2 KORINTIANGKVDVNG 13 - ANU LUGOD N. T. (BSI)

Lutcr Luno:binamcla: Kumtadsula Lunam

¹ Sc ngokkcpc lcwumkopc iycbong ngo nolukkolo:pc gvnamdc. Atv lujcmcm lunamcm anyikoma:m awumkokki ka:nckokki arro cmna lukanpa:yc.

² Ngo lukanbitobong cdc sc:kobulu po:pc pa:bcm itonc odokkc ake appv:dcm, odokkc ngo lutaddung su:pak bulu kama:doscmsin, ngok lckon gvdodcm du:do dokkcmpc, jc ngo lckoda gvmvlo ngo bulum cpv:pc mc:yinsuma:yc–

³ Kristobv:jc ngokkokki agom ludag cmnamdcm kangodko ka:lvgdagnc. Bv nolum iko-sangkolo tornam kama:pc imang, cmpige:la Bv nolukkolo torncrungc.

⁴ Kapila:nc Bv ilang gvla:ma:dodo kuruslo pvtketo, cmpige:la Ru:ncpvnckc tornamkokki turdag. Kapila:nc ngolu Bvkkolo rcmakdag, cmpige:la nolukkokki ido-sa:dodcm ngolu Bvkkoki turyc Ru:ncpvnckc tornamkokki.

⁵ Avycm avyc anka:sula ka:sutoka, noluk mc:jvgcm mcnggaptvla du:ji du:ma:ji. Avycm avyc ankang kangkvsutoka. Nolu mcngkvsuma:nci nolujc Jisu Kristokolo du:nc?– aroru:pc nolu ankang kangkvnamdcm ka:la:ma:mvlo!

⁶ Ngo mc:dag nolu pa:ycpc jc ngolu ilang-gvla:ma:pc imang.

⁷ Cmpige:la ngolu Ru:ncpvncmc kumdojc nolu germurcm germa:ycpc cmna–ngolu jc ankang kangkvdcm rvgsuycpc cmna:mang, cmpige:la nolujen okodc aidagji cdcm iycpc, ngolum ilang-gvla:ma:dopc ka:daggom.

⁸ Kapila:nc arodok biruddi:pc atvkosin ila:mang, cmpige:la arodok lcgango:pc.

⁹ Kapila:nc ngolu mc:podo cdvlo ngolu torma:ji odokkc cdvlo nolu tordoji. Okodcm ngolu kumdonc cdc noluk aibomla gvnam lcgangc.

¹⁰ Ngo scm addung cdvlo ngo nolukkolokkc mo:tc:doji, cdcmpc ipc cmna jc cdvlo ngo gvycji ngo:jen ngom Ru:tumbv bikaji cdc ilang gvlangdcm lunadodo kvnggv:pc luma:ycpc mosv:nanc lagangc odokkc mopennapc lcga:mang.

¹¹ Lungapdoso, bvrokvdvnga, cdcbong. Noluk lambckvdvdcm mosv:toka, ngok lunamkvdv:scm tadgapla ansutoka, akonc akoncm tadmvnsutoka, mcnganna du:la:daglangka, odokkc aya:nclang mcngannclok Ru:ncpvncbv noluk lcdulo du:ycpc.

¹² Angunnc dosukkokki akonc akoncm kumtadsulangka.

¹³ Appvng ainc kumnc tani: kvdv:dc nolum kumtadsudag.

¹⁴ Ru:tum Jisu Kristokc aya:dc odokkc Ru:ncpnckc aipc mc:namdc odokkc Angunnc Yalodok du:jonnamdc noluk appvngkc lcdulo dungka:langka.