AGER KVDVNG 23 - ANU LUGOD N. T. (BSI)

¹ Odokkc Poulbv, kcba:dcm ka:mi:miri:la kangge:la, luto, “Bvrrang kvdvnga, ngo Ru:ncpvnckc kangkolo appvng mc:namsagnamcm kinna silolo:pc dung.”

² Odokkc bvk kcra:do dagnckvdv:dcm kumko okumlok bottarya:pc ager gernc Ononio cmnamdc bvk nappa:dok dcmdopc lulvgto.

³ Odo Poulbv bvm luto, “Ru:ncpvncbv nom dcmycpc, c:i kampopc yonnam bare:ya! No lujvglurodok lukampc ngom kcbang ba:pc cmna teddu:nci, odokkc ckvdaggom lujvg lurodok lukamdok angupc no ngom dcmdopc lulvgdangnci?”

⁴ Cdc kcra:do sc:kobulu dagla dungaji luto, “No Ru:ncpvnckc kumnam ager gernc bottarya:ncdcm lupa:ma:namcm ludonci?”

⁵ Odokkc Poulbv luto, “Bvrrangkvdvnga bv:jc kumnam ager gernclok bottarya:ncdc, cmna kinma:nci; kapila:nc cdcm adtak, ‘no nok tani:kvdv:dok migom donc tani:ycm aima:pc luyoka.’ ”

⁶ Cmpige:la Poulbv cdvlo kintoji jc akedc Saddusiai odokkc akedc Parisiyc, bv kcra:do jc:sangkang, “Bvrrang kvdvnga, ngo Parisi:ko, Parisi:lok awoko; sinckvdv:dokkc turkunammc dung cmnamdcm lukamdcmpc tadla ngom kcbangcm ba:dung.”

⁷ Odokkc bv cdcm cdvlo lutoji, Parisi:kvdv:doklang Saddusi kvdv:dok ara:lo luker luyermvnsunamko lenkang; odokkc kcba:dc anyikopc angukang.

⁸ Kapila:nc Saddusi kvdv:dc luto jc sige:la turkunammc kamang, taycng among lutad lunc manggom, yallomanggom; cmpige:la Parisi:kvdv:dcm cdc appv:dcm arro cmna mc:dag.

⁹ Odo bottaru:nc jcngka:mvnsunamko lenkang; odokkc Parisikvdv:dok ainc agom adgabnc kcra:dokkc darobkang odokkc luka:mvnsuto, “Ngolu sc tani:scm oko imurcmsin idopc pa:tomang. Cmpige:la yalokonc cdcmanggom taycng among lutad lunckonc bvm agom lutonci kapcjila?”

¹⁰ Odokkc cdc luka:mvnsunamdc kvnggv:pc bottcnammc, kcba:ba:nc dc, Poulmc bulu tu:nyi tuwumkopc ipakpckc cmna pcsokang, mimagmo nckvdv:dcm gvila bvm sotcr sotcr sogabdopc bulukkolokkcm lulvgto odokkc bvm mimagmonckvdv:dok okumdo:pc langa:to.

¹¹ Longkondok yumcdo Ru:tumbv bvk kcra:do dagkang odokkc luto, “Asinang Pvtatoka, kapila:nc Jerusalemdo kapc no ngom lukansubitonc, cdcmv:pc no Ro:mdo:sin lukanbipa:yc.”

Poulkc Turnamdok Birudi:pc Ru:sunam

¹² Longcnammc, Jiwukvdv:dc kcvgpc inamko ru:suto odokkc bulu Poulmc mokema:sisscm doma:ycsin tv:ma:ycsin cmna pesunamko pelvgsuto.

¹³ Cdc pesunamdcm pedodcm yi:pi:ko dungai sc:kobulu cdc kcvgpc ru:sula mokepc cmna ikaji.

¹⁴ Odokkc bulu kumnam ager gerncdok bottarya:ncdo:pc odokkc abv:nc kvdv:do:pc gvkang, odokkc luto, “Ngolu avyc kvnggv:pc av avyc pesunamkokki ycnggabsuto Poulmc mokema:sisscm oko donamcmsin doge:mang cmna.

¹⁵ Nolu cdcmpidag, do:ying kvnam kcba:dokki lckopc, kcba:ba:ncdcm su:pak bvm la:yi:dopc lutadko jvgtok, nolu bvk agomdcm lujvgdcm nolu aiya:pc ba:pc lupcmna madagagom. Odokkc bv kcra:so:pc pvnga:ma:dapc ngolu bvm mokepc cmna mosv:sudung.”

