2 KORINTIANGKVDVNG 11 - ANU LUGOD N. T. (BSI)

Poulbv:lang Lume:lunc Mclvgla Ager Gernc kvdv:dc

¹ Ngo mc:dag nolu adjio:ko ngok lcdulo kinma:pa:ma:namko jo:mvnycpc. Ngok lcdulo jo:mvntoka!

² Ngo noluk lcgangc taycng asin dvgnamko dvgdag, Kapila:nc ngo nolum Kristokcpc nolum tadpvrbitung nolum milbong akkongcm bvkkcpc mc:la gvnc yamnckoncmpc.

³ Cmpige:la ngo pcsodag jc tabvdc kapc I:bmc bvk aimangkokki, noluk mc:namsagnam kvdv:dokkcm gvyotboyc Kristomc mc:jupla odokkc angunpc kumnamdokkcm.

⁴ Kapila:nc jodi sc:koiyc gvyc odokkc akon Jisuko lutad lubic ngoluk lutadnamdcmpcyam, cdcmanggom jodi ngolu angu yaloko torvgsuyc noluk torvgsunamdcmma:pc, cdcmanggom jodi nolu angu tadponc lutadko torvgsuyc nolu okodcm torvgsutonc cdcma:pc, nolu pv:namkopc cdcm mosv:sudanna jo:toka.

⁵ Ngo cdcm mc:dag jc ngo bottarya:nc mclvgla ager germonam tani:kvdv:scmyam adji:yarya:ncmang.

⁶ Cdcmv:pci ngo agom lukolo lujo:ncmang, ngo kinncpa:ncmang; appvng lambclok ngolu scm nolum kinkur kinle:motung appvng agerlo.

⁷ Ngo pa:pko itonci avycm ngo anyi:sumopc cmna odomvlo nolujen amin gvycpc, nolum atv arc kama:pc Tadponc lutaddcm nolukkolo lula?

⁸ Ngo amikc mondoli:ycm rotkutka bulukkolokkcm idumsunamcm torvgsuge:la nolum ka:nam lcgangc.

⁹ Odokkc cdvlo ngo noluk lcdulo du:mvndungaji odokkc madodcm du:mvndungaji, ngo sc:komsin jongcsumomangai, kapila:nc ngok manamkvdv:dcm bvrokvdv:dokki mclvgbika sc:kobulu Makedonia: dokkc gvkaji. Cdcmpidag ngo motumsuto odokkc kapcsin sc:komsin jo:namko jo:dopc motumsuyc.

¹⁰ Kapc Kristokc arodc ngokkolo du:ji, sc ngok bottapc lusunamsc Akhaya mo:takdo aso:pc du:ma:yc.

¹¹ Odokkc kapila? Lcga:dc ngo nolum aipc mc:ma:nci? Ru:ncpvncbv kindag ngo mc:do!

¹² Odokkc ngo okkom idonc ngo itvyc, sc:kobulu ngoluk ikamv:pc idagji buluuk bottapc lusunam mclvgla germonam agerdcm gerdodcm sc:kobulu lusudagaji cdcmbulum kcvg kcvgpc momvgpc cmna.

¹³ Kapila:nc cdcmpinc tani:kvdv:dc lume:pc lunc mclvgla ager germonamkvdvngc, yadgo:nc ager gernc, av avkvdv:dc Kristokc mclvgla ager germonammc cmna lc:sula lcngkansudag.

¹⁴ Odokkc mcngapla:ma:nampc imang, Kapila:nc Uidc:sin bv avdcm pva:lok taycng among tani:yc cmna lc:sula lcngkansudag.

¹⁵ Cdcmpidag Bvk avkc ager gerya:nc kvdv:dc:sin lc:sula lcngkansunamdc mcngapla:ma:nampc imang dormokanc ager gerya:ncpc lcngkansupc. Buluk ager gernamkvdv:do buluk du:tcrolo dungapyc.

Poulkc Mclvgla Ipusire: Pa:nam Ager Gernckopc

¹⁶ Ngo lutenla lutatdung, ngom sc:komsin monba:nc kinma:nc cmna mc:moyoka; cmpige:la nolu mc:daggomsinci, ngom monba:nckopc torvgsutok, ja:te ngo:sinci adjio:kopc bottapc lubonsula:ycpc.

