AGER KVDVNG 28 - ANU LUGOD N. T. (BSI)

Malta:do

¹ Ngolu ba:pvtsudag lcdudo, ngolu odo kinto jc cdc siycng ara:dok amo:dc Malta:dc.

² Odokkc odok du:nc tani:kvdv:dc ngolum anggoscscmpc ayangcm lcngkanto, kapila:nc bulu vmmcm parbito odokkc ngolum appvngcm goga:to, kapila:nc pcdongc owa:bomkang odokkc ansv:dagai.

³ Poulbv vsvng jvrvgko gingkumsuto odokkc cdcm vmvlo romnvgto, vmvdok gunamdokki tabv adorkonc cdvlo ngc:lenka:ji bvg alagdok ycnggabge:la gamto.

⁴ Cdvlo odok du:nckvdv:dc bvk alagdo tabvdcm bvkcn-bvli:dopc ka:tonc, bulu akoncm akoncm luka:mvnsuto, “Mc:murpcnamc kama:bong sc tani:sc tani: mokeru:ncko. Bv siycngdokkc ba:pvtsutogom ainc-aimang ka:ncdc bvm turmotomang.”

⁵ Bv, ckvdaggom cmpaidcmpai tabvdcm vmvdo dana:lvgto odokkc atvsintomang.

⁶ Bulu toya:la du:to, bv bv:sa:ycpc cmna cdcmanggom vgcmpc kcdtapla sipakycpc cmna; ckvdaggom bulu bojcrungko toya:la du:la:sin odokkc bvkkc okkomsin aima:ncko inamcm ka:begtomang, buluk asinkvdv:dcm mc:latsutoku odokkc luto jc bv uiko.

⁷ Cdcmpinamc odo mo:takdok kcra:pc du:jon dagjon kvdv:dc siycng ara:lok amo:dok ru:tum tani:dokkai, Publiu cmnamko, sc:ko ngolum torvgsutoji odokkc lowumkopc mibbom borvgsutoji.

⁸ Cdcmpc ika:nc jc Publiu:kc abudc ramnamclang aki:dugnamc ikang; odokkc Poulbv bvm gvka:la ka:to odokkc kumbito odokkc bvk alagdo pigabla bvm bv csa:motoku.

⁹ Odokkc cdvlo cdc cdcmpc ika:ji, siycng asi arang amo:dok ake tani:kvdv:dc sckkc sckkc kinamc dunggaji cdcbulusin gva:to odokkc csangammotoku.

¹⁰ Bulu bojcrungko amancm ngolum bitungai; odokkc cdvlo ngolu ko:la gvtokuji, bulu oko okkom ngolum lagidagaji ja:j ollu:do lvgto.

Malta:dokkc Ro:mdo:pc

¹¹ Po:lo pvwum lcdulo ngolu ja:j ollungkolo ko:la gvto okodc siycng ara:dok amo:do dvgvndo dungaji, Alekjandria:do ja:j ollungko, opem Bvro anyi kanggod kancko.

¹² Siraku:do konggange:la, ngolu odo lowumko dungai.

¹³ Odokkc ngolu odokkc yadladla gvlangkula Regiumdo gvpv:to; odokkc longcko lcdudo pcya: owangbok csardc yusangkang, odokkc longkondo ngolu Puteoli:do:pc.

¹⁴ Odo ngolu bvrokvdv:dcm rvgsuto odokkc buluk lcdulo kvnvd longckopc du:mvndopc gogto. Odokkc ngolu Ro:mpc gvto.

¹⁵ Odokkc odok bvrokvdv:dc, ngolu gvdung cmna tadto, Appiu Attarkokodo:pc odokkc Awum Mibo dungkodo appv:pc gvlento ngolum rvgsukapc.

Ro:mdo

¹⁶ Odokkc cdvlo ngolu Ro:mpc gva:toji, Poulbv atcro:dcm du:dopc du:moto, mimag monckvdv:dcm kanggabbomna.

