AGER KVDVNG 2 - ANU LUGOD N. T. (BSI)

Angunnc Yalodok Gvinam

¹ Yi:ngko longcdok inam dopundojardc cdvlo pvngangka:nc, bulu appv:dc du:tcng akkongkolo lckko:pc dungai.

² Odokkc vgcmpc taycng tokkc kvnggv:pc bottcpc yunc csarcmpc ngomna gomugko dc:yi:do, odokkc cdc buluk dungko okumdo ngombungkang.

³ Odokkc odo bulum vmmcmpc ayokvdv:dc lcngkansuto, dorbu:la odokkc buluk appv:dok ako akolok tayc:lo dcnggabamkang.

⁴ Odo bulu appvdc Angunnc Yalodc bingkang odokkc angu angu agomcm lurobbomkang, Yalodc bulum lunamdcmpci.

⁵ Cdcmpinamc odo Jerusalemdo Jiwuyc, odokkc Ru:ncpvncmc aipc mc:nc tani:yc do:mvr kcvgso du:nc appvng opvnlokkc dungai.

⁶ Odokkc odo bc:namdokki kcrcng tani:kvdv:dc lckko:pc gvkumsukang, odokkc bulu mcngkin-mc:para:tomang, kapila:nc bulu appv:dc buluk av avkc agomcm lusudopc tatto.

⁷ Odokkc bulum mc:la mcngapla:ma:pc odokkc mcngkesula du:la:yam, scmpc luto, “Sc agom lunc kvdvng appv:sc Galilolokkc ma:lang?

⁸ Cmpige:la cdc kapc ngolu tadbegdu:n, ngolu appvngc av avkc du:tc:lok agomcm?

⁹ Partiankvdv:dokkc, Media:dokkc, Ilamitedokkc, Mesopotamiangdo du:nc-dagnckvdv:dc Judia odokkc Kappadokia, Pontus dokkc Asia,

¹⁰ Prigia odokkc Pampilia, Igipt odokkc Libiadok mo:takkolok Sirenedokkc, odokkc Ro:mdok kanggongkapc gvnnckkc, Jiwu kvdvngclang avkc dormo mcpaknc,

¹¹ Kretan kvdv:dc odokkc Arabi kvdv:dcm, ngolu bulum noluk avkc agomlok ludopc tadbegdung Ru:ncpvnckc bottcru:nc ager gernamcm.”

¹² Odokkc appv:dc tadngagamsukang odokkc mcngkinmc:parangtomang, akoncm akonc, “Cdcmpc lunamdc okko cmdang?” Cmna lukangam mvnsula.

¹³ Cmpige:la “Bulu vrnc apongcm tvngvrsungapto,” cmna luyo-luka:la luto.

Pitorkc Lulenluwang Lubinam

¹⁴ Cmpige:la Pitorbv, vyingkolang akodokki dagbosuge:la, bvk agomcm bottapc lusuto odokkc bulum lukanbito, “Judia:sok tani:kvdvnga odokkc Jerusalemdok du:nc-dagnc appvnga, scm nolu appvngc kintoka, odokkc ngok agom kvdv:scm yerungcm toka:la tattoka.

¹⁵ Kapila:nc sc tani:kvdv:sc, noluk mc:namdcmpc torvgsumang, su:pak longgc ayir awumongko idunggong;

¹⁶ cmpige:la sc lungor lunc Joelbv okkom lutoji cdcmvn:

¹⁷ ‘Odokkc gvngab longcdo cdcmpc iyc Ru:ncpvncbv luto, jc Ngok Yallom ngo tani: opvn appv:lo to:rumlvgyc, odokkc noluk awokvdv:dc odokkc noluk omckvdv:dc lungor agomcm lugo:yc, odokkc noluk ya:me ko:kvdv:dc kangorcm ka:yc.

¹⁸ C:, odokkc ngok ager gerya:nc milbong tani:kvdv:dc odokkc ager gerya:nc nc:ng tani:kvdv:dc odo longckvdv:dok ara:do Ngok Yallom ngo pvrumyc; odokkc bulu lungorcm luyc.

¹⁹ Odokkc ngo tayc:to kangaksunam ka:namcm lcngkanyc odokkc kcvgso mo:pvso kanggodcm, i:ycm, odokkc vmmcm, odokkc yv:paknc mukkangcm;

²⁰ do:nyitc kcmopakyc odokkc po:lotc i:pc, Ru:nckc longcdc pvngangma:dapc, cdc bottcru:nc odokkc ka:begpcnam longcdc.

²¹ Odokkc odo cdcmpc iycnc jc sc:kobvi Ru:tumkc amincm gogycnc mopvtyc.’

²² “Israelsok tani:kvdvnga, sc agom kvdv:scm tadtoka: Najaretdok Jisubv, Ru:ncpvnckokki nolukkolo du:jonsumoto bottcru:nc ager germola odokkc mcngapla:ma:nam agercmlang odokkc kanggod kvdv:dokki okodcm noluk ara:lo Ru:ncpvncbv Bvkkokki gertoji, nolusin avyc kindagnc cdc Jisudcm.

²³ Ncrkvgpc tarung ru:namdcmpc topaklvgto odokkc Ru:ncpvnckc kinpo:namdcmpc, nolu Kuruslo pvtjonto odokkc lujvgluro kinma:nc tani:kvdv:dok alakki moketo.

