AGER KVDVNG 15 - ANU LUGOD N. T. (BSI)

Jerusalemdo Kcbangc

¹ Cmpige:la Judia:dokkc tani:ckkc gvla bvrokvdv:dcm luyirra dungai, “Mose:kc itcnggvtc:dcmpc nolu gatpukma:mvru:lo nolum moturma:yc,”

² odokkc Poulbv:lang Barnaba:bv adji:okosin luka:mvnsutomang, Poulbv:lang Barnaba:bv odokkc angu akke Jerusalempc gvdopc lulvgto mclvgla ager germonam kvdv:do:pc odokkc abv:nc kvdv:do:pc cdc tawunam agomdok lcga:pc.

³ Cdcmpila, mondoli:dc bulum buluk lambcdo mclvgnammc, bulu Poenisiangdoklang Samaria:dok gvpatla gvto, Angu tani:kvdv:dcmsin asin mc:latsulangkula gvangkunamdok agomcm lubi lubila, odokkc bulu bvrrangkvdv:dcm kvnggv:pc mc:pom bito.

⁴ Cdvlo bulu Jerusalempc gvpv:toji, bulum mondoli:dc odokkc odok abv:nc ager germonam kvdv:dc airu:dag cmna torvgsuto, odokkc bulu Ru:ncpvnckc inam appv:dcm lugo:bito.

⁵ Cmpige:la Parisi:kvdv:dok lckopc gvnc mc:jvgla gvmvnnckc dagrobkang odokkc luto, “Bulum gatpukpcnamc, odokkc bulum Mose:kc lujvglurodcm tadtvla du:dopc lupcnammc.”

⁶ Mclvgla ager germonam kvdv:dc:lang abv:nckvdv:dc lckopc gvkumsukang cdc agomdcm ru:sukapc.

⁷ Odokkc odo bojcrungko luka:mvnsula dungge:la, Pitorbv darobkang odokkc bulum luto, “Bvrrang kvdvnga, nolu kindag jc leke-to:dcmbong Ru:ncpvncbv noluk ara:lokkcm la:to, jc ngok nappangkokki Angunc tani: opvnkvdv:dc tadponc lutaddok agomdcm tadpcnammc odokkc mcjvgpcnamc.

⁸ Odokkc Ru:ncpvncbv sc:ko asincm kindagji bulum lukancm lubito, ngolum bikamarcmpc Angunnc Yalodcm bulum bige:la;

⁹ Odokkc Bv bulukkoloklang ngolukkolok oko angucmsin du:motomang, cmpige:la buluk asinkvdv:dcm mc:jvgkokki mopu:to.

¹⁰ Su:pak cmpila kapila nolu Ru:ncpvncmc ankang kangkvla agom tadjvgla gvmvnnckvdv:dok lv:po:do jungoli:ko tulvgkvge:la okodcm ngoluk jo:la:toma:ji?

¹¹ Ckvdaggom ngolu mc:jvgdo:jc ngolum Ru:tum Jisukc ayangkokki moturyc bulum moturarkamcmpc.”

¹² Odokkc kcba:dok appv:dc aso:pc dungapto; odokkc bulu Barnaba:mclang Poulkc lunamdcm tatto bulu angu tani:kvdv:dok dungkolo oko kanggodcmnang kangaksunamcm lcngkanto cmna lubila:yam.

¹³ Buluk lungapdodcm, Jakobbv lubito, “Bvrokvdvnga, ngom tadtok,

¹⁴ Simionbv lukanbito kapc Ru:ncpvncbv Bvm kinma:nckvdv:dcm gvla ka:toji, bulum Bvk amin lcgangc la:lenpc.

¹⁵ Odokkc lungor lunckvdv:dok sc agomkvdv:sokki tolvgsula, cdcm kapc adla lc:tagji,

¹⁶ ‘Sok lcdupc ngo gvlatycku, odokkc ngo Dawidkc dungkodcm motenycku, Okodc openka:ji; Ngo odok open-orenncdcm motenycku, odokkc ngo cdcm mosv:ycku,

¹⁷ odomvlo ake tani:kvdv:dc ru:tummc maycpc, odokkc Ru:ncmc kinma:nc tani:appv:dc sc:kobulu ngok aminno minycji,

¹⁸ Ru:tumbv ludag, sc:kobv sc attarkvdv:scm lekelokkcbong kinabmotoji.’

¹⁹ “Cdcmpidag ngok mcnggodc jc ngolum angu tani: opvn kvdv:dcm mc:dvrmopc lagimang sc:kobulu Ru:ncpvnckolo:pc gvlatdungkuji.

²⁰ Ckvdaggom bulukkolo:pc adpcnammc murti:ycm kumlusula kumnamcm mcpakdopc odokkc nc:ngcm aima:pc mc:boka:bo kolokkc odokkc okodc okkom yumkela dodagji odokbulukkc.

²¹ Kapila:nc lekekc opvnkvdv:dokkcbong Mose:kcdc appvng nogor nogorlo dungai sc:kobulu bvm luyir lukaji, kapila:nc cdcm ager germa:pc yodla du:do longc appv:do kumko okumkvdv:do podungai.”

