2 KORINTIANGKVDVNG 6 - ANU LUGOD N. T. (BSI)

¹ Bvkkokki lckopc agercm gerbosula, odokkc, ngolu nolum kumna:sola: ludung Ru:ncpvnckc ayangabodcm cmmumpc torvgsuyoka.

² Kapila:nc Bv ludag, “Torvgsudv ayirdo ngo nolum tadto, odokkc mopvdo longcdo ngo nolum modumsuto.” Ka:toka, su:pakna torvgsula:nam ayirdc; ka:toka, su:pakna mopvnam longcdc:nc.

³ Ngolu sck lambclo:sin mokomnammcm lc:mang, odomvlojen oko imurkosin ngoluk ager gernamdo pa:ma:ycpc.

⁴ Ckvdaggom Ru:ncpvnckc ager gerncpc ngolu avyc avycm appvng lambclo aidopc lusudo: kvnggv:pc mcnga:sula.

⁵ Ipusire: pa:namlo, torpc ager gernam kvdv:lo, dungko-ycko kama:pc ipusire: pa:dom, dcmdokvdv:dcm, makana:lo tumla lc:dom, uru:sare:dowcm, kvnggv:pc mcnggapla ager gerdom, toya:la darra du:dom, doma:pc menna du:dom.

⁶ Napv-narcngkokki, kinnamkokki, menya:sula du:namkokki, asin aya:pc mc:namkokki, Angunnc Yalodc, narc:pc:sc:nc ayangc, aropaknc agom lunamc, odokkc Ru:ncpvnckc tornamdc;

⁷ dormokanamdok yoktung-katokki lagbvk alakdok lcgangc odokkc lakkedok lcgangc;

⁸ mcnggcnamlo odokkc mcnggcma:namlo, ainc cmna lunamlo odokkc lume: cmna lunamlo. Ngolum yadgo:ncpc ludag-gvdag, odokkc ckvdaggom arro;

⁹ kinma:nampc innc odokkc ckvdaggom aiyo:pc kinnamc; sinncmpc innc, odokkc ka:tok ngolu turdung; mogvtmomatnammcmpc innc, odokkc ckvdaggom mokemang; mc:dvrc bi:ncmpc innc, ckvdaggom lo:dvscm mc:pola dung;

¹⁰ opanncmpc innc, ckvdaggom bojcrungcm mircmmonnc; okkosin kama:ncmpc innc, odokkc ckvdaggom appvngc dung.

¹¹ Ngoluk nappangc nolukkcpc kokala dung, Korintiangkvdvnga; ngoluk asinc bottadag.

¹² Nolu ngolukkokki motum-morummang, cmpige:la nolu av-avkvdv:dc avkc aipc mc:namkvdv:do motum-morumsudag.

¹³ Lulatsukolo ngo ko:kangkvdv:do:pc lukamdcmpc agomcm ludo–noluk asin kvdv:dcmsin pontamotoka.

Ui Inc kvdv:do Birudi:pc Lutad Lula Lc:nam

¹⁴ Mc:jvgma:nckvdv:dokki ajoncm jonsula midangcm moyoka. Kapila:nc dormokancdokkclang aima:nc ager gerncdokkc jonsupcnamc okko du:n? Cdcmanggom pva:dokki kcmodokkc oko ajon jonsunammc du:n?

¹⁵ Kristokc Belialkokki asin tolvgmvnsunammc du:n? Cdcmanggom mc:jvgnc akolokkc mc:jvgma:nc akolokki okoko lckolakkonamko du:n?

¹⁶ Ru:ncpvncmc kumko okumdokki monam moimangdokki lckopc oko asin mc:namc du:n? Kapila:nc ngolu turra du:nc Ru:ncpvncmc kumko okumc; Ru:ncpvncbv kapc lutoji, “Ngo buluk lcdulo du:mvnyc odokkc buluk ara:lo gvgo:yc, ngo buluk Ru:ncpvncpc iyc, odokkc bulu ngok tani:pc iyc.

¹⁷ Cdcmpidag buluk ara:dokkc gvlentoka odokkc bulukkolokkc angutoka, Ru:tumbv ludag, odokkc narc:ma:nc okkomsin gakkvyoka; odo ngo nolum gogrvgsuyc.

¹⁸ Odokkc ngo nolukkcpc abupc iyc, odokkc nolu ngok awopclang omcpc ingapyc, appv:pc ilang-gvla:nc Ru:tumbv ludag.”