¹⁶ Cdcmpidodcm Poulkc bvrmclok awodc lc:sula tola du:namdcm tadbegto; cdcmpila bv gvla mimagmonckvdv:dok dungkodo gva:to odokkc Poulmc luto.

¹⁷ Odokkc Poulbv lvngko mimag monclok gvgurnclok akoncm gogto odokkc luto, “Sc ya:me:ko:scm kcba:ba:ncdo:pc gva:bokang odokkc; kapila:nc bvm bv o:kai lubipcnamko dung.”

¹⁸ Cdcmpila bvm bv gvbokang odokkc kcba:ba:ncdo:pc gva:bokang odokkc luto, “Makana:lo tumna lc:nam Poulbv ngom gogto odokkc sc ya:me ko:scm nokkoso:pc gva:bodopc lulvgto.”

¹⁹ Kcba:ba:ncdc bvm alagdok pigabto, odokkc gvyodla gvboge:la atckpc tawuto, “Okkon no cdc ngom lubipcnamdc?”

²⁰ Odokkc bv luto, “Jiwukvdv:dc yampo Poulmc la:yi:dopc koyc cmna ru:sula tolvgmvnsutag, bulu bvk agomcm asudowko kcra:ya:pc tawula tadlenpc cmna idagagom.

²¹ Cmpige:la buluk agomdcm tadyok; kapila:nc buluk milbong tani:yc yi:pi:ko bojcyangkopc bvm tola dung, bulu av avkvdv:dc pesula bvm mokema:sisscm doma:tv:ma:yc cmna; odokkc bulu su:pak mosv:sula dung, nokkolok pesunamdcm tadpc cmna.”

²² Cdcmpila kcba: ba:ncdc cdc ya:me:ko:dcm mclvgtoku, “Scm ngom lubika cmna sc:komsin lubiyoka cmna lurvdge:la.”

Poulmc Pelik Amo:ru:tum Kolo:pc Mclvgnam

²³ Odokkc bv mimagmonc kvdv:do lvngkolok gvgurnc anyikoncm goga:to odokkc luto, “Yumc ayir awumdo nolu mosv:sulangka lvngko anyikopc mimag monncm gure:lo sa:nc nv:pi:ko tani:ycm odokkc lvngko anyikopc gvdv:bomnc tani:ycm Kaesaria:pc pv:dopc.

²⁴ Odokkc Poulmc gvnancko bilangka, odokkc Pelik amo:r:tum kolo:pc bvm aiyo:pc gvbodopc.”

²⁵ Odokkc bv do:jvgko scmpc atto:

²⁶ “Klaudiu Lisiangkc Airu:pc bottcnc amo:ru:tum Pelikkolo:pc, nom kumtadsudung.

²⁷ Cdc tani:dcm Jiwukvdv:dc ycnggabtungai, odokkc bulu mokepc cmna idungaboi, cdvlo bulukkodo:pc mimag monckvdv:dokki gvto odokkc bvm mopvtto, bv Roman amo:lok tani:yc cmna kinge:la.

²⁸ Odokkc bvm nvnggcmna lunam agomdcm kinpc cmna mc:la, ngo bvm buluk kcba:do:pc gva:boto.

²⁹ Ngo kinto jc bvm buluk lujvg lurodok lcgangc lugc:to, cmpige:la sipcnammc manggom makana:lo tumpcnam oko lcgangcsin lujcmla lutomang.

³⁰ Odokkc cdcm cdvlo ngom lulen luwa:la lubitoji odo cdc tani:dok birudi:pc ru:suko idungai, ngo bvm lomdanna nolukkolo:pc mclvgto, bvm lujcmna lunamkvdv:dcmsin noluk kcra:lo okodcm bvk birudi:pc lupcnammcji ludopc.”

³¹ Cdcmpila mimag monc kvdv:dc buluk luyirkamdcmpc, Poulmc gvbokang odokkc yumcdo Antipatrido:pc gvboto.

³² Odokkc odok longkondo bulu mimagmonc kvdv:dok dungkodo:pc gvlattoku, bvk lcdulo gure:lo sa:nc tani:kvdv:dcm gvdopc mclvgge:la.

³³ Cdcmpila cdvlo bulu Kaesaria:pc gvtoji odokkc amo:ru:tumdo:pc cdc do:jvgdcm bito, bulu Poulmc bvk kcra:do:sin lcngkanto.

³⁴ Do:jvgdcm poge:la, bv oko mo:tak dokkcji cmna tawuto. Cdvlo bv kintojc bv Kilikia:dokkc bv luto,

³⁵ “Ngo nok agomcm tadyc cdvlo nom lugcnam kvdv:dc lenycji.” Odokkc bv bvm Herodkc kcbang bangkodo ka:sv:la du:dopc lulvgto.