Angutani: Mc:jvgnckvdv:dopc Do:jvg Jvgnam

²² Odo cdc mc:jvgla ager gernckvdv:dokkcpc aidopc ka:to odokkc cdc abv:nc kvdv:dokkcpc, mondoli:appv:dokki, buluk ara:dokkcm tani:ycm balenna la:pc odokkc bulum Antiokpc mclvgpc Poulkclang Barnaba:kc lcdulo. Bulu Juda:mc Barsabang cmnamdcm mclvgto, odokkc Sila:mc, bvrokvdv:dok gvgcboncko,

²³ kcvgkc do:jvgdcm bitc:lvgla: “Bvrokvdv:do:pc, mclvgla ager germonc kvdv:do:pc odokkc abv:nc kvdv:do:pc, Antiokdok, Siriadok odokkc Kilikiadok ope:kvdv:do:pc gvangkunc Angunc tani:kvdv:dok aipc lupangc.

²⁴ Nolum agomkokki ngolukkosok tani:ckkcnc mc:dvrmcso:moto cmna ngolu tadla:yam, noluk asinkvdv:dcm mc:sat-sula:ma:la, ngolu bulum oko luyircmsin lukailvgmanggom,

²⁵ cdc ngolukkcpc aidopc ka:to, asin atcrongkopc inamdc, tanickkc balendopc odokkc bulum ngolukkolo:pc mclvgdopc ngoluk aipc mc:nam Barnaba:mclang Poulmc,

²⁶ Ru:tum Jisu Kristokc lcgangc sc:ko tani:kvdv:dc buluk turnamcm sipcturpc cmna itoji.

²⁷ Cdcmpila ngolu Juda:mclang Sila:mc mclvgtung, sc:kobulu avkvdv:dc nolum cdc agomv:dcm nappangkokki lubiycpc.

²⁸ Kapila:nc Angunnc Yalodokkcpc odokkc ngolukkcpc noluk tayc:lo scmbulumyam oko bottaya:nc jo:namcsin jonggcmlvgla:ma:dopc:

²⁹ jc nolu okodcm murti:lo palvgtagji odokkc gertoka odokkc i:lokkc odokkc okodcm lv:polok yumna yumkedagji odokkc amikc nc:ngcm la:binamlokkc. Nolu avyc odokbulukkc odokkcm gc:rsula du:la:mvlo, nolu aincm iyc. Cdcbong.”

³⁰ Cdcmpila cdvlo bulum mclvgtokuji bulu Antiokpc gvkang; odokkc mondoli: tani:kvdv:dcm lckopc gvkumsumoge:la, bulu do:jvgdcm tamge:to.

³¹ Odokkc cdvlo cdcm bulu potoji bulu luyirra adnamdo airu:pc mc:pokang.

³² Odokkc Juda:lang Sila:bv, sc:kobulu av:kvdv:dci lungor lunna:nc, bvrokvdv:dcm bojcrungko agomki luyircm luto odokkc bulum kvnggv:moto.

³³ Odokkc bulu asudko du:namc, bulum bvrokvdv:dokki mcnganpc mclvgtoku sc:kobulu bulum mclvgtungaji.

³⁴ Cmpige:la cdc Sila:kcpc ollung du:namdc aiya:ncmpc idagai.

³⁵ Ckvdaggom Poulbv:lang Barnaba:bv Antiokdo du:pakto, Ru:tumkc agomcm luyirra lubila odokkc ake bojcru:lo:sin, lutadgo:bila.

Poulbv:lang Barnaba:bv Angunam

³⁶ Odokkc longc lo:pi:longoko lcdulo Poulbv Barnaba:mc luto, “Kajc, ngolu gvlatlangkula bvrokvdv:dcm gvla kangkakui nogor nogor appv:do okolo ngolu Ru:tumkc agomcm lutadgongkaji, odokkc bulu kapc idu:ji ka:lai.”

³⁷ Odokkc Barnaba:bv buluk lcdulo Jo:nmc sc:kom Mark cmna:sin gogdoji gvbolvngkang.

³⁸ Cmpige:la Poulbv mc:to buluk lcdulo gvboma:namdc aiya:yc sc:kobv Pampilia:dokkc gvngula du:pakka:ji, odokkc buluk lcdulo agerlo:pc gvmangaji.

³⁹ Odokkc kvnggv:pc luka:mvnsunam lenkang, cdcmpinamc bulu akonc akondcm mcpansuto; Barnaba:bv Markmc bvk lcdulo gvboto odokkc Sipru:pc ko:la gvkang,

⁴⁰ cmpige:la Poulbv Sila:mc bala la:to odokkc Ru:tumkc ayangki bvrokvdv:dc mclvgla:yam gvpansukang.

⁴¹ Odokkc bv Siria:pclang Kilikia:dok gvko:la mondoli:kvdv:dcm kvnggv:mobomna gvkang.