2 KORINTIANGKVDVNG 9 - ANU LUGOD N. T. (BSI)

Kristan Ajonkvdv:dcm Bidumsunam

¹ Su:pak sc ngokkcpc adbardanna adnampc nolukkolo:pc idag aipc mc:jvgnc tani:kvdv:dok lcga:pc binamko binamkvdv:dok agomdcm.

² Kapila:nc ngo noluk mosv:sula okodokki ngo noluk agomcm Makedonia:dok tani:kvdv:do bottapc lubonsudo, scmpc lula jc mcnyingkc dv:takdokkcbong Akhaya:dc mosv:sula dung; odokkc noluk gvgcla gerrv:dc buluk bojcrungcm mour maberlvgto.

³ Ckvdaggom ngo bvrokvdv:scm mclvgdung ja:te: ngoluk noluk agomcm bottapc lubomsunamdcm arc kama:pc lcngkanma:ycpc, odomvlo jen nolu mosv:suycpc, kapc nolu iycji ngo kapc lutoji.

⁴ Ckvma:mvlo Makedonia:dokkc tani:yc akke ngok lcdulo gvla odokkc nolum mosv:suma:pc du:dopc pa:ycpc, ngolum anyi:sumola–noluk agomcm okkomsin lumoma:dopc– kapila:nc cddvko mc:jvgjvrvgsunamc.

⁵ Cdmpidag ngo mc:to cdcm nolukkodo:pc gvdopc bvrokvdv:dcm lulvgpcnamc ngomyam gvpo:la, odokkc, odokkc mosv:no:la so amansok lcgangc mosv:toka noluk pesunamdcmpc, odomvlo jen cdcm mosv:sula:ycpc lulvgnamdcmpcmang cmpige:la bilv:la binam amancmpc.

⁶ Agomdok mc:la lukamdc scmpc: sc:kobv adjiongko piddoji bv adjiongko gadycku, odokkc sc:kobv bojcrungko pidycji bojcrungko gadycku.

⁷ Appvngc bvkkc bvkkc asindok mcngkamdcmpc bipcru:nammc, bipc:-bige:mang cmma:pc cdcmanggom bipa:ru:yc cmna:mang, kapila:nc Ru:ncpvncb mc:po mcnganna bincdcm aipc mc:dag.

⁸ Odokkc Ru:ncpvncbv nolum pv:sepv:yenamko appvng akirba:dcm nolum bila:dag, odomvlo jen nolukkc lo:dcm appvng pv:namkopc pa:ycpc odokkc appvng ainc ager kvdv:dok lcgangc pv:se-pv:yenamkopc biycpc.

⁹ Cdcm kapc adla lc:tagji, “Bv appv:lo:pc pidgo:dag, bv opankvdv:dcm bidag; Bvk dormokanamdc lo:dvlongkcm mc:yinsula du:dag.”

¹⁰ Sc:kobv amni: pidncdcm amni:ycm biya:doji odokkc donam lcgangc pitangcm biycji noluk kanamcm bi:ya:ycpc odokkc bojcrungko imoycpc odokkc noluk dormo kanamdok arvgcm bojcmoycpc.

¹¹ Nolu airu:pc mircmycpc appvng agerlo bottcru:pc bila:namdokki, okodc ngolukkokki Ru:ncpvnckolo:pc aipai binamcm lenmoycpc;

¹² Kapila:nc sc gernam agersc kama:la du:namc bima:yc cmpige:la Ru:ncpvnckolo:pc aipai binam kvdv:dcmsin bi:pok biyokmoyc.

¹³ Sc agersok ankangka:namso, nolu Ru:ncpvncmc noluk agom tadnamkokki amin gvmoyc Kristokc tadponc lutaddcm togcsula, odokkc buluk lcgangc noluk aman asin mcngkamdcmpc bidumsunamcm binamdokki odokkc ake appv:dok lcgangc.

¹⁴ Cdvlo bulu nolum asinang odonc odokkc noluk lcgangc kumdonc Ru:ncpvnckc ammemyang abaya:pc nolum aya:namdokki.

¹⁵ Ru:ncpvncmc aipai binampc ika:langka Bvk lukurbila:ma:nam amandokki.