:ma:nam, ka:bomc:bogo:la gvnamc,

²⁰ monam moimangcm kumgo:nammc, morunammc, mirupc imvnsunamc, pamvnsunamc, ka:ruka:ma:nammc, aglvng sa:namc, atcgongkcpc mc:sunammc, lukermvnsunammc, kcra:pc dagrobla lunamc,

²¹ ncnamc, tvngvrdowursunamc, apong tv:la jcnggumla du:namc, odokkc cdcmbulumpinnc. Ngo nolum lutaddung, jc cdc sc:kobulu cdcmpinc agercm gerdoji Ru:ncpvnckc migom doko amo:do du:mvnpangku ma:ycku.

²² Cmpige:la Yalodok apva:yckvdv:dc aipc mc:namc, mcnganc, mentumsula du:namc, ayangabonammc,

²³ aikamponammc, mc:jvg-jvrvgnammc, ainc asin gcla inamc, avycm mentumsula du:namc; cdcmbulumpinclok birudi:pc oko lujvglurrosin kamang.

²⁴ Odokkc cdc sc:kobulu Kristokcpc idagji Jisukcjc adin amvrdcm kurusdo pvtketo odok mc:nam sagnam dc:mang.

²⁵ Ngolu jodi Yalodokki turyc, kajc ngolu yalodokking lambcm gvlai.

²⁶ Kajc ngolu asinc bottaya:pc mcsuyoka; akoncm akonc aglvng sa:moyoka, akoncm akonc ncka:mvnsuyoka.