AGER KVDVNG 3 - ANU LUGOD N. T. (BSI)

Lcbe:nc Tani:ko Csa:mokunam

¹ Longckoncm Pitorbv:lang Jo:nbv kumko okumdo:pc kumdv ayir kona:do gvdungai,

² odokkc ododokkcbong lcbe:nc tani:ko jo:bomnamko, sc:kom bulu kumko okumdok kangkan cmnam yabgodo kumko okumdok gva:nckvdv:dok kogo:la binamko pa:ycpc cmna jo:yi:la lc:tungaji.

³ Pitormclang Jo:nmc kumko okumdo:pc gva:pc cmna idopc ka:la:yam, bv da:n kogo:la pa:namko kumna koto.

⁴ Odokkc Pitorbv bvm ka:mi:la ka:to, Jo:nkokki, odokkc luto, “Ngolum ka:toka.”

⁵ Odo bv bulum ka:mi:-miri:la ka:to, bulukkolok o:kaiko pa:pc cmna.

⁶ Cmpige:la Pitorbv luto, “Ngokkc murkongcba: avnc kamang, cmpige:la ngokkc okko du:ji ngo nom biyc; Najaretolok Jisu Kristokc aminno, lambc gvtok.”

⁷ Odokkc bvm lagbvg alagdok sogabla bvm sosa:to; odokkc oddung bvk alckvdv:dc:lang lcbvng kvdv:dcm tormoto.

⁸ Odokkc bv sumrobla darobkang odokkc lambcm gvla kumko okumdo buluk lcdulo gvangkang, gva:la sumna: sumna odokkc Ru:ncpvncmc aipai cmnang cmna.

⁹ Odokkc tani: appv:dc bvm lambc gvdopc odokkc Ru:ncpvncmc aipai cmdopc ka:to,

¹⁰ odokkc bvm Kangkan cmnam Yabgodo tedncdc cmna kangkinamto; odokkc bulu mcngapla:ma:pc ingapkang; odokkc mc:la okko bvkkc ika:ji mcngaksukang.

Kumko Okumara:do Pitorkc Lutadnam

¹¹ Bv Pitorkclang Jo:nkc lcdulo gvgab-garabla du:mvnna du:dodcm tani: appv:dc Solomonkc barandang cmkodo:pc dukkumsukang.

¹² Odokkc cdcm Pitorbv kangge:la tani:kvdv:dcm luto, “Israelsok tani:kvdvnga, kapila nolu scm mcngapla:ma:pc idang, cdcmanggom nolu kapila ngolum ka:motsula du:n? Ngoluk avkc ilang gvlangkokki cdcmanggom ainamkokki bvm lambcm gvmotokuncmpc?

¹³ Abrahamkc Ru:ncpvncdc odokkc Isahakkcdc odokkc Jakobkcdc, ngoluk abubulum Ru:ncpvncdc, bvk ager gerya:nc Jisumc amincm gvmoto sc:kom nolu topaklvgtonc, bv cdvlo Bvm mclennvgkupc cmna mc:tungaji.

¹⁴ Cmpige:la nolu Angunncdcm odokkc Dormokancdcm topakto, odokkc nolum tani:mokenckodan nolum bidokupc koto,

¹⁵ odokkc turnamsok gagbomncdcmc: moketo, sc:kom Ru:ncpvncbv sikolokkcm turmotokuji. Ngolu odok lukanbinckvdvngc.

¹⁶ Odokkc bvk amindc, bvk amindcm mc:jvgkokki, sc aminscm tormotoku sc:kom nolu ka:begdu:nc odokkc kindu:nc; odokkc Jisukokki mc:jvgnamdc:na okodc sc amiscm aiyo:pc ainc amvr-ammom bitokunc noluk appvngkc kcra:do:pc.

¹⁷ “Odokkc su:pak, bvrokvdvnga, nolu kinma:la agercm ito, noluk migomkvdv:dc:sin imvnnamdcmpc.

¹⁸ Cmpige:la Ru:ncpvncbv okodcm nappangki lutonc appvng lungornc tani:kvdv:dok agomcm, jc Bvk Kristobv mogvtmomatdcm mopvnammc pa:pcnammc, Bv cdcm lukamdcmpc imoto.

¹⁹ Asinc cdcmpila mc:dvrra mc:latsutokuk, odokkc lckoda gvlattokuka, noluk pa:pkvdv:dcmjen motidamdopc, cdc anumonam ayirdc:jen Ru:tumkolokkc a:ycpc,

²⁰ odokkc jc Bv:jen noluk lcgangc ager gerdopc togc:lvgdopc mclgycpc, Jisumc,

²¹ sc:kom taycngtc Ru:ncpvnckc agom lunam appv:dcm ima:sisscm torvgru:supa:yc leketo:dvlokkcbong Bvk angunnc lungor agom lunckvdv:dok nappangki lukamdcmpc.

²² Mose:bv luto, ‘Ru:tum Ru:ncpvncbv noluk lcga:pc noluk bvrokvdv:dokkcm lungor agom luncko lenmoyc odokkc Bv ngom la:lento. Nolum okodcmci Bv lubiycnc nolu tadlangka.

²³ Odokkc cdcmpc iycnc jc cdc lungor agom luncdcm sc:ko sc:koi tadma:ycji tani: kvdv:dokkcm mokkeyamyc.’

²⁴ Odokkc lungor agom lunc appv:dc, Samuelkolokkc odokkc sc:kobulu odok lcdudo gvkaji, bulumsin sc longckvdv:sok agom lutadbika.

²⁵ Nolu lungor agom lunckvdv:dok awokvdv:dc odokkc lugoddokkc okodcm Ru:ncpvncbv noluk abukvdv:dcm bikaji, scmpc Abrahammc lula, ‘Odokkc nok pu:pojarpolo mo:pvsok crang appvngc gerncpu:ncpc iyc.’

²⁶ Ru:ncpvncbv Bvk ager gerya:ncdcm turmoge:kula, nolukkolo:pc mclvgpo:danto, nolum akhirba:d bipc cmna noluk appvngkc aima:nc agerlokkc gvladamkumvlo.”