AGER KVDVNG 12 - ANU LUGOD N. T. (BSI)

Ipusire: Ibartvnam

¹ Odo ayirdo mondoli:dok akkem Herod migombv kvnggv:pc mopumore:to.

² Bv Jakobmc madsvgki moketo Jo:nkc bvrodcm;

³ odokkc Jiwukvdv:dcm bv mc:lvgsumoto cmna cdvlo ka:toji, bv Pitormcsin ycnggappc cmna gvbarkang. Cdc komirang ilvgma:nam pitang modo ayirdo.

⁴ Odokkc cdvlo bvm bv ycnggabtoji, bvm bv makana:lo tumto, odokkc bvm adji:nc sipai kcrcng appi:kopc kanggabla du:moto, gvbadla gvnamdok dopun dojar dodo lcdudo tani:kvdv:do:pc la:lenkupc cmna.

⁵ Cdcmpila Pitormc makana:lo tumna lc:tungai; cmpige:la kvnggv:pc airu:pc bvk lcgangc Ru:ncpvnckolo kumna mondoli:yc dunggai.

Pitormc Makana:lokkc Mclennvgkunam

⁶ Herodbv bvm la:lenpc cmna ido yummardo, Pitorbv mimag monc anyikolok pongkoglo yubla dungai, ikoli:kokki ycnggabla lc:la, odokkc darra ka:bomsunnc makana:dcm yabgodok kekondo ka:bomna dungai;

⁷ odokkc ka:tok, Ru:tumkc taycng among lutad lunckonc lcngkansuto odokkc makana:dok adji:nc dungko soyarkolo; odokkc bv Pitormc kcra:dok pikvto odokkc bvm urrobto, scmpc lula, “Lomdanna darobtok.” Odokkc bvk alagdokkc ikoli: rvbv:dc kcdledkang.

⁸ Odokkc taycng among lutad luncdc bvm luto, “Avyc attardcm gcsv:sutok odokkc nok lcyugkvdv:dcm gctok.” Odo bv cdcmpc ito. Odokkc bvm bv luto, “Nok ugondcm aiyo:pc molvgsutok odokkc ngok lcdu lcdulo gvmvntok.”

⁹ Odokkc bv gvlenmvnna bvk lcdu lcdulo gvmvnkang; bv taycng among lutad luncdc okkom idu:ji cdc arro cmna kinmangai, cmpige:la bv kangorko ka:begdung cmna mc:to.

¹⁰ Bulu cdvlo du:pongarncdcmna odok lcdukc darra dagbonc mimagmoncdcm gvbattoji, bulu yogvr yabgodo:pc gvpv:to nogorpc gvlennancdcm, cdc bulukkcpc av avyc moge:subikang, odokkc bulu gvlenna gvla nogordok ali: lambckolok gvtvla gvto; odokkc vgcmpc cdc taycng among lutad luncdc bvm mcpakto.

¹¹ Odokkc Pitorbv av avdc gvsutoku odokkc luto, “Su:pak ngo kindagru:bong jc Bvk taycng among lutad luncdc ngom Herodkc alaglokkcm odokkc Jiwutani:appv:dok mcngkvnamdokkcm mopvtto.”

¹² Cdvlo bv cdcmpc mcngkinsutokuji, bv Meri:kc okumpc gvto, Jo:nkc ancdo:pc sc:k amin akondcm Mark cmtungaji, okolo bojcrungc lckopc gvkumsula kumna dungaji.

¹³ Odokkc cdvlo bv lambc gvlennanc yabgodok piku:toji, Roda cmnam ager gerya:nc ko:ncngkonc gogtadsukapc gvlento.

¹⁴ Pitorkc gomugdcm tadkinge:la, bvk mc:pokokki bv yabgodcm moge:tomang cmpige:la dugangkangku odokkc Pitorbv yabgolc dagla dung cmna lubito.

¹⁵ Bulu bvm luto, “No simaddung.” Cmpige:la bv mcmang ke:ke:pc luto cdc bvyvng cmna. Bulu luto, “Cdc bvk taycng among yalodc!”

¹⁶ Cmpige:la Pitorbv piku:tvla du:to; odokkc cdvlo bulu moge:toji, bulu bvm ka:begto odokkc mc:lamcngabla:tomang.

¹⁷ Cmpige:la bulum aso:pc du:dopc bvk alagdokki bv lcngkange:la, kapc bvm Ru:tumbv makana:dokkcm la:lentokuji lulenlua:la lubito. Odokkc bv luto, “Scm Jakobmclang bvrokvdv:dcm lubilangka,” odokkc bv gvpakla angu mo:takkolo:pc gvkang.

¹⁸ Odokkc cdvlo longcka:ji, mimag monckvdv:dc Pitorbv kapc ika:ji cdcm lula cmmum urratpc itomang.

¹⁹ Odokkc cdvlo Herodbv bvm matoji bvm mabegtomang, bv darra ka:bomsunckvdv:dcm tadkangamna kangapto odokkc bulum mokedopc lulvgko luto. Odokkc bv Judiadokkc Kaesarpc gvto, odokkc odo du:to.

Herodkc Sinam

²⁰ Cdcmpidodcm Herodbv Ti:rclang Sidondok tani:kvdv:dcm aglvngkangai; odokkc bulu bvkkolo:pc lckko:pc gva:to, odokkc Blastu:mc lulvgla, migomdok bottarya:nc ager gergurnc, mcnganko mato, kapila:nc buluk amo:dc migomdok amo:do dogang lcgangc gvtinsudagai.

²¹ Tola lc:nam longckoncm Herodbv bvk migom gcnam attardcm gcge:la, bvk migom dungkodo tedto, odokkc bulum tadponc agomko lubinamko luto.

²² Odokkc tani:kvdv:dc jcngkang, “Uilok gomugkokcv tani:lokkcmang!”

²³ Vgcmpc Ru:tumkc taycng lutad lunckonc bvm dcmto, kapila:nc bv Ru:ncpvncmc amindcm gvmomangai; odokkc bvm tapumc pc:to odokkc sikang.

²⁴ Cmpige:la Ru:ncpvnckc agomdc gvbarbomkang odokkc bojc bojcpc gvbarbomkang.

²⁵ Odokkc Barnababv:la Soulbv Jerusalemdokkc gvlattoku buluk gvla gerpcnam agerdcm gerabge:la, buluk lcdulo Jo:nmc gvbolangkula sck amincm Mark cmtagaji.