2 KORINTIANGKVDVNG 4 - ANU LUGOD N. T. (BSI)

Among Ki:lvngdo Yaloagom Murkong Kumsungc

¹ Cdcmpidag, Ru:ncpvnck ayangki sc agerscm gerdom, ngolu asinc adji:ma:yc.

² Ngolu anyv:pcnam, lc:sila gernam lambckvdv:dcm mcpagamtobong; ngolu Ru:ncpvnkc agomlo aima:n agercm cdcmanggom lutcmlubangcm luge:ma:bong cmto cmpige:la aropc lunam mo:rong agomdokki ngolu av avyc appvng tani:lok mc:nam sagnamcm aidag cmna Ru:ncpvnckc kangkolo luyc.

³ Odokkcsinci jodi ngoluk tadponc lutaddcm ungkomto, cdcm cdc sc:kobulu singapdu:nc bulug lcgangongc ungkomtag.

⁴ Buluk agomdo sc mo:pvsok uidc mc:jvgma:nckvdv:dok asinkvdv:dcm migluammoto, bulum amin gvnc Kristokc tadponc lutaddcm kamoge:mang cmna, sc:kobv Ru:ncpvncbv kapc idagji cdcmpc incdc.

⁵ Kapila:nc okodcm ngolu lutadbidonc cdc ngoluk av avkcmang, cmpige:la Jisu Kristobv Ru:tumpc incdc cmna, ngolu av-avyc noluk ager gerya:ncpc Jisukc lcgangc.

⁶ Kapila:nc cdc Ru:ncpvncbv sc:kobv ludagnc, “Kcmodo pvangc pvka:langka,” sc:kobv ngoluk asin ara:bo kinnamlok pva:dcm dormotoji Ru:ncpv:nckc amin gvnamdokkcm Kristokc dumsimigmolo.

⁷ Cmpige:la ngoluk sc lcngkumnam murko:sc among lcnggcng kvdv:l dung, cdcm lcngkanpc jc appvngcm bottaya:nc ilang gvla:dc Ru:ncpvnckc odokkc ngolukkcmang.

⁸ Ngolu appvng agerlok ipusire:lambcm gvdung, ckvdaggom sipakmang; mcngkin mc:para:mang, cmpige:la asin adji:gcdopc mc:momang;

⁹ mogvt momattag, cmpige:la mcpaknampc imang; dcmtapto, ckvdaggom dcmkemang;

¹⁰ lo:dvscm amvrso Jisukc sinamdcm jonggo:bomdung, odomvlo Jisukc turra du:namdc:sin ngolukkolo ngoluk amvrkvdv:so ka:begycpc.

¹¹ Kapila:nc cdvlo ngolu turra du:donc ngolu lo:dcm sinamlo jen Jisukc turnamdc ngoluk sipcnc adinso lenycpc.

¹² Cdcmpidag sinamc ngolukkolo ager gerla dung, cmpige:la turnamc nolukkolo.

¹³ Ngolukkc c:mo:pinc mc:jvgnam yallo du:namc sc:kobv adtoji, “Ngo mc:jvgto odokkc cmpila ngo luto,” ngolusin, mc:jvgdo, odokkc ngolu ludo,

¹⁴ kinna jc sc:kobv Ru:tum Jisumc turmotokunc ngolumsin Jisukc lcdulo turmoycku odokkc noluk lcdulo Bvk dungkodo:pc langa:ycku.

¹⁵ Kapila:nc cdc appv:dc noluk lcgangc, odomvlo jen kapc ayangc bojc bojcya:pc gvbarka:nc bojcya:ng tani:yc aipai binamc bojcya:yc, Ru:ncpvnckc aminc gvdopc.

Mc:jvgkokki Turnam

¹⁶ Cdcmpidag nolu asinc adji:pc mc:mang. Ngolu adin-amvr inasa:namc yogpagla gvbomdaggom, ngoluk arangkc inam sa:namdc longgcm longgcm anumola gvdung.

¹⁷ Kapila:nc sc adji:oko vgcmpc ipusire: pa:namsc ngolum cdvlosin yogma:nc bottcru:nc amin gvnclo:pc mosv:dung okkomsin luyv:sunam kama:pc.

¹⁸ Kapila:nc ngolu ka:begnam attarkvdv:do:pc ka:mang cmpige:la ka:begma:nam attarkvdv:do:pc; kapila:nc ka:begnam attarkvdv:dc lo:tungongko du:nc, cmpige:la ka:begma:nam attarkvdv:dc lo:dvpc du:tvnc.