¹⁷ Lowum longc lcdudo bv odok du:tc:dok du:nc Jiwu igur-gvgurnc kvdv:dcm gokkumsuto; odokkc cdvlo bulu gvkumsutoji, bv bulum luto, “Bvrokvdvnga, ngo tani:kvdv:dok biru:di:pc okkomsin imanggom ngoluk abukvdv:dok itc-gvtcng ma:dcmpc, ckvdaggom ngom Jerusalemdokkc makana:lo tumnampc Roman alagkvdv:dc tolvgto.

¹⁸ Cdvlo bulu ngom kangkvtonc, bulu ngom mclennvgkupc cmna mc:tungai, kapila:nc ngok ajcngdo sipcnam palvgcm lvgpcnam kamangci.

¹⁹ Cmpige:la Jiwu kvdv:dc cdvlo lujck jcktoji, ngo Kaesarmc ajcngko jc:pcrung ikang ngok ope:ncgvng birudi:pc ngokkc okkosin samjcmna lupcnam kamangagom.

²⁰ Odok lcga:pc cdcmpidag ngo nolum ka:pc odokkc lupc cmna gogto, kapcnc Israeldok mc:namkokki: ngo:jc sc ikoli sokki ycnggabkosutoji.”

²¹ Odokkc bulu bvm luto, “Judia:dokkcm ngolu nok agomlo oko do:jvgcmsin pa:mang, odokkc so:pc gvnc brokvdv:dok akosinci lukur-lule:bimang, cdcmanggom nok atv aima:ncm nokkcm lubimang.

²² Ckvdaggom ngolu nokkolokkcm tadpc mc:dag nok mc:nam sagnam kvdv:dc okkoji; kapcnc sc ope:sok agomcm ngolu kindagjc appv:lo birudi:pc ludag.”

²³ Bulu cdvlo bvk lcgangc longcko ru:scgtoji, bulu bvk dungkodo:pc bojcrungkonc gva:to. Odokkc agomdcm kvlenkva:la ro:dokkc yumcdo:pc kvbito, Ru:ncpvnckc migompila du:namdok agomdcm lukanbila odokkc Mose:kc lujvglurodokkcmnang lungor lunam anyipak dokkcm Jisukc agomcm bulum mcnga:mopc cmna.

²⁴ Odokkc akedc bv okodcm lutoji mc:jvgto, akedc cmpige:la mc:jvgtomanggom.

²⁵ Cdcmpila, buluk arangv:dok tolvgmvnsuma:namc, bulu gvpakkangku, Poulbv agom lugodko luto: “Angunnc Yalodc noluk abukvdv:dcm lunamdc lugabdagai Isaia: lungor lunckokki lunamdc:

²⁶ ‘Gvkang cdc tani:kvdv:do:pc, Nolu aroru:pc tadycpc cmpige:la cdvlosin tadkinma:ycpc, odokkc nolu ka:begru:ycpc cmpige:la cdvlosin kinma:ycpc,

²⁷ Kapcnc sc tani:kvdv:sok asinkvdv:dc tunggo-beggoma:pc sv:sangkang, odokkc buluk yerungkvdv:dc tadpc tada:mang, odokkc buluk amikkvdv:dcm bulu migjcmammoto; Ckvma:mvlo buluk amikkvdv:dokki kangkinamyc, odokkc buluk yerung kvdv:dokki tadyc, odokkc buluk asinkvdv:dokki mcngkinyc, odokkc ngokkolo:pc gvlatycku bulum csa:modokupc.’

²⁸ “Cdcmpcmvlo cdcm nolum kinabmokang ka:langka jc sc Ru:ncpvnckc mopvtsc Ru:ncmc kinma:nc kvdv:do:pc mclvgtagbong; bulu tadycpc.”

²⁹ Odokkc cdvlo bv sidc agomkvdv:scm lutoji, Jiwukvdv:dc buluk arangv:lo kvnggv:pc luker-luyermvnsula gvpagamkang.

³⁰ Odokkc bv odo bvk avkc murkongki dv:tag anyiko du:to, odokkc bvkkolo:pc sc:kobulu gvangka:nc appv:dcm torvgsuka,

³¹ Ru:ncpvnckc migom doko amo:dcm lutad lubila odokkc Ru:tum Jisu Kristokc agomcm aiyo:pc ka:de:pc odokkc motumma:pc lubila.