²⁴ Ckvdaggom Ru:ncpvnbv Bvm turmotoku, sinamlok kinamcm moturtoku, kapila:nc cdc Bvkkcpc odokki yc:tumnamna:mang.

²⁵ Kapila:nc Dawidbv Bvk agomcm lutag, ‘Ngo lo:dvscm Ru:tummc ngok kcra:pc ka:begto, kapila:nc ngo cngunma:ycpc cmna Bv ngok lagbvk alagpc dung;

²⁶ cdcmpila ngok asinc mc:pola dungai, odokkc ngok aiyyo mc:poto; cdcmsinyamsin ngok adinc mc:tinsula du:yc dagyc.

²⁷ Kapila:nc no ngok yallom uiamo:bo topakledma:yc, cdcmanggom nok Angunnc Akodcm aima:pc ager gernamkvdv:dcm ka:begmoteika.

²⁸ No ngom turnamsok lambckvdv:dcm kinmoto; nok du:tcngkokki ngom no mc:pomolang.’

²⁹ “Bvrrang kvdvnga nolum abukvdv:lok abu Dawidkc agomcm mc:tindanna lubila:dung jc bv sikang odokkc agolo lc:to, odokkc silolo:pc bvk agodc ngoluk ara:lo dung.

³⁰ Cdcmpidag lungorla luncpc itu:la:yam, odokkc Bvm Ru:ncpvncbv pesunamko pebito cmna kinna:yam jc Bvk opvnko Bvk migom dungkodo lc:yc cmna,

³¹ Bv kangorko ka:no:to odokkc Kristokc sikolokkc turkunamdcm luto, jc Bvm Uiamo:bo tolvgtomang, cdcmanggom Bvk adinc aima:pc ager gernamc ka:tomang.

³² Cdc Jisumc Ru:ncpvncbv turmotoku, odokkc odokkcpc ngolu appvngc lukan lubinc.

³³ Cdcmpila Ru:ncpvnckc lagbvg alakdo:pc la:sa:langkula:yam, odokkc Abudokkcm Angunnc Yalodok pesubinamdcm pa:la:yam, Bv scm to:lvgtag okodcm nolu ka:begdu:nc odokkc tadbegdu:nc.

³⁴ Kapila:nc Dawidbv taycng amo:pc dc:sa:tokumang; cmpige:la bv avdc luto, Ru:tumdc ngok Ru:tummc luto, Tedtok ngok lagbvgpc.

³⁵ Ngo nok mirukvdv:dcm nok alckvdv:dok lcga:pc kungke:pc ima:sisscm.

³⁶ “Israelkc ope: appv:dcm aroru:pc kinmotoka jc Runcpvncbv Bvm Ru:tumpclang Kristopc imoto, cdc Jisumc sc:kom nolu kuruslo pvtketoji.”

³⁷ Cdcmpinamc bulu cdcm tadge:la buluk asinkvdv:dcm nvgjonamto, odokkc Pitormclang agom tadla gvmvnnc akekvdv:dcm luto, “Bvrokvdvnga, ngolu kapc iycn?”

³⁸ Odo Pitorbv bulum luto, “Asinc mc:dvrra mc:latsutokuka, odokkc noluk appvngc Jisu Kristokc aminno baptismongcm la:tok noluk pa:pkvdv:dcm mc:yinsunam lcgangc; odokkc nolu Angunnc Yalodok amandcm pa:yc.

³⁹ Kapila:nc pesula lunamdc nolukkcpc odokkc noluk ommang kvdv:do:pc odokkc mo:tc:pc du:nc kvdv:do:pc, Ru:tumdc ngoluk Ru:ncpvncbv Bvkkolo:pc gogangkunam appv:dcm.”

⁴⁰ Odokkc bv agom bojcrungkoda lula lukanbito odokkc angu agomkokkisin luyirra bulum luto, scmpc lula, “Nolu av avyc sc yadkuknc opvnsokkcm mopvtsutoka.”

⁴¹ Cdcmpila cdc sc:kobulu bvk agom kvdv:dcm torvgsutoji baptismongcm langapto, odokkc odo baptismongcm bisetla bulu lv:ying awum kvramko yallo idagai.

⁴² Odokkc bulu avkvdv:dc mclvgla ager germonam tani:kvdv:dok luyirnamlo:lang lckopc dungkolo, pitangcm penpansula dokolo odokkc kumkolo dunggabla du:mvnto.

Mc:jvgnc kvdv:dok Turnam

⁴³ Odokkc appvng yalokvdv:dc pcsso angkang; odokkc bojcrungko kangaksunam agercmlang kanggodcm mclvgla ager germonam kvdv:dokki gerto.

⁴⁴ Odokkc mc:jvgnc kvdv:dc lckopc dungai odokkc appvng attarcm lcko-lakkopc lcngkumsuto;

⁴⁵ odokkc bulu arckan attar kvdv:dcmlang attarkvdv:dcm kopagamto odokkc cdcmbulum bulu appv:dcm orpanamsuto, buluk sc:ko sc:kobulu manamdcmpci.

⁴⁶ Odokkc longgcm longgcm, kumko okumdo lckopc gvkumsunamcm odokkc buluk okumkvdv:do pitangcm penpansula bulu mc:po:pc odokkc asin akko:pc mc:la apincm dobosuto,

⁴⁷ Ru:nc pvncmc aipai lula odokkc appv:tani:lok aipc mcngkosula. Odokkc Ru:tumbv bulum longgcm longgcm sc:kobulum moturtoji: mca:lvgsetbomto.