2 KORINTIANGKVDVNG 5 - ANU LUGOD N. T. (BSI)

¹ Kapila:nc ngolu kindag jc ngoluk mo:pvsok tombu okumdc jodi omvgyc, ngolukkc Ru:ncpvnc kolokkc monam okumko dung, alakkokki moma:nam okumko, lo:dvpc taycng amo:to du:ncko.

² Sido aropakpci kila madgo:sula dung, odokkc ngoluk taycng dungkodo du:lv:dag,

³ odomvlo jen cdcm mokumsula ngolum akud ali:dopc pa:ma:ycpc.

⁴ Kapila cdvlo ngolu sc tombu okumso du:tv:du:nc, ngolu mcnggu:-mcnga:ma:la sagvgvdo; ngolum jc attar pvdyc cdcmpcmang, cmpige:la jc ngolum odokkcsin attarcm molvgyc, odomvlo jen okodo sikupcnncnc turnamdokki metpakycpc.

⁵ Sc:kobv ngolum sc attarsok lcgangarc mosv:tonc Ru:ncpvncbv, sc:kobv ngolum Yalodcm aroru:ngc lcngkanpc bitu:ji.

⁶ Cdcmpidag ngolu lo:dvscm asinc bottapc mc:do; ngolu kindag jc cdvlo ngolu amvrdo avk okumlo dungkampc du:ji ngolu Ru:tumkolokkc mo:tc:pc du:do.

⁷ Kapila:nc ngolu mc:jvgkki lambcm gvdo, ka:namkimang.

⁸ Ngolu asinc bottapc mc:sudo, odokkc amvrdokkci mo:tc:yc odokkc Ru:tumkolo mcngkampc du:mvnyc.

⁹ Cdcmpidag ngolu mcngkampc du:mvndaggom, ngolu cdcm ngoluk mcngkampc itu:bong Bvm aipc mc:lvgsumopc cmna.

¹⁰ Kapila:nc ngolu Kristokc kcbang bangko tedkodo appvngc aincmnang aimangcm pa:ycpc, bv okkom amvrki ikaji cdcmpc.

Kristokokki Ru:ncpvncmc Ajon Jonnam

¹¹ Cdcmpila:yam Ru:tumkc pcsodcm kinna, ngolu tani:kvdv:dcm mc:jvgdopc lubido; cmpige:la ngolu sc:kobuluji Ru:ncpvncbv kindag, odokkc ngo mc:dag cdc noluk mc:na sagnancsin kindag.

¹² Ngolu avycm ainc cmna nolum lckoda mc:sudopc lcgangko nolum bidung, odomvlo jen nolu cdc sc:kobulu av avdc bvk asinlo:ma:pc tani:lok du:namdagnamlo bottapc lusudagnc lulat agomcm lubila:ycpc.

¹³ Kapila:nc jodi ngolu mcngkin mc:para:ma:pc iyc, cdc Ru:ncpvnckc lcgangc.

¹⁴ Kapila:nc Kristokc aipc mc:namdc ngolum kanggabbomdag, kapila:nc ngolum kinmotag jc akonc appvngkc lcgangc sikang; cdcmpidag appvngc sikang.

¹⁵ Odokkc Bv appvngkc lcgangc sikang, jc cdc sc:kobulu turycji buluk avkc lcganc cdvlosin turma:bong cmpige:la Bvk lcgangc sc:kobv buluk lcgangc sikaji odokkc turmotokuji.

¹⁶ Su:pakkolokkc, cdcmpidag, ngolu sc:komsin tani: mcngkam sagkampc kinma:bong; cdcmpidaggom Kristomc lcko tani: mcnggodlok mc:la mcnggcdagagomsinci Bvm su:pak ngolu cdcmpc cdvlosin mcngkuma:bong.

¹⁷ Cdcmpidag, jodi sc:kaiyc Kristokolo du:nc bv anupc ru:namc; akudc katoma:bong, ka:toka, anudc a:du:bong.

¹⁸ Cdc appv:dc Ru:ncpvnckolokkc, sc:kobv Kristokokki ngolum Bvkkolo lckomotokuji odokkc ngolum lckomokunam agerdcm bito;

¹⁹ cdcna, Kristokolo Ru:ncpvncbv lckomodungakui Bvkkokki rcngamscm, buluk imursiyarcm buluk birudi:pc, odokkc ngolum lckomokunamdok lutadcm togclvgla.

²⁰ Cdcmpidag ngolu Kristokc lcgangc lutad lubinc, Ru:ncpvncbv Bv kcbang ba:nam lcgang kumnamcm kumdung ngolukkokki ludung. Ngolu Kristokc lcgangc kumna ludung, Ru:ncpvnckolo lckotokuka.

²¹ Ngoluk lcgangc Bv Bvm pa:p kancpc imoto sc:kobv pa:bcm kintoma:ji, odomvlo jen Bvkkolo ngolu Ru:ncpvnckc dormokancpc iycpc.