2 TISSALONIANG 3 - ANU LUGOD N. T. (BSI)

Ngoluk Lcgangc Kumnangka

¹ Adamso, bvrokvdvnga, ngoluk lcgangc kumnangka, jc Ru:tumkc agomdc lomna aropc iycpc odokkc mopvtsuycpc, kapc cdc noluk ara:do ika:ji,

² odokkc jc ngolum aima:nclag imur ager gernc tani:kvdv:dokkc moturycpc; kapcnc appvngkc mc:jvgc kamang.

³ Cmpige:la Rutumbv mc:jvg-jvrvygncko; Bv nolum tormoycpc odokkc aima:n agerlokkcm moriycpc.

⁴ Odokkc ngolu Ru:tumkolo mc:tin-tirinna noluk agomcm dung, jc nolu itvla dung odokkc du:yc cdc agomkvdv:dcm okodcm ngolu lulvgkaji:

⁵ Ru:tumbv noluk asinkvdv:dcm Ru:cpvnckc aipc mc:namdo:pc lukanlvglangka odokkc Kristokc du:tvdagtvnamdo:pc.

Ager Gerpcnam Lcgangc

⁶ Su:pak ngolu lulvgdung nolum, bvrokvdvnga, ngoluk Ru:tum Jisu Kristokc amino, jc nolu lo:bagla du:nc bvro akonmumlokkc angupc du:langka odokkc itcng-gvtc: dokkcmpc cdc nolu ngolukkolokkcm pa:namdcmpc.

⁷ Kapcnc nolu avkvdv:dc avyc kindag kapc ngoluk ikam-gvkampc imvn-gvmvnpcnamcji;

⁸ ngolu lo:si lo:bagmangai, ngolu sc:kok pitangcmsin rcma:pc dobimangai, cmpige:la kvnggv:pc mc:dapla gerla odokkc ila:-sa:la ngolu yummcmna longgcm gerto, odojc ngolu nolum sc:komsin bvjcmpcnnampc ipcma:dopc.

⁹ Cdc ngolukkcjc: panggot kamangai cdcmpcmang, cmpige:la nolum ngoluk inam gvnamlo lcngkanko bipc imvngvmv nycpc cmnna:mvn.

¹⁰ Kapcnc cddo:mang cdvlo ngolu noluk lcdulo dungaji, sc lulvgla lunamscm lubika; Tani: akomum ager germa:mvlo, bvm domoyoka.

¹¹ Kapcnc ngolu tadbegdag jc nolukkolok akke lo:silo:bagla turdung, cmmumpc ager germonampc ila du:nckkc, oko agercmsin germa:pc.

¹² Su:pak cdcmpinc tani:kvdv:dcm ngolu lulvgcm ludung odokkc Ru:tum Jisu Khristokolo luyircm ludung buluk agercm aso:pc gerdopc odokkc buluk avkc turnamcm malensudopc.

¹³ Bvrokvdvnga, ainc ager gerla gerngangapeksuyoka.

¹⁴ Akonc jodi tadge:mang cmna okodcm ngolu sc do:jvgscm attu:ji luyc, cdc tani:dcm kanggaplangka, odokkc bvkkokki okkomsin ipcnam kamang, ja:te bv anyi:suycpc.

¹⁵ Bvm mirupc ka:yoka, cmpige:la bvm bvrokoncmpc lulomla lutadlangka.

¹⁶ Su:pak mcngandok Ru:tumbv avdc nolum mcngancm lo:dv ayirlo appv:lo bika:langka. Ru:tumbv noluk appv:lo dungka:langka.

¹⁷ Ngo, Poulbv, ngok avkc alakki sc kumtadsunamscm adtung. Sc ngok appvng do:jvglok adgodcm; cmpcna ngok adgoddcm addonc.

¹⁸ Ngoluk Ru:tum Jisu Kristokc aya:dc noluk appvngkc lcdulo dungka:langka.