AGER KVDVNG 25 - ANU LUGOD N. T. (BSI)

Poulbv Migomnok Migom Kcra:do Kumna Lukansunam

¹ Cdcmpidodcm cdvlo Pestu:bv bvk mo:takdo:pc gvtoji, Kaesaria:dokkc Jerusalempc lowum lcdudo gvto.

² Odokkc kumnam ager gerncdok bottarya:nc kvdv:dc odokkc Jiwu kvdv:dok ru:tumtani:kvdv:dc bvm Poulkc birudi:pc lubito;

³ odokkc bulu bvm lulvgla luto, tani:dcm Jerusalempc mclvgbinamko itei cmna, bvm lc:sula lambcdo mokepc cmna:

⁴ Pestu:bv lubito jc Poulmc Kaesaria:do lc:to, odokkc bv avdci odopc asudo:ko lcdupci gvpc cmna mc:la dungai.

⁵ “Cdcmpc, bv luto, nolukkolok ilanggvlang kanc tani:dcm ngok lcdulo mclvgtei, odokkc cdc tani:dokkc atvko imurko du:mvlo, bulum bvm ajcngko jcnggcmmotok.”

⁶ Cdvlo bv buluk lcdulo pi:nyikoya: vyvng longcko dungge:la, bv Kaesaria:pc gvto; odokkc longkondo bvk kcba: bangko tedkodo tedto odokkc Poulmc langa:dopc lulvgko luto.

⁷ Odokkc bv cdvlo gva:toji, Jiwu kvdv:dc sc:kobulu Jerusalemdokkc gvkaji bvk kcra:do dagkang, bvk birudi:pc bojcrungko kvnggvng kvnggv:nc ajcngcm boma:la luto okodcm bulu lukanna lubila:toma:ji. Poulbv bvk lurasula lunamdo luto,

⁸ “Jiwu kvdv:dok lujvglurodok birudi:pcla: kumko okumdok birudi:pc, cdcmanggom Kaesarkc birudi:pc ngo cmpcsin lumurko lumang.”

⁹ Cmpige:la Pestu:bv Jiwukvdv:dcm mc:nam agerko ibilv:la, Poulmc luto, “No Jerusalempc gvlv:dagnci, odokkc olo sc ngok kcra:sok ajcng jc:namkvdv:scm kcba: ba:pcyc?”

¹⁰ Cmpige:la Poulbv luto, “Ngo Kaesarkc kcba:bangkodo dagdung, okolo ngom kcbangcm imurcm imang, no aiyo:pc kindagci.

¹¹ Ngo aima:nc ager gernckomvlo, odokkc o:kai itomvlo okodok lcgangc ngo sipcnammcji, ngo sikolokkc dugsipc cmna imang; cmpige:la buluk lugc:la lujcgnamdo ngokkc ngok biruddi:pc o:kosin kama:mvlo, sc:kosin ngom bulukkolo togc:lvgla:mang, Ngo kumna:sola: ludung Kaesarmc.”

¹² Odo Pestu:bv, cdvlo bvk kcba: ba:nc migom kvdv:dokki luposuge:la, lubito, “No Kaesarmc kumna:-sola luto, Kaesarkolo:pc no gvkang.”

Poulbv Agrippa:kclang Bernikkc Kcra:do

¹³ Cdcmpinamc longc asudko gvnamc, Bernikbv odokkc migom Agrippa:bv Pestu:mc gogrvgsupc cmna Kaesaria:do gvpv:to.

¹⁴ Odokkc bulu bojcru: longcko odo du:namc, Pestu:bv Poulkc ajc:dcm migomdok kcra:do scmpc lula lukanbito, “Pelikbv makana:lo tumla lc:nam tani:ako dung; odokkc ngo cdvlo Jerusalemdo dungaji,

¹⁵ Jiwukvdv:dok kumnam ager gernclok bottarya:nc kvdv:dc:lang abv:nc tani:kvdv:dc bvk agomcm lutadbito, bvk birudi:pc agomko ludopc.

¹⁶ Ngo bulum lubito jc Romannok igot gvgottmang cdc lugcncdc lugcnamdcm gvrvgsula nappa: nappa:pc ka:rvgsuma:sisscm mcpaknamdc, odokkc bvk agomcm birudi:pc lunamdcm lurasuma:sisscm.

¹⁷ Cdvlo cdcmpila bulu lckopc so:pc gvkumsutoji, ngo cmpcsin du:tedttomang, cmpige:la longkondo ngok kcba:bangkodo dunga:to odokkc tani:dcm boma:dopc lulvgto.

¹⁸ Cdvlo lugcncdc dagrobka:ji, bulu ngok mcngkamdcmpc cdcmpc aima:nc ajcngko jc:toma:n;

¹⁹ cmpige:la bulukkc luka:mvnsunamdok atvko dunggai bvkkokki buluk avkvdv:dokkc ipa:dak-ipa:mang cmnamdok agomko odokkc Jisu cmnam akolokkcm, sc:kobv sikangaji, cmpige:la sc:kom Poulbv turkangku cmna ludagji.

²⁰ Mc:mur mc:yarla kapc sc tawunam agomscm kinpcikc cmna, ngo tawuto Jerusalempc gvlv:dagji odokkc olo kcbang ba:dopc buluk agomdok lcga:pc.

²¹ Cmpige:la cdvlo Poulbv kumna lula lc:teika cmna kumtoji migomlok migomdok mc:ponamdcmpc ngo bvm Kaesaria:pc mclvgpc cmna ycnggabdopc lulvgto.”

²² Odokkc Aggrippa:bv Pestu:mc luto, “Ngo tani:dcm avyc tadsupc cmna mc:dung.” “Yamporom,” odokkc bv luto, “no bvm tadlang.”

²³ Cdcmpila longkondo Agrippa:bv odokkc Bernikbv kvnggv:pc gcru:bomba: suge:la gvdo odokkc bulu bottcnc tani:ycm lcngkansula okum ara:do:pc mimagmonckvdv:dokki gva:to odokkc amin gvnc nogordok tani:kvdv:dokki. Odokkc Pestu:bv lulvgnamkokki Poulmc langa:to.

²⁴ Odokkc Pestu:bv luto, “Migom Agrippa:bv odokkc ngoluk lcdulo sc:kobulu du:ji, no ka:toka sc tani:scm sck agomcm Jiwu appv:dc ngokkolo lugcngcm lutagji, Jerusalemolo:lang sido anyipakso, bv lckoda turra du:pcnammang.

²⁵ Cmpige:la ngo bvm ka:to jc sipcnam oko agerkosin germang; odokkc bv avdc migomlok kumna:sola lunamc, ngo bvm mclvgpc cmna mc:to.

²⁶ Cmpige:la ngokkc bvm cdcmar cmnam do:jvgko bvm jvgpc cmnamko kamang. Cdcmpila ngo bvm nok kcra:so:pc gva:botak, odokkc, anguru:pc nok kcra:so:pc Migom Aggrippa, jc, ngolu bvm kangc kangkursula, ngokkc o:kaiko adpcnammc lenycpc.

²⁷ Kapila:nc cdc ngokkcpc igot kama:ncmpc idag, makana:lok tumnam tani:akoncm, bvk birudi:pc jc:nam ajc:dcm lcngkan ma:mvlo.”