¹⁷ (Okodcm ngo ludonc ngo Ru:tumkc ilanggvla:dokki ludo cmpige:la monba:ba:nc koncmpc, sc bottapc mc:sunamsokki.

¹⁸ Kapc bojcrungc mo:pvsok attarki bottcpc lubonsudagji, ngo:sin bottapc lubonsuyc.)

¹⁹ Kapila:nc nolu mc:po:pc monba:-ba:nc kvdv:dokki mc:yinsula du:do, nolu avkvdv:dc kinncpc ige:la!

²⁰ Kapila:nc noluk pagbo tani: akonc iycmvlo cdcm mc:yinsudo, cdcmanggom nolum moyetycmvlo, cdcmanggom nolum mcge:la mc:namko ipc mc:ycmvlo, cdcmanggom nolum yc:bomna gvycku, cdcmanggom nappa:dok nolum piyc.

²¹ Ngo anyi:supc, ngo lupa:ru:yc, ngolu odok lcga:pc airu:pc rcmagdagai. Cmpige:la okkomci sc:koi bottapc lubonsupc asinc mcngkvycnc–ngo monba:ba:ncmpc ludung– ngo:sin cdcm bottapc lubonsupc asinc mc:sudag.

²² Bulu Hibriuci? Ngo:sin cdcmpc. Bulu Israelici? Ngo:sin cdcmpc. Bulu Abrahamkolokkc lennci?

²³ Ngo:sin cdcmpc? Bulu Kristok ager gerya:nci? Ngo aiya:nc ako–ngo simadnc tani:koncmpc ludung–bojcru:yangko bottaya:nc agerkokki, bojcru:yangko makana:lo tumkosula, kvngapla:ma:namko dcmkosula, odokkc lckko: lckko:lo sipcmna ila.

²⁴ Lcmngoko Jiwukvdv:dokkcm ngo dcmkosuto.

²⁵ Lcwumko sabukki ngom dcmto; ngom lcko vlvngkokki crtapto. Lcwumkopc ngo siycng ollu:lo openkolo pa:to; yumckolang longcko siyc:lo ngom punggo:bomna du:to;

²⁶ lckko lckko:lo mo:dopc gvddcm, a:nclok pcsopcnamlo, rodkudnclok pcsopcnamlo, ngok avkc tani:kvdv:dokkc pcsopcnamc, Angu Tani:kvdv:dok pcsopcnamc, nogorlo pcsopcnamc, yumra:lo pcsopcnamc, siycnglo pcsopcnamc, lume: lunc bvrokvdv:dokkc pcsopcnamc;

²⁷ kvnggv:pc ager gerdomnang torpc ager gerdom pcsopcnamc, bojcrungko yubbegma:nam yumclo, kcnongclang tv:lv:lo, lckko lckko:lo donam kama:pc, svkvrra akud ali:pc dungkolo,

²⁸ odokkc, angu attarkvdv:dcm mcge:la, appvng mondoli: kvdv:dok lcgangc ngokkc mcnggu: mcnga:ma:namko nv:jcmbomna du:ng.

²⁹ Sc:kobv torma:nc, odokkc ngo torma:nci? Sc:kom otapdopc motang, odokkc, ngo aglvngsa:ma:nci?

³⁰ Ngo bottapc lubonru:sumvlo, ngo ngom rcmagdopc lcngkannc atvkvdv:do bottapc lusuyc.

³¹ Ru:ncpvncdc odokkc Ru:tum Jisukc Abudc, sc:kobv lo:dv:pc akirba:d pa:ncnc, kindag jc ngo lume:ycm lumang.

³² Damasku:do, amo:ru:tumdc Migom Aretakc Kcvgdo Damasku nogordcm ka:sv:mosv:to ngom ycnggappc cmna.

³³ Cmpige:la ngom gempalo bare:dok kiriki:kolok ledyi:lvgto odokkc bvk alagdokkc